Opinione

Teatri duhej shembur shumë e shumë vite më parë, problemet në godinë që në vitin 1941

Aktualitet, Art-Kulture, Opinione / /

Kryeministri Edi Rama deklaroi sot se Teatri Kombëtar që u shemb nuk mund dhe nuk duhej ruajtur. “Ai duhej shembur shumë e shumë vite më parë”, tha Rama.

Në një intervistë televizive të zhvilluar në ambientet e rikonstruktuara të Teatrit Kombëtar të Operës dhe Baletit, Kryeministri Rama theksoi se “ka një kronologji fantastike që për fat të keq nuk e njeh askush, se të gjithë flasin për monument, kulturë, për identitet, traditë, por nuk dinë historinë sesi ka rrjedhur të asaj godine dhe se sa shumë në shumë vite, qysh prej saktësisht vitit 1941 kur është bërë ekspertiza e parë dhe kur shkruhej ‘nevojiten riparime urgjente për tavanin dhe taracën’, e deri vonë është thënë dhe stërthënë se çfarë dëshpërimi është ajo që s’është më”.

“Në këtë aspekt unë jo nuk jam vetëm, përkundrazi, mbase më qëlloi mua të isha i vetmi ta kaloja këtë det në këmbë. Kjo betejë e nisur prej 21 vitesh për të arritur për ta pastruar atë shesh, ndërkohë që nuk kam thënë do rindërtojmë atë atje, por kam thënë diçka të rëndësishme”, u shpreh ai.

Ndërsa duke folur për TKOB, Rama theksoi se “e vërteta është se këtu ishin mundësitë për ta bërë këtë rindërtim”.

“Është kryer një punë spektakolare e cila është shumë më tepër në pjesën e padukshme se në pjesën e dukshme, sepse kjo sallë ka pasur një problem të madh me akustikën dhe siç e shihni përtej mikrofonave këtu ka një akustikë fantastike, me akusticienë të huaj. Ndërkohë në pjesën e mbrapme ka një skenë super teknologjike, që do të bëjë që qoftë trupat tona, talentet tona që shkëlqejnë nëpër botë kur të ngjiten në këtë skenë të ndjehen si në Tokio, Milano, Paris dhe si në çdo teatër që meriton këtë emër në botën e qytetëruar”, tha Rama.

“Ne nuk e kemi përuruar sallën e Teatrit Kombëtar të Operës dhe Baletit, por thjesht kemi ardhur për të ndarë me publikun frutet e një pune të bukur, e një pune të dhunuar me dhjetëra e dhjetëra vite e një pune që u jep më në fund në historinë e këtij vendi dinjitet njerëzve të skenës dhe dinjitet atyre që vijnë për të shijuar ngjarjet në skenë, gjë që nuk e kanë pasur kurrë as ata që ngjiteshin në skenë, dhe as ata që i ndiqnin në kushtet më mizerabël që turpëronin Shqipërinë qoftë këtu, dhe më keq akoma në godinën e saposhembur më në fund, të atij që u quajt gabimisht Teatri Kombëtar”, – tha Rama. /atsh

Teatri duhej shembur shumë e shumë vite më parë, problemet në godinë që në vitin 1941 Read More »

47 vjet nga revolta e Spaçit/ Basha: Thirrja e parë, Shqipëria do të bëhet si Europa

Aktualitet, Opinione, Politike / /

Kryetari i PD-së, Lulzim Basha ka kujtuar 47-vjetorin e revoltës në burgun e Spaçit, ku thirrja e parë e të burgosurve politik ishte Shqipëria do të bëhet si Europa.

Basha shprehet se “47 vjet më parë, kur diktatura komuniste e kishte zhytur Shqipërinë në izolimin e saj më të madh, një grup të burgosurish politikë ngritën në Spaç flamurin kuqezi, pa yllin komunist, dhe shpallën aty një zonë të lirë nga diktatura. Ato 3 ditë lirie e tronditën nga themelet Sigurimin e Shtetit, aty u thirr për herë të parë me zë të lartë se Shqipëria do të bëhej si Europa”.

“4 heronjtë martirë të Revoltës së Spaçit, Hajro Pashaj, Dervish Bejko, Pal Zefi dhe Skënder Daja, ishin lajmëtarët se shqiptarët asnjëherë s’do të pajtoheshin as me dhunën, as me diktaturën komuniste e as me çfarëdo regjimi që do synonte t’u hiqte atyre lirinë. Në dokumentet e Sigurimit të Shtetit, aty ku raportohet për dhunën çnjerëzore që diktatura përdori për ta shembur rezistencën e të burgosurve politike raportohet me tmerr paralajmërimi profetik që qëndrestarët i bënë zv/ministrit të Brendshëm të diktaturës: “Edhe ju do të përfundoni këtu, sepse është ngushtuar rrethi dhe diktatura po ha bijtë e vet”-tha ai.

Po ashtu, Basha kujton qëndresën 3 ditorë të të burgosurve politikë në revoltën e Spaçit e cila u shtyp me gjak.

“Revolta e Spaçit dhe qëndresa 3-ditore e të burgosurve të Spaçit pati një jehonë të gjerë në të gjithë vendin. Ideja e qëndresës e tmerroi regjimin diktatorial. Për të treguar këtë trashëgimi të qëndresës së shqiptarëve, të cilët nuk e pranuan asnjëherë diktaturën, fiks 11 vjet më vonë, në përvjetorin e Revoltës së Spaçit, ish-të burgosurit politikë u ngritën sërish në revoltë në burgun famëkeq të Qafë-Barit. Të burgosurit politikë po e mposhtnin makinën e regjimit, jo vetëm me qëndresë madhështore, shembull në të gjitha vendet ish-komuniste, por edhe me simbole”-tha ai.

Në vijim Basha kujton dhe revoltën e të burgosurve politik të Qafë-Bari që pasoi atë të Spaçit.

“Qafë-Bari ishte një përkujtim i denjë i revoltës së Spaçit, 11 vjet më pas, dhe që të dyja revoltat janë sot një trashëgimi politike që e gëzon çdo rezistencë qytetare kundër padrejtësisë dhe kundër çfarëdo regjimi që e gënjen mendja se mund t’ju marrë shqiptarëve të drejtat e fituara në Lëvizjen e Dhjetorit ’90. Burrat që kryen revoltat e Spaçit dhe të Qafë-Barit janë një frymëzim se kauzat fitojnë, edhe nëse ato kanë kundër falanga të armatosura. Nga Revolta e Spaçit vjen edhe paralajmërimi profetik se askush s’duhet të qëndrojë mënjanë, kur atdheu përballet me sfida të mëdha, sepse mekanizmi keqbërës i diktaturës herët a vonë do të mbërrijë edhe tek ata”, tha Basha.

Gjithashtu Basha shtoi se “nga revoltat e Spaçit dhe të Qafë-Barit ne trashëgojmë shembullin e atdhedashurisë. Duke nderuar kujtimin e martirëve të Spaçit dhe Qafë-Barit, shqiptarët nderojnë sot historinë e tyre të lavdishme të qëndresës ndaj diktaturës dhe rinovojnë angazhimin për të mos iu shmangur përgjegjësisë kombëtare që kanë, për ta shkëputur përfundimisht vendin nga kthetrat e diktaturës së hajdutëve dhe kriminelëve dhe për ta rikthyer atje ku i takon, në gjirin e Perëndimit”./atsh

47 vjet nga revolta e Spaçit/ Basha: Thirrja e parë, Shqipëria do të bëhet si Europa Read More »

“Kur Kadri Roshi e Naim Frashëri këmbëngulnin për teatër”/Regjisori Basha për ATSH: Teatri i ri do adresojë të gjitha nevojat e artistëve

Aktualitet, Art-Kulture, Opinione / /

“Teatri i ri Kombëtar që pritet të ndërtohet nga Bashkia e Tiranës, do të adresojë të gjitha nevojat e komunitetit të artistëve për të ardhmen e teatrit në Shqipëri, pasi teatri i vjetër nuk plotësonte asnjë rekuizitë për t’u cilësuar si një i tillë”.

Në një intervistë për Agjencinë Telegrafike Shqiptare (ATSH), regjisori i njohur Altin Basha, deklaron se Teatri Kombëtar asnjëherë nuk është konceptuar si i tillë.

Sipas tij, ai është nisur si një teatër provizor, por kurrë nuk mori trajtën e plotë të një Teatri Kombëtar me të gjitha rekuizitet që i nevojiten një skene teatrore.

“Siç është dhe tashmë e njohur, janë bërë disa takime publike dhe analiza për gjendjen e Teatrit Kombëtar. Pas analizave doli që gjendja e tij ishte plotësisht e amortizuar. Ambientet ishin krejtësisht problematike nga pikëpamja e konstruksionit, e gjendjes së tyre teknike, masave kundër zjarrit etj. etj., dhe për këtë arsye u sugjerua mbyllja e aktivitetit të Teatrit Kombëtar”, shprehet regjisori Basha për ATSH.

“Një analizë e hollësishme e asaj se çfarë humbim nëse e shohim ndërtesën dhe çfarë fitojmë ne me përkrahjen ndërtimit të Teatrit të ri Kombëtar, duhet të shohim historinë e teatrit. Prej se është themeluar teatri profesionist në Shqipëri, rezidenca e përkohshme në teatrin popullore, në kinoteatrin, siç edhe cilësohej… ka qenë e përkohshme dhe është diskutuar se me kalimin e kohës, në një moment të caktuar, në një moment të dytë, do të ndërtohej një teatër i plotë popullor sepse atëherë, në ato vite, deri në vitin 91’ nuk ekzistonte nocioni kombëtar. Pra, kemi 70 vite që e kemi këtë debat. Në vitet 50’-60’ është bërë edhe më i fortë ky debat pasi aktorët e asaj kohë, Kadri Roshi dhe Naim Frashëri kanë këmbëngulur pranë qeverisë për nevojën e një teatri të ri, pasi ai teatër nuk përmbushte as kërkesat e kohës dhe nuk ishte konceptuar si teatër”,- tha Basha në intervistën për ATSH.

“Por asnjëherë nuk u bë një teatër i ri teksa në vitet ’70 u bë një ndërhyrje në strukturën e tij për të zmadhuar oxhakun, skenën dhe disa elementë të tjerë që mungonin, u mbyll kati i tretë, që u bë garderobë…etj. Por dhe ato të pamjaftueshme pasi me kalimin e viteve u kuptua se adoptimi i vazhdueshëm nuk përmirësonte përfundimisht gjendjen e tij pasi mbetej gjithnjë një ndërtesë hibride mes kinemasë dhe teatrit”,- vijon regjisori Basha.

“Në kushtet kur ndërtesa sugjerohej si e papërdorshme dhe i vetmi opsion ishte rikonstruksioni i saj përmes shembjes, normalisht të shkon mëndja që teatri do të ndërtohej po aty. Por ajo ndërtesë që ishte, nuk vlente më. Nëse mund të ruhej ose jo, kjo është çështje ekspertëve. Ka ekspertë që thonë se duhet ruajtur, ka që thonë jo, por të gjithë bien dakord se ndërtesa duhej shembur dhe opsioni i teatri të ri për mua ishte më i vlefshëm pasi adreson të gjitha problematikat. Gjendja ishte tejet e rënduar. Ishte krejtësisht jashtë kontrollit. Krejtësisht pa kujdes dhe gjendja e tij u përkeqësua edhe më shumë. Në vitin 2008 ka qenë dora e fundit që i është dhënë dhe prej asaj kohe nuk është ndërhyrë. Njerëzit që kanë punuar në atë godinë e dinë se problem më i madh ishin facilitetet skenike që ishin të amortizuara dhe të improvizuara. Nuk kishte infrastrukturë dhe funksionalitetin e një teatri”,- deklaron Basha në intervistën për ATSH.

“Ndërhyrjet ishin bërë për ta sjell në atë gjendje, por pa vizionin për ta zgjidhur përfundimisht problematikën me një vizion të qartë, por vetëm për të shtyrë kohën pa e marrë asnjëherë seriozisht ndërtimin e plotë të Teatrit Kombëtar. Ajo nuk kishte mundësi për garderobën, e nuk flas për garderobën e spektatorit, por vendet ku prodhohet dhe ruhet garderoba e shfaqjeve apo kabina e fonisë apo dhoma e grimit e improvizuar. Salla e dekoreve..etj. Pra ishte një ndërtesë me mbivendosje të improvizuara. Teatri adreson të gjitha këto probleme dhe e përmbyll krejtësisht atë që mund të quhet nevojë teatrore për të ardhmen e Teatrit Kombëtar të Shqipërisë”, deklaroi regjisori i njohur Altin Basha në intervistën për ATSH. /atsh

“Kur Kadri Roshi e Naim Frashëri këmbëngulnin për teatër”/Regjisori Basha për ATSH: Teatri i ri do adresojë të gjitha nevojat e artistëve Read More »

Çun Lajçi, Ramës: Duaje e respektoje popullin, le t’protestojnë, e mos ua thyej brinjtë

Aktualitet, Opinione / /

Artisti i njohur Çun Lajçi ka qenë pro shembjes së Teatrit Kombëtar dhe pret nga qeveria e Edi Ramës që të ndërtohet një teatër bashkëkohor.

Menjëherë, pasi u shemb Teatri Kombëtar, Lajçi deklaroi se Shqipërisë i dihet një teatri i ri dhe se godina e re do të jetë shumë herë më e mirë nga ajo ekzistuesja, ku sipas tij nuk plotësonte as kushtet minimale. Madje Lajçi në një shkrim me titull “Për çka po protestoni, se po dukeni vërtet qesharakë?!..”, iu bëri thirrje artistëve dhe protestuesve që të ndalen, pasi është edhe turp që po politizohet kjo çështje.
“Teatri na duhet, e teatri besoj se do t’bahet, mija herë ma i mirë se ç’ishte.

Edi asht i çmendun, por çmenduria e tij, ndoshta do t’nae sjell edhe nji teatër si ate të Shkupit! Duhet pritë e duhet pa!”, u shpreh ndër të tjera ai.

Së fundmi, aktori ka bërë një reagim ndaj kryeministrit Edi Rama, pasi ky i fundit shpërndau një nga shkrimet e tij për teatrin. Arstisti i bën thirrje Ramës që të dojë dhe respektojë popullin e tij. Ai shprehet se qytetarët kanë të drejtë të protestojë dhe se shteti nuk duhet t’ua thyejë brinjtët apo t’i plaçkitë.

“Z.Edi Rama, Meqense ma rrite rytben tue ma përmend emnin, për njat letër qê e shkrova, për Teatrin Kombëtar, tue pasë qëllimin, që t’mos politizohet arti e artistët, tani du me t’thanë, m’harro mua, ashtu siç m’ka harrua miku yt Hashimi, dhe ndëgjoma fjalën, se pa pare e ke! – Duaje e respektoje popullin, le t’protestojnë, e mos ua thyej brinjtë. Mos i plaçkit, se boll ke ba, e rueju se zullumi gjithmonë asht këputë prej s’trashi! Besom se boll kanë vjedhë edhe miqtë tu, këtu n’Dardani, e s’u dihet si ka me u ardhë fundi! – Mos e duej Çunin, lum zotnia, se nuk ka mbret qe e lidhë kaçakun, e unë nuk e dua as shterpë as me dy edha. Dardani, 20.05.2020″, shprehet ai.

Kreu i qeverisë, Edi Rama teksa shpërndau shkrimin e Lajçit, theksoi se bashkë me të do hapin dyert e teatrit të ri, i cili do të hyjë në listën e teatrove më të bukur europianë të ndërtuar në kohët moderne.

Ditën e djeshme u zhvillua një tjetër protestë për shembjen e Teatrit Kombëtar. Protesta zgjati dy orë dhe përfundoi pa incidente. Prezentë ishin aktorë, aktivistë, Opozitarë, të cilët firmosën peticionin dhe kërkuar rindërtimin e godinës në të njëjtin vend e mënyrë.

Çun Lajçi, Ramës: Duaje e respektoje popullin, le t’protestojnë, e mos ua thyej brinjtë Read More »

Protesta, mjeku Ulqini: Thyerje e të gjithë protokolleve, të shpresojmë të mos reflektohet në shifra të prekurish

Aktualitet, Opinione, Problematika / /

Mjeku Dritan Ulqinaku deklaroi mbrëmjen e sotme në një nga mediet e vendet se 15 raste në ditë në aspektin e transmetimit të COVID-19 nuk janë shqetësuese.

“15 raste në aspektin e transmetimit të kësaj sëmundjeje nuk është absolutisht asgjë. Për hir të së vërtetës ne prisnim një numër ndoshta dy-tre herë më të madh, që prapë nuk do të ishte problem, sepse virulenca duket sikur ka rënë e këtij virusi. Këtë e tregon edhe shtrimi në spital. Pothuajse nuk po shtrohen më njerëzit e infektuar në spital me COVID-19. Pra, ne ishim përgatitur për një numër 2-3 herë më të madh dhe ky numër është mëse i zakonshëm. Do të ishte shumë më mirë që të mos kishim asnjë rast për 2 javë por është shumë e vështirë të arrihet, shpresojmë të arrihet por prapë nuk janë shifra për t’u alarmuar”, u shpreh ai.

Ai argumentoi se kurba në Shqipëri nuk është një kurbë klasike ndërsa numri i vatrave të infeksionit është normal.

“Nuk kemi të bëjmë një kurbë klasike. Kemi të bëjmë me një minimum të mundshëm dhe ky minimum mbahet gjallë tek-tuk nga vatra të vogla që mund të jenë fasoneri ose vatra familjare. Pra një person që është i infektuar dhe nuk ka dijeni që është i infektuar mund të infektojë shumë lehtë në momentin e mungesës së masave të kontrollit dhe distancimit fizik, 2-3 shoqe, 4 shoqe të cilat janë duke ngrënë drekë së bashku ose ulen në një cep pas pune, ose në një familje. Janë mëse të pranueshme 2 vatra në ditë, nuk janë asgjë”, tha ai.

Lidhur me protestat e zhvilluara në bulevard, mjeku tha se “është thyerje e të gjithë protokolleve të mundshëm”.

“Personalisht me vjen turp që unë vazhdoj të komentoj masat anticovid, jo vetëm unë, por të gjithë kolegët e mi. Nuk ka asnjë lloj protokolli që mund të përshkruajë një situatë të tillë, flas gjithmonë në aspektin shëndetësor, – ndërsa shtoi se, – mund të ndodhë që pas një jave të flasim me shifra mbi 3-shifrore, pra mbi 100 në ditë. Të shpresojmë që të mos ndodhë por është thyerje e të gjitha protokolleve. Unë nuk di një vend të botës që janë bërë manifestime, janë bërë manifestime por kanë ruajtur distancën 1 metër e gjysmë minimumi, në vende të tjera 4 metra”./atsh

Protesta, mjeku Ulqini: Thyerje e të gjithë protokolleve, të shpresojmë të mos reflektohet në shifra të prekurish Read More »

Aktori Vasili: Teatri i ri do të triumfojë, u humbën 2 vjet e gjysmë nga një grupim njerëzish të nxitur politikisht

Aktualitet, Opinione / /

“Janë humbur dy vjet e gjysmë me zaptimin e tokës publike nga një grup njerëzish, të cilët siç e treguan ngjarjet e fundit janë totalisht të ndikuar dhe të nxitur nga parti të caktuara politike”, deklaroi sot aktori i njohur, Laert Vasili në një intervistë për Agjencinë Telegrafike Shqiptare.

Vasili u shpreh se, “gjendja e godinës së Teatrit Kombëtar ishte e turpshme”.

Ai tha për ATSH se “artistët këto vite ishin lënë në mëshirën e fatit për të luajtur në kushte jashtëzakonisht të këqija, jo vetëm sa i takon anës teknike, por edhe anës së shëndetit”.

Vasili tha më tej se, “një nga arsyet që privati u tërhoq dhe tashmë godinën e re të Teatrit Kombëtar do e marrë përsipër shteti ishte sepse nga artistët u kërkuan të gjitha parametrat e një skene të Teatrit Kombëtar bashkëkohor me të gjitha lehtësirat dhe ambientet mbështetëse që nevojiten për të krijuar një spektakël, ashtu siç e kërkojnë nevojat bashkëkohore. Kjo bëri që privati të tërhiqej, sepse u rrit shumë niveli i kërkesës”.

Duke vënë dukje se “po presim me padurim Teatrin e ri Kombëtar”, aktori Vasili thotë për ATSH se “e ashtuquajtura “Aleancë e rehatit”, se për mbrojtjen e Teatrit s’ishte, ishte aty për të zaptuar një godinë publike. Një përçudnim i godinës dhe i kujtimeve të atyre njerëzve që mbushën shpirtin e qytetarëve me ndjesi gjithë këto vite erdhi një grupim i cili prej kaq kohësh na pengonte duke na kërcënuar dhe shpesh herë kemi kaluar dhe në dhunë fizike, kushdo që shkonte në godinën e Teatrit Kombëtar për të marrë garderobë, objekte skenike, rekuizitë apo çfarëdo gjëje tjetër që është e nevojshme për një shfaqje teatrale. E ashtuquajtura “Aleancë” nuk lejonte asnjë. Dhe kjo u kuptua më së miri këto ditë se nuk kishte të bënte fare me teatrin, por ishte e nxitur nga parti politike”, tha për ATSH, aktori dhe regjisori i njohur.

Vasili deklaron se “nuk njoh asnjë artist që është kundër teatrit të ri. 99% e komunitetit artistik nuk do të ndërtojë teatër të ri sepse një nuk dashka? Demokracia funksionon nëpërmjet shumicës”.

“Anarkia dhe unë ngre bajrakun tim, funksionon sipas “ç’më duhet mua se ç’bëj unë”, thotë Shvejku tek “Ushtari i mirë Shvejk”. Me këtë logjikë se ç’më duhet mua se ç’bëj unë teatri, aktorët kanë humbur 2 vjet e gjysmë që nga kjo fazë, kur u ezaurua me 12 takime ku përgatitej gjithçka, por ai grupim që sot quhet “Trahanaja e rehatit”, që në takimin e parë iu kapën mesazhet dhe dolën online nga të tjerë, nga anëtarët e Këshillave Kombëtare të partive të ashtuquajtura opozitë. U vinin mesazhe ku u thuhej bëni zhurmë, bëni sherr, mos lini njeri të flasë. Këto mesazhe kanë dalë online. Që në mbledhjen e parë që është bërë këtu e 2 vjet, tryeza e rrumbullakët nga ministrja e atëhershme e Kulturës, Mirela Kumbaro dhe kryetari i bashkisë, Erion Veliaj”, tha Vasili për ATSH.

Pra, shtoi Vasili, “që në zanafillën e kësaj çështjeje ai grupim ka treguar që ditën e parë që është forcë regresive dhe nuk ka fare ndonjë shqetësim për Teatrin dhe e vetmja gjë që po pret është ndoshta përmbyset qielli me tokën dhe kap ndonjë kockë. Por qielli do të qëndrojë gjithmonë lart dhe toka do të qëndrojë gjithmonë poshtë. Dhe Teatri prandaj do të triumfojë sepse është një art hyjnor. Të tjerët që kanë marrë ndoshta premtime nga kolltukofagët e politikës do të zhgënjehen siç u zhgënjyen me çfarë ndodhi ditët e fundit”. //atsh

Aktori Vasili: Teatri i ri do të triumfojë, u humbën 2 vjet e gjysmë nga një grupim njerëzish të nxitur politikisht Read More »

Mjeku Kalo krah Ndrenikës: Me shëmbien e teatrit ra edhe “perdja e teatrit politik” për mbrojtjen e tij si gjoja “vija e kuqe”

Opinione / /

Mjeku i njohur infeksionist, Tritan Kalo, ka deklaruar se me rënien e Teatrit Kombëtar ra edhe “perdja e teatrit politik” e disa partive politike.
Në një reagim Kalo i cili ka publikuar edhe një fotografi me aktorin e madh Robert Ndrenika, thekson se “mjekët janë shumë të lidhur shpirtërisht me artin dhe artistët”.
“Mantelbardhët janë të lidhur shpirtërisht dhe mjaft të ndjeshëm për artin skenik e atë figurativ, si dhe miq të përkorë me artistët e piktorët…Janë të lidhur shumë dhe “konsumatorë” të uritur të letërsisë e shkruesve të saj…Muzika ishte është dhe mbetet një ushqim i përjetshëm, i shpirtit të tyre mjaft të ndjeshëm dhe human….Teatri si ngrehinë u shemb më 17 Maj 2020 pavarësisht përpjekjeve pa fund përmbi 2.5 vjeçare të Aleancës për Mbrojtjen e Teatrin për ruajtjen e tij…..Kjo datë shënoi njëkohësisht edhe “rënien e perdes së teatrit POLITIK” nga disa parti politike për mbrojtjen e tij, si gjoja “vija e kuqe” e fundit e Demon-kracisë”.
“Një datë e tillë nuk ndikoi aspak dhe nuk e cënoi miqësinë time mbi 40 vjeçare me kolosin e Teatrit dhe të Kinematografisë Shqiptare, Artistin e Popullit Robert Ndrenika, përkundrazi….kurrë të mos heqim nga mendja se miqësitë pa interesa meskine partiake, bazuar vetëm në ndjesitë shpirtërore dhe në respektin reciprok, u rezistojnë gjithmonë kohërave dhe lëkundjeve të këtyre interesave”, shprehet Kalo./atsh

Mjeku Kalo krah Ndrenikës: Me shëmbien e teatrit ra edhe “perdja e teatrit politik” për mbrojtjen e tij si gjoja “vija e kuqe” Read More »

Meta: Të lirohen të arrestuarit e protestës

Aktualitet, Opinione, Politike / /

Presidenti i Republikës, Ilir Meta ka kërkuar sot që të lirohen të arrestuarit e protestës për prishjen e Teatrit Kombëtar.

“Të gjitha arrestimet, ndalimet dhe procedimet për mbrojtjen paqësore të teatrit kombëtar janë vetëm politike”, është shprehur presidenti Meta.

Kreu i Shtetit ka theksuar se, “vetë operacioni për shembjen e tij ishte kryevepra e asgjësimit përfundimtar të çdo iluzioni për ekzistencën e shtetit të së drejtës në Shqipëri”.

“Lironi të burgosurit politikë në Shqipërinë e 2020!”, ka theksuar presidenti Meta./atsh

Meta: Të lirohen të arrestuarit e protestës Read More »