Opinione

Blendi Fevziu

Në një analizë të gjatë kushtuar gjeopolitikës në Ballkanin Perëndimor dhe raportit të shteteve të kësaj pjesë të Evropës me fuqitë e mëdha si SHBA apo Rusia, gazetari Blendi Fevziu sugjeron më shumë punë për shtetet shqiptare dhe një kujdes të shtuar, pasi jo gjithmonë të “mëdhenjtë” do të kujdesen për ne.
Blendi Fevziu shkon edhe më tutje, duke deklaruar se pas vrasjes së Ivanoviç në Kosovë dy ditë më parë, mund të fshihen pikërisht forcat e mëdha, e në këtë rast Rusia.

Gazetari e lidh ngjarjen e rëndë të ndodhur dy ditë më parë edhe me reagimin e fortë që ka bërë këtë të enjte Rusia zyrtare, kundër kreut të qeverisë shqiptare. Deklaratat e Ramës për rolin e qeverisë së tij në njohjen e gjuhës shqipe në Maqedoni, duket sikur kanë acaruar Moskën duke sjellë dhe një reagim mjaft të ashpër. Fevziu e sheh reagimin e Rusisë si një përpjekje të kahershme të këtij shteti për të influencuar dhe destabilizuar situatën në rajon në favor të tyrin. Kjo sepse, sipas gazetarit, Rusia prej kohësh e ka humbur influencën në Ballkan dhe po kërkon me çdo kusht ta rifitojë.

Por nga ana tjetër, shkruan Fevziu, do të ishte një veprim i mençuar që Shqipëria, Kosova dhe të gjitha vendet ku ka shqiptarë, të kuptonin se nuk mund të qëndrojmë përjetësisht nën çadrën e SHBA-ve. Fevziu shkruan se tashmë ka ardhur koha që shqiptaria të mundohet për të bërë lëvizjet e saj dhe të kujdeset vetë për interesat e saj.

“Nëse nuk kujdesemi për veten, askush nuk do kujdeset më për ne. Dy dekada na ndihmuan të tjerët, tani mbetet të ndihmojmë veten!”- përfundon gazetari.

Për më tepër lexoni analizën e Plotë të Blendi Fevziut:

“Shqiptarët janë në momentin e tyre më të mirë historik”, deklaroi një politikan me rastin e hapjes së vitit të Skënderbeut. Nisur nga një shikim thjeshtë historik, deklarata e tij ishte korrekte. Por nuk mjafton vetëm kaq? Pyetja e parë që më erdhi ndër mend pas saj, është a janë shqiptarët në të njëjtën pozitë të favorshme gjeopolitike? A jemi sërish sot, në po atë situatë të artë që qemë në vitet 1990 – 2009? A mbaruan për ne dy dekada magjike, në të cilat rikuperuam shumë prej gjeravë që kishim bjerrur në thuajse 80 vite të tjera të ekzistencës sonë shtetërore? Dhe në ç’rrethana ndodhi kjo?

Nuk ka asnjë dyshim që më shumë se sa falë rolit tonë, kjo erdhi si pasojë e kombinimit të rrethanave ndërkombëtare.

Mbarimi i luftës së ftohtë; rënia e Bashkimit Sovjetik dhe ridimensionimi i vështirë dhe i ngadalshëm i Rusisë; çmenduria politike e Millosheviçit dhe rreshtimi i tij nacionalist, sollën një situatë të re.

Në vitin 1990, Shqipëria hoqi dorë nga marrëzia gjysëm shekullore komuniste dhe nga sulmet verbale kundër SHBA. Amerikanët e kuptuan që propaganda komuniste nuk kishte ndikuar fare në ndjenjat pro amerikane të shqiptarëve. Nga ana tjetër, të shpërndarë në Jugosllavi dhe në Maqedoninë e sapo pavarësuar, Shqiptarët mbeteshin një faktor i rëndësishëm në Ballkan. Diplomacia Amerikane e dinte këtë. Po në këtë kohë, rrëzimi i Bashkimit Sovjetik, e kishte prishur statusin e privilegjuar të Jugosllavisë. Për sa kohë midis SHBA dhe BS vijonte rivaliteti i luftës së ftohtë, Beogradi, i papërcaktuar me asnjërin krah, ndihej i përkëdhelur nga të dyja palët. Secila palë donte ta kishte në anën e saj, ose minimalisht të mos ishte me tjetrin. Kur ky rivalitet mbaroi, Jugosllavia nuk mund ta kishte më të njëjtin status. Nuk mund të mbylleshin sytë përpara difekteve të saj, thjeshtë për të mos lejuar të afrohej më shumë me palën tjetër. Sepse pala tjetër thuajse nuk ekzistonte më dhe s’kishte ndonjë interes të madh në Ballkan. Veç kësaj, shteti i madh 22 milionësh Jugosllav u dizintegrua dhe balanca e forcave anti serbe ishte po aq e fortë sa ajo pro serbe. Sllovenët, Kroatët, Boshnjakët e më vonë edhe Mali i Zi u rreshtuan kundër serbëve duke e dobësuar më shumë ndikimin e këtyre.

Në këtë kohë ndodhi edhe lufta e Kosovës. Një faktor dominues që çoi në bombardimet ishte dobësia e Rusisë. Jelcin kishte probleme të mëdha ekonomike dhe kërkonte të ruante një raport sa më të mirë me perëndimin. SHBA e Klintonit nuk e konsideronte atë një faktor që mund të ndalonte bombardimet. Po ashtu shtetet e BE.

Sot situata është ndryshe. Rusia e Putinit është shumë herë më e fortë se sa ajo e Jelcinit 20 vjet më parë. Vendet e BE po mundohen të kenë marrëdhënie sa më të kujdesshme me Rusinë. Tramp është më i predispozuar të merret vesh se sa të përplaset me Putin. Interesat Amerikane në Azi mund të lejojnë një tolerim të Rusisë në Ballkan. Vetë Rusët janë sot më aktiv se sa kanë qenë çdo herë në këto 28 vjet pas shembjes së Bashkimit Sovjetik. Sot ata kanë reaguar sërish kundër zyrtarizimit të gjuhës shqipe në Maqedoni. E kanë bërë këtë në mënyrë brutale. Nuk është çudi që rusët të qëndrojnë pas vrasjes së Ivanoviçit në Mitrovicë, ose së paku të përfitojnë prej situatës së krijuar atje. Duke qenë gjithnjë dhe në çdo rast kundër Kosovës së Pavarur.

Rusët duan të krijojnë zonën e tyre të influencës dhe të jenë pjesë e vendmimarrjes në Ballkan. Kjo situatë mund të favorizojë serbët. BE e do Serbinë në Europën e Bashkuar, SHBA në NATO. Rusët e duan jashtë. I vendosur midis dy grupimeve tashmë rivale, Vuçiç mund të fitojë sërish statusin e privilegjuar që e kishte humbur Jugosllavia e vitit 1990. Duke luajtur nga pak dhe duke ju shkelur syrin të dyja palëve.

Natyrisht, Shqipëria ka shpëtuar një herë e mirë nga influenca Ruse. Në këtë vend rusët s’i kanë dashur kurrë. Ne jemi anëtarë të NATO -s dhe me ambicie të qarta drejt BE. Por Kosova dhe Maqedonia mund të kenë probleme. Raportet ndërkombëtare mund të ndryshojnë disi dhe ne duhet të jemi të përgatitur për këtë. Duhet të marrim masa vetë.

Euforia e marrëdhënieve të mira me SHBA dhe BE nuk mjafton më. As analizat diletante që ne i duhemi SHBA dhe ajo në çdo rast do përplaset për ne. Ne duhet të kishim punuar dhe duhet të punojmë për një infrastrukturë të përbashkët. Në vend të krijimit të feudeve të shqiptarëve, duhej të kishim pasur një treg të përbashkët; një shoqëri të integruar kulturore e shpirtërore. Përrallat se ne jemi të zgjedhurit dhe të favorizuarit e Ballkanit duhet të marrin fund dhe ne duhet të ndërtojmë vetë vendin që na takon këtu. Duhet të jemi më të kujdesshëm ndaj aleancave tona natyrale dhe më kërkues për të ngritur shoqëri më demokratike, më të hapura dhe më pak të korruptuara.

Nëse nuk kujdesemi për veten, askush nuk do kujdeset më për ne. Dy dekada na ndihmuan të tjerët, tani mbetet të ndihmojmë veten!

Analisti Kastriot Myftaraj, i njohur për deklaratat e tij të forta, sonte ka bërë një deklaratë të rëndë për presidentin turk Erdogan.

Në studion e emisionit “360 Gradë” në Oranews, Myftaraj deklaroi se presidentit turk Erdogan do t’i “ikë koka” nëse vjen në Tiranë për shkak se ka inauguruar vendosjen e gurthemelit të xhamisë së Namazgjasë.Teologu Ermir Gjinishi thotë se nuk jemi në Mesjetë dhe se nacionalizmi nuk bëhet duke sulmuar gjithë botën.

Pjesë nga deklaratat:

Myftaraj: Ai Erdogani yt të vijë këtu dhe do t’i ikë koka në mes të Tiranës. Do të bëj unë thirrje publike sepse ka shkelur laicizmin.

Gjinishi: Do të bësh të njëjtën thirrje për Sali Berishën? Sepse ai e ka vënë i pari gurin e parë te Xhamia e Namazgjasë.

Mos e bë kaq tragjike. Do vrasim Erdoganin. Nuk jemi në Mesjetë. Nuk është Turqia e sotme, Turqia e Mesjetës, nuk është Italia e sotme Italia e 39-s. Italia na ka mbajtur me bukë. Nuk e krijon dot nacionalizmin shqiptar duke sulmuar gjithë botën.

Vrasja e politikanit serb Oliver Inanoviq në Mitrovicë, ka tronditur mjaft politikën midis dy vendeve.

Ministri i Jashtëm Ditmir Bushati ka reaguar në llogarinë e tij në Twitter, duke dhënë një mesazh në anglisht.

Bushati është shprehur se vrasja e politikanit është akt ndaj dialogut Kosovë-Serbi dhe se në këtë rast duhet të veprohet me qetësi dhe të lejohet që drejtësia të vendoset shpejt.

E njohur për batuta dhe deklarata të bujshme, juristja e diplomuar në universitetin e Romës “La Sapinza”, Enida Bozheku, edhe këtë herë ka lëshuar një thagmë të re.

E ftuar në emisionin “Debati në Channel One” të gazetarit Roland Qafoku, pedagogia e jurisprudencës tha: Do doja të isha nusja e Lulzim Bashës për pasurinë 13.1 milionë Euro që do marrë në Strasburg.

Bozheku e lidhi këtë deklarata me reformën në drejtësi, me qendrimin që po mban kryetari i opozitës Lulzim Basha dhe me vendimin e gjykatës së Strasburgut për t’i kthye vjehrrit të tij 13.1 milionë Euro si dëmshpërblim për pallatin e prishur me vendim të qeverisë së Edi Ramës.

Altin Basha vjen në “Arkapia” të gazetares Elsa Demo në një rrëfim total për krijimtarinë e tij në teatër dhe politikat në sistemin teatror që qeveria ka ndjekur në këtë 4-vjeçar.

Basha shpërthen ndaj kryeministrit duke pranuar se është zhgënjyer sepse arti dhe kultura janë jashtë vëmendjes së tij.

Regjisori shpërthen dhe ndaj ministres se kulturës Mirela Kumbaro.

Altin Basha: “Është i pafalshëm dështimi i plotë i kalendarit kulturor në Kosovë. I pafalshëm mungesa e komunikimit me produktin kulturor në Maqedoni. Është e gjitha pluhur mediatik. Nuk ekziston një marrëdhënie kulturore me Kosovën. E gjitha e dështuar, jo produktive.

Mendoj se ekzistojnë resurset, mundësitë, mekanizmat që këto të bëhen efektive. Në këtë kuptim mendoj se gjithçka ka prekur zonja Kumbaro e ka thyer. Prandaj e quaj një elefant në dyqanin e qelqurinave. Mbyllja e festivalit të të rinjve i nxorri jashtë sistemit teatror të rinjtë.

Është e pabesueshme që në momentin kur Shqipëria ka në krye të qeverisë një artist Shqipëria të ketë situatën më të keqe.

Nuk dua të dal në tezat që kryeministri nuk është i informuar për gjërat, nuk i di realetet. Çështja është se arti dhe kultura janë jashtë vëmendjes së tij dhe ky është një zhgënjim shumë i madh, jo vetëm për rëndësinë që ka arti e kultura por edhe për faktin që kryeministri është artist.

Qendra e artit që zonja Kumbaro e mbylli është ideuar në kohën e Ramës ministër, dhe për fat të keq, Rama ministër me Ramën e sotme kanë shumë ndryshim. Në atë kohë ishte shumë më tepër artist e më pak politikan, sot është më shumë politikan e më pak artist në kuptimin e sjelljes ndaj politikave teatrore.

Teatri kombëtar nuk është në kushtet e konkurencës. Teatri kombëtar i merr të gjithë në skenën e tij. Ky është një gabim edhe më i rëndë. Ky është elefanti. Elementët e parë krijues i absorbon dhe i vë emrin Teatri Kombëtar.

Baba Taku bashkohet me Ramën, tregon të gjithë pisllëqet e Ilir Metës që nga blerja e drejtësisë, pastrimi i parave të korrupsionit dhe vjedhjet me anë të drejtorëve

Çanta e zezë e Spartak Baros ka disa javë që ka prishur gjumin e çiftit më të korruptuar në Shqipëri dhe Ballkan, Ilir Metës dhe Monika Kryemadhit. Spartak Braho, i njohur ndryshe si Baba Taku, është makthi më i ri i Ilir Metës dhe Monika Kryemadhit. Braho ka qenë një ndër njerëzit më të besuar dhe të afërt të Ilir Metës. Është dëshmitar i veprimtarisë së zezë dhe disavjeçare të Metës dhe Kryemadhit. Pas prishjes së koalicionit PS-LSI, Braho Braktisi Ilir Metën, duke u bashkuar me Edi Ramën. Ilir Meta dhe Monika Kryemadhi janë në panik për shkak se Braho mund të rrëfejë aferat e tyre tek kryeprokurorja e përkohshme Arta Maku apo aq më keq tek Byroja Kombëtare e Hetimit që do të ngrihet këtë vit. Edhe nëse Braho nuk bashkëpunon, shumë prova kundër Metës dhe Monikës kanë rënë në dorë të bashkëpunëtorëve të Ramës, të cilët do t’i vënë në dispozicion të Byrosë së Hetimit.

Edi Rama ka afruar pranë tij Spartak Brahon në këmbim të rrëfimit të aferave të Metës. Rama dha urdhër që asnjë nga njerëzit e Brahos në degët e administratës të mos shkarkohen. Dhe asnjë nuk është prekur. Së dyti, Edi Rama e futi Brahon në Asamblenë Kombëtare të PS. Disa ditë më parë, Braho u zbuluar teksa po i raportonte Taulant Ballës për një aferë të PD dhe LSI. Krahas raportimit, Braho e këshillonte Ballën që të bënte menjëherë kallëzim penal tek Arta Marku.

Spartak Braho di dhe njeh mirë të gjitha dallaveret, aferat, skemat e korrupsionit dhe pisllëqet brenda çetës së LSI, pra ndërmarrjes familjare të çiftit Meta-Kryemadhi. Braho di mekanizimin korruptiv dhe manovrat që bëri Ilir Meta për t’i shpëtuar burgut në Gjykatën e Lartë pas aferës me zë dhe figurë në zyrën e ish-ministrit Dritan Prifti. Di se si u blenë gjyqtarët, si u blenë ekspertët dhe se si u hodh në kosh ekspertiza e FBI, e cila çonte Metën në burg për korrupsion. Çanta e Baba Takut ka prova për implikimin e Ilir Metës në çështjen CEZ, pazaret në Pragë, gjobat etj. Çanta e zezë e Baba Takut ka dëshmi dhe prova për lëvizjet e Ilir Metës pas akuzave publike për organizimin dhe porositjen e vrasjes së një deputeti të Kuvendit të Shqipërisë.

Çanta e Baba Takut ka dijeni për fshehjen e pasurive nga Monika Kryemadhi dhe Ilir Meta. Di të gjitha lëvizjet në prapaskenë të Ilir Metës dhe Monika Kryemadhit kundër hartimit, miratimit dhe zbatimit të Reformës në Drejtësi. Si një ndër njerëzit më të besuar të çiftit, Baba Taku është në brendësi të mekanizimit korruptim të Metës dhe Kryemadhit për blerjen e votave në të gjitha zgjedhjet, me paratë e vjedhura me anë të tenderave dhe tarifave që duhet të paguanin drejtorët çdo muaj.

Baba Taku është dëshmitar edhe i shantazheve të Ilir Metës dhe Monika Kryemadhit, gjatë qeverisjes me PS, ku bllokonin ligjet në këmbim të interesave dhe dorës së lirë për të vjedhur.