Opinione

Kryetari i grupit parlamentar të PS-së Taulant Balla ka reaguar sot në lidhje me mbylljen e çështjes për kryetarin e PD-së Lulzim Basha, duke deklaruar se vendimi është marrë nga gjyqtarë që nuk kanë kaluar Vetingun dhe që zbatojnë parimin “kap çfarë të kapësh”.

Balla shprehet se “kush mendon se kjo dosje e rëndë me të pandehur kryesor Lulzim Bashën, mund të mbyllet kështu pa u hetuar aspak në themel, pa u marrë në pyetje të gjithë personat e përfshirë, e ka shumë gabim. Kjo nuk është një çështje vetëm e drejtësisë shqiptare. Nxitimi i stimuluar i ndonjë prokurori dhe gjyqtari që nuk e ka kaluar procesin e Vetingut dhe që zbaton parimin “kap çfarë të kapësh”, shfaqi sot këtë teatër të turpshëm për sytë e shqiptarëve dhe jo vetëm”.

Balla shton se “Këshilli i Lartë i Gjyqësorit dhe Këshilli i Lartë i Prokurorisë duhet të hetojnë gabimet procedurale me dashje, që çuan në këtë teatër të turpshëm, ku prokuroria hetoi 2 vite dhe gjykata e mbylli për 2 orë”.

“Apelimi i këtij vendimi absurd dhe rikthimi i çështjes për hetim të plotë duke dhënë edhe garancitë nga Gjykata për marrjen në pyetje të përfituesit të parave Nik Muzin, janë hapat e vetëm për të hedhur dritë e për të bërë drejtësi në këtë dosje të rëndë”, shprehet ai.

/atsh

Zëvendëskryeministri Erion Braçe ka reaguar sot në lidhje me pushimin e çështjes së lobimit në SHBA, për Bashën dhe dy zyrtarë të tjerë të PD-së.

Braçe theksoi se Lulzim Basha është i vetmi politikan që nuk gjykohet kurrë për akuzat dhe kurrë nuk u trajtua i barabartë para ligjit.

“Përsëri nuk u gjykua për dy akuza të ngritura nga prokuroria! Lulzim Basha ishte dhe mbeti i vetmi politikan që nuk gjykohet kurrë për akuzat mbi të! Kurrë nuk është trajtuar si i barabartë para ligjit! Ky vend ka dy standarde: Njëri për qytetarët dhe cilindo tjetër që nuk ka prokurorët e gjykatësit e tij; tjetri për Lulzim Bashën që ka gjithnjë prokurorët, gjykatësit, avokatët e tij, të cilët kanë emëruar prokurorët e gjykatësit që as hetojnë e as gjykojnë veç një politikan – Lulzim Bashën”, tha ai.

“Ky është ende sistemi i vjetër, i padrejtë, i pandershëm, politik e banal që ka ndërtuar Lulzim Basha me ministrin e tij të Drejtësisë. Kësaj radhe është edhe më e qartë, por edhe më e turpshme; një lobist amerikan, në marrëdhënie ligjore e publike me PD, materializuar me firma të tij e të Lulzim Bashës, ka deklaruar në çdo zyre ligjore të SHBA se ka marrë prej PD përmes një kompanie në marrëdhënie me të, 670 000 dollarë. Në zyrat ligjore të Shqipërisë, Lulzim Basha as që i ka deklaruar ato! Pyetja që priste përgjigje nga prokurorë e gjykatës bashkë, mbetet e thjeshtë: Të kujt janë 670 000 dollarët e paguar e të deklaruar në Amerikë? Lobisti në marrëdhënie me PD e Lulzim Bashën, thotë që janë të PD dhe kompanisë që ka vepruar për llogari të saj”, tha ai.

Braçe thekson se sistemi i vjetër i Drejtësisë është në këmbë.

“Lulzim Basha nuk thotë asgjë! Madje nuk thotë as që lobisti i tij gënjen nën betim! Këtë duhet të zbardhte prokuroria e të gjykonte gjykata. Por Lulzim Basha nuk gjykohet kurrë! Ka gjithnjë gjykatësit e prokurorët që i garantojnë imunitet, mungesën e një gjyqi për të! Ky është sistemi i tij, i tyre dhe është ende në këmbë!”, shprehet ai. /atsh

Z/kryeministri Erion Braçe reagoi ndaj deklaratës së kryetarit të PD-së Lulzim Basha, i cili është është shprehur se “qeveria e PD-së do të menaxhojnë fatkeqësitë natyrore”.

Braçe i kujtoi Bashës përmbytjen e Shkodrës 5 herë gjatë qeverisjes nga Partia Demokratike.

“Qeveria ime nuk do jetë e papërgatitur për fatkeqësitë natyrore! Mesia (jo Messi) që ju fanepset shqiptareve nga jashtë shteti, përherë nga jashtë shteti, është Lulzim Basha! Qeveria e tij nuk do jete e papërgatitur! Ky! Këta! Ore vërtetë mendoni ju se keni dalë nga veza tani apo çfarë?! Pa shihi pak fotot t’i i përgatituri përherë; Nuk është Venezia e këtij dimri, por Shkodra e dimrave 2009-të e 2010”, shprehet Braçe.

“Nga dhjetori ne dhjetor, Shkodrën e përmbytet 5 here rresht; E dini përse? Sepse nuk bëni dot llogaritë, mbledhje zbritje, shumëzime etj, me ujin-reshjet, ujin në lumenj, ujin në liqene; Shkurt, ju ngeli rubineti në dorë, ndërkohë portat nuk u mbylleshin. Kaq të përgatitur ishit! Të njëjtët jeni serish! Ti Mesia ministër, ti Mesia kryetar bashkie, ti Mesia kryetar partie!Dhe një gjë, jam i bindur qe ti ja del të ndryshosh bojën e flokut, por jo historinë; Mbajnë mend në këtë vend!”, shprehet ai. /atsh

Ish-anëtari i Këshillit Kombëtar të PD, Edvin Kulluri ka kritikuar opozitën dhe kryedemokratin Lulzim Basha se nuk ofrojnë një alternativë të besueshme për zgjedhësit.

“Rotacion politik do të ketë kur të ketë një alternativë më të mirë. Lulzim Basha nuk ngjall besim për një rotacion politik te shqiptarët. Lul Basha tallet. Çdo 6 muaj bën nga një aventurë. Problemi është që kur kryetari i PD bën takim me degën e PD në Vlorë dhe i vijnë vetëm 120 veta në takim, çfarë duhet të presësh më”, u shpreh Kulluri.

Kulluri u shpreh për Bashën në lidhje me financimin e Partisë Demokratike se, “ai mos të akuzojë Ramën kot, se e di ai shumë mirë për financimin e partive. Nëse do ketë një rotacion nesër unë dua të di nëse do të ndryshojë gjë në modelin e qeverisjes. Një gjë është e sigurt se Basha ka treguar se nuk ka lidhje me krimin. Por ku vjedh zgjedhjet për vete nuk më jep besim se nuk do t’i vjedhë edhe zgjedhjet për qeveri”./atsh