Politike

Kryetari i bashkisë së Tiranës Erion Veliaj priti sot në zyrën e tij Presidenten kroate, Kolinda Grabar-Kitarović, me të cilën më pas mbolli edhe një pemë në “Parkun e Europës”.

Por, pikërisht në çastin kur të dy zbritën për të rrëmbyer lopatat, Presidentja Kitarović dha një intervistë për televizionin kroat HRT, që ndoqi live vizitën e saj 3-ditore në Shqipëri, e mandej, me thjeshtësinë e saj që spikati në Botërorin e Rusisë, mori rolin e “gazetares” dhe i kërkoi Veliajt të thoshte dy fjalë, për të mësuar diçka më shumë për nismat e ndërmarra prej tij në këto 3 vjet, të cilat i kanë ndryshuar fytyrën Tiranës.

Sigurisht, kryebashkiaku Veliaj iu përgjigj me kënaqësi interesimit të Presidentes dhe televizionit HRT, me të cilët ndau disa nga zhvillimet kryesore të kryeqytetit, si shtimi i korsive të biçikletave, transformimi i sheshit “Skënderbej” apo fushata për mbjelljen e pemëve.

Më poshtë pjesë nga intervista:

Presidentja e Kroacisë: …ndoshta Ju mund të na thoni disa fjalë më shumë sa i përket nismave tuaja dhe si Ju e keni transformuar qytetin…

Erion Veliaj: …vendosëm të hiqnim makinat nga qendra e qytetit dhe në kthim (në qendër) erdhën më shumë njerëz. Sapo e larguam FAN ZONËN në shesh, sepse kampionati botëror mbaroi, por së shpejti do të kemi një tjetër koncert, pastaj një shesh lojërash. Mendoj se është vërtet shumë emocionuese kur sheh në kthim merr atë për të cilën ke investuar. Pra, nëse ndërton më shumë korsi biçikletash, atëherë ke më shumë çiklistë. Tani kemi linjën më të madhe, një prej të parave programe “bike sharing” pa stacion në Ballkan, ku njerëzit thjesht përdorin telefonat e tyre për të gjetur biçikletën portokalli, që ndodhet më pranë tyre e kështu lëvizin nëpër qytet. Pastaj, i zbresin biçikletës dhe dikush tjetër mund ta përdorë atë.

Diçka e mirë që ne bëmë është edhe mbjellja e pemëve. Zbuluam se s’kishim burime të mjaftueshme, por thamë: Po sikur çdo fëmijë në Tiranë të mbjellë një pemë për ditëlindjen e tyre? E kështu patëm një dyndje prej 126 mijë pemësh në Tiranë. Tashmë, është shumë “jo cool” të mos kesh mbjellë një pemë në Tiranë. Kështu, meqë ne jemi “cool”, tani do të mbjellim një pemë. /atsh

“Shqipëria ka një krizë të trefishtë”, – u shpreh sot Kryetari i Partisë Demokratike, Lulzim Basha, në një bashkëbisedim me gazetarët.

“Shqipëria ka një krizë ekonomike. Nuk ka asnjë investim të huaj prej 5 vitesh. Dy investimet e huaja të mëdha po mbarojnë si TAP-i, edhe Kaskada e Devollit. Siç e ka thënë FMN, me mbarimin e tyre mijëra vende pune do të humbasin. Së dyti, kemi një politikë të kapur nga krimi. Kaluam nga një ministër të Brendshëm që bënte trafik droge me kushërinjtë e tij, në një ministër të Brendshëm që mbron vëllain që merret me trafik droge. Së treti, kemi një reformë në drejtësi, e cila është tërësisht e kapur nga kjo qeveri që në vetvete është e kapur nga krimi. Pra kemi një krizë të trefishtë, krizë ekonomike, kushtetuese dhe morale”, – tha Basha.

Duke folur për negociatat me Bashkimin Europian Basha tha se, “vendimi i 28 qershorit për ta shtyrë me një vit shqyrtimin e vendimit nëse do i hapen apo jo negociatat Shqipërisë, është një tjetër leksion për Shqipërinë dhe shqiptarët dhe në veçanti për Edi Ramën, që në Europë nuk hyhet me gënjeshtra. Në Europë hyhet vetëm me të vërteta. E vërteta është që Shqipërisë nuk iu hapën negociatat këtë vit edhe pse kishte një mbështetje pa kushte nga Komisioni Europian. Kjo është e vërteta”.

Basha theksoi se, “Shqipërisë nuk iu hapën, sepse shtetet e mëdha anëtare Gjermania dhe Franca ngritën shqetësimin se Shqipëria nuk ka treguar rezultate konkrete në luftën kundër krimit të organizuar dhe korrupsionit dhe në veçanti kundër trafikut të drogës. Ky është një mesazh për qeverinë, jo për popullin. E dinë europianët që 97% e shqiptarëve e duan integrimin në Europë. Ky nuk është një mesazh ndaj shqiptarëve. Shqiptarët i meritojnë negociatat, qeveria i pengon negociatat”.

Basha foli edhe për amendimin e ligjit të Magjistraturës që kërkon edhe votat e opozitës për të kaluar në Kuvend. Basha u shpreh se ky amendim i ligjit nuk e zgjidh problemin e reformës në drejtësi.

“Në fillim na thanë kaloni ligjin për Vetingun se do futeni në Europë. Ju thamë që kjo nuk është e vërtetë. Nuk është çështje e kalimit të një ligji. Është çështja e zbatimit të reformave në tërësi dhe në veçanti të reformës në drejtësi. Tani na thonë kaloni ligjin e Magjistraturës. Çfarë është ligji i Magjistraturës? Është të futësh një kuotë studentësh, të cilët pas 3 vitesh do të mbarojnë shkollën. Reforma siç e parashikuan këta me ligjet që kaluan në mënyrë të njëanshme, thotë që kjo është detyrë e KLGJ-së dhe KLP-së. Por nuk ka KLGJ dhe KLP. Procesi zvarritet. Vetingu ecën me ritme shumë të ngadalta”, – tha Basha.

“Ta zëmë se e pranuam amendamentin për të kaluar këtë problem që ka shkaktuar vetë qeveria. E zgjidh kjo problemin e Gjykatës Kushtetuese jofunksionale? A e zgjidh kjo faktin që kemi një Prokuror të Përgjithshëm të zgjedhur në mënyrë partizane, në kundërshtim me Kushtetutën? A e zgjidh kjo faktin që s’kemi KLGJ dhe KLP dhe nuk e dimë se kur do t’i kemi? A e zgjidh kjo faktin që nuk kemi SPAK dhe BKH? Përgjigja për të gjitha këto është jo. Pra duke rendur pas diçkaje sipërfaqësore dhe duke injoruar reformën në drejtësi për shkak të ligjeve të bëra në mënyrë të njëanshme, jo vetëm nuk e zgjidhim problemin, por e thellojmë atë. Ligji për Magjistraturën nuk zgjidh asnjë nga këto çështje”, – u shpreh Basha.

“Kjo do të thotë që dyert e Europës për Shqipërinë edhe pas një viti do të mbeten të mbyllura”, – shtoi Basha.

I pyetur për një bashkëqeverisje me Edi Ramën, Basha tha se, “Partia Demokratike nuk do të bëhet kurrë pjesë e së keqes. Nuk do të bëjmë pakt me qeverinë e lidhur me krimin”.

Basha tha se, PD do t’i ofrojë qytetarëve alternativën e saj për një të ardhme të sigurt.

Sipas tij, opsioni është udhëheqja pa një qeveri të lidhur me krimin. /atsh

Në një ceremoni solemne të zhvilluar në Pallatin e Brigadave, Presidenti i Republikës, Ilir Meta vlerësoi me “Dekoratën e Flamurit Kombëtar” Presidenten e Kroacisë, Kolinda Grabar-Kitaroviç,  ”Për kontributin e çmuar në intensifikimin e gjithanshëm të marrëdhënieve midis Republikës së Shqipërisë dhe Republikës së Kroacisë; për forcimin e mëtejshëm të miqësisë shumëshekullore midis popullit shqiptar dhe atij kroat; si dhe për mbështetjen e pakursyer në kuadër të procesit të integrimit të Shqipërisë në Bashkimin Europian”.

Në këtë ceremoni, Meta vlerësoi lart rolin dhe mbështetjen e Presidentes Grabar-Kitaroviç për Shqipërinë dhe shqiptarët, si në kuadër të zhvillimeve rajonale, ashtu edhe të integrimit europian.

“Kroacia para tre ditësh u shpall me meritë si nënkampione bote në futboll, duke frymëzuar edhe shqiptarët dhe gjithë popujt e tjerë të këtij rajoni për suksesin në të ardhmen.  Por për ne padyshim që Kroacia ka qenë dhe është gjithashtu edhe një shembull shumë i mirë për një ecuri më të suksesshme lidhur me anëtarësimin tonë në Bashkimin Europian”, tha Presidenti.

Shqiptarët dhe kroatët kanë ndërtuar në shekuj lidhje të fuqishme miqësie e bashkëpunimi, tha Meta duke shtuar se “300 vjet më parë kroatët i hapën dyert e tyre Arbanasve dhe kjo ka vijuar në forma të ndryshme deri në fund të shekullit të shkuar”.

Ai vuri në dukje se vizita e Presidentes kroate në vendin tonë është konfirmim e marrëdhënieve të shkëlqyera mes dy vendeve.

“Sot demonstruam edhe një herë dëshirë dhe vullnet të përbashkët për t’i çuar më përpara e forcuar marrëdhëniet në të gjitha fushat, ku padyshim ai ekonomik e kulturor mbeten ndër prioritetet tona kryesore.  Së shpejti do t’i ngremë ato në nivelin e Partneritetin Strategjik, në dobi të marrëdhënieve midis dy vendeve, por edhe të rajonit tonë të përbashkët. Për të gjitha këto arsye, por jo vetëm, mirënjohjen për Kroacinë, popullin kroat dhe Presidenten Kolinda Grabar-Kitaroviç, dëshiroj ta shpreh përmes akordimit të Dekoratës së Flamurit Kombëtar”, tha Kreu i Shtetit.

Pasi mori në dorëzim dekoratën më të lartë të shtetit shqiptar, Presidentja e Kroacisë, falënderoi Presidentin Meta duke theksuar se: “ju falënderoj zoti President për këtë nderim, që në fakt nuk është vetëm për mua, por edhe për popullin kroat, duke më akorduar Dekoratën e Flamurit Kombëtar! Ky titull që po marr është simbol i një miqësie të thellë mes vendeve tona, veçanërisht mes shqiptarëve dhe kroatëve dhe u jam mirënjohëse si ju personalisht, po ashtu dhe Shqipërisë.” /atsh