Gjatë fjalës së tij për zgjedhjet e ardhshme, kryeminstri Edi Rama i quajti kundërshtarët politikë “humbës kronikë”.
Pas kësaj deklarate ka reaguar kryetarja e LSI, Monika Kryemadhi. Përmes një postimi në rrjetet sociale, ku ka shpërndarë foto me të rinjtë e partisë që drejton, ajo thotë se:
“Kryeministri i dështuar refuzon të shohë alternativën më të mirë. Këta të rinj dhe të reja janë gjenerata tjetër e udhëheqësve të Shqipërisë. Është koha për të ecur drejt Evropës.”
Rama sot kërkoi nga Elbasani një mandat të tretë qytetarëve, ndërsa tha se shqiptarët nuk kanë alternativë më të mirë se ai.
Ish-deputeti i PD-së, Edi Paloka ka reaguar pas fjalimit të Kryeministrit Rama në Elbasan i cili kërkoi mandat të tretë qeverisës.
“Filloi xhaja të zbulojë armiq të brendshem madje dhe të padukshem…
Këto janë shenjat kur fillon e te kap plakja keq, fillon dhe gjen armiq të padukshëm edhe brenda stanit që ke zgjedhur vetë.
Ka filluar të rrjedhë nga pleqëria, se nuk besoj se dikush ja ka mbush mendjen se me këtë stil demode mund të frymëzojë ndokënd… veç Taulantit dhe shokëve të tij të Toyta Yaris”, shkruan Paloka në Facebook.
Më herët edhe kreu i Qeverisë thumboi demokratët duke thënë se janë humbës kronikë.
Ish-kreu i Aleancës Kuq e Zi, Kreshnik Spahiu ka dalë me një reagim të fortë në rrjetet sociale, nisur nga çështja e ‘nxehtë’ e pretendimeve të Greqisë për t’u zgjeruar me 12 milje në detin Jon.
Spahiu shkruan se s’ka tradhti më të madhe sesa të shkatërrosh ushtrinë e vendit tënd. Madje iu drejtohet politikanëve shqiptarë me ironi duke iu thënë që të dalin ta mbrojnë kufirin detar me makinat e blinduara të tyret apo me vilat me pishina, pasi ushtria jonë nuk ka asnjë anije ushtarake, nëndetëse apo avion.
“Mision të vështirë ke marrë”, ish-ministri socialist i drejtohet Ramës për çështjen e ‘nxehtë’ të detit me Greqinë dhe nuk i lë gjë pa thënë: Po del kundër interesave kombëtare!
“S’ka tradhti më të madhe, se të shkatërrosh ushtrinë e atdheut tënd! 30 vjet shtet: Saliu-Rama-Meta s’kanë asnjë anije ushtarake. Zero anije, zeron avion, zero nëndetëse! Këta palaço e kanë lënë ushtrinë shqiptare më keq se Enver Hoxha. Saliu ka shitur për skrap në Beograd avionët MIG. Dil mbrojeni kufirin detar me Mercedesat e blinduar ose me vilat me pishina të kryetarëve të partive nëse futet flota greke”, shkruan Spahiu.
Koloneli i njohur Myslim Pashaj, që denoncoi marrëveshjen e ndarjes së kufirit detar Shqipëri-Greqi në vitin 2009, e cila më pas u rrëzua nga Gjykata Kushtetuese, ka reaguar për debatin e nisur në ditët e fundit në lidhje ambicien greke për t’u zgjeruar me 12 milje në detin Jon.
Në një prononcim për News 24, Pasha thotë se se drejta ndërkombëtare i jep të drejtë të dyja vendeve për t’u zgjeruar me 12 milje, por shton se pa marrëveshje me Shqipërinë, Greqia nuk mund të aplikojë për zgjerim në det.
REAGIMI I PLOTE PER NEWS 24
Në këto ditë të shqetësuara dhe me ndjeshmëri të lartë të opinionit shqiptar dhe atij grek nga ana e Republikës së Shqipërisë, vihet re vetëpërmbajtje në trajtimin parimor të së Drejtës Detare Ndërkombetare për zgjerimin e Greqisë nga 6 milje detare në 12 milje.
Pra Greqisë dhe Shqipërisë sipas kësaj të drejte i takojnë të dyve që të shtrihen në detin Territorial në 12 milje detare.
Por për kushet speciale, gjeografike, historike në rastin e Shqipërisë dhe Greqisë përbëjnë veçori, të cilat nuk lejojnë që automatikisht të aplikosh këtë zgjerim në ujrave territoriale, pa negociatë dhe pa një marrëveshje.
Pse ndodh kjo pengesë?
Sepse në shtrirjen ekstremale veriperendimore, në Ngushticën e Otrantos dhe vijimit të Kanalit të Korfuzit, Republika e Greqisë përfaqësohet me bashkësi ishullore të Korfuzit, ku ishulli Othonoi dhe Erikuza ndodhen përballë Dheut Kontinental të Republikës së Shqipërisë.
Kështu, është e nevojshme që sipas këtyre veçorive (ishujt) të negociohet për metodën e ndarjes. Në vitin 2009, Greqia diktoi në Marrëveshjen e delimitimit, duke përdorur ” Metodën e Vijës së Mesit, të baraslarguar nga dy brigjet” e cila çoi në humbjen e madhe të Republikës së Shqipërisë.
Po kjo marrëveshje u hodh poshtë nga Gjykata Kushtetuese e Shqipërisë.
Në vitin 2009, Greqia u zgjerua automatikisht në mënyrë të padrejtë, nga 6 milje Detare në 12 milje detare, por me marrëveshje.
E Drejta Detare Ndërkombëtare në gjithë praktikën e saj, rastin e veçorive speciale, gjeografike, të parashikuara në nenin XV të Konventës se Montego- Bay e lidh me parimin ”Equitable Solution = Zgjidhje e drejtë dhe e ndershme” çka lidhet me faktorët gjeografikë specialë dhe historikë. Kjo nxjerr në pah”efektin e ishujve”, pra a do ta marrë ishulli Othonoi të drejtën e plotë që të zgjerohet në 12 milje detare në Detin Territorial, apo do të marrë, 6 milje, 8 milje?
E njëjta gjë edhe për ishullin Erikuza.
Vendimi i Gjykatës Kushtetuese të Shqipërisë është i pakapërcyeshëm.
Kjo Gjykatë ka hedhur poshtë përfitimin 12 miljeve detare me efekt të plotë të ishujve dhe cekinave shkëmbore.
Pranimin e zgjerimit të 12 miljeve, e shikojmë si një pranim parimor, por se sa i takon, këtë e vendos negociata e të dy vendeve, në bazë të së Drejtës Detare Ndërkombëtare, çka është e domosdoshme.
Mirpo vini re, në këto momente se ç’ndodh me qëndrimin e Republikës së Greqisë, ndaj Republikës së Shqipërisë?
Një ndër aktet e para të deklarimtit edhe para Sekretarit Stotlenberg ishte botimi i hartës së zgjerimit të Greqisë në 12 milje detare në krahun Perëmdimor ku hapësira detare është e gjerë, deri në veri të ishullit Othonoi. Akti i dytë bashkëngjitës është botimi i hartës së Korfuzit dhe arkipelagut që ndodhet përballë Shqipërisë ku janë përvijuar kufijtë detarë midis të dy vendeve, kur dihet se ata nuk ekzistojnë dhe se janë përmbysur nga Gjykata Kushtetuese e Shqipërisë!
Qeveria Greke, drejtpërsëdrejti nuk e ka mbajtur të fshehtë qëllimin e saj, se pas të Drejtës Ndërkombëtare Detare të kalimit nga 6 md në 12 md, ka përfshirë në të njëjtin dokument hartografik edhe delimitimin njëanshëm të vijës kufitare detare të Detit Territorial të Shqipërisë në 112 km gjatësi, nga mesi i Ngushticës së Otrantos deri në gjrin e Ftelias, në puqje me Piramidën tokësore nr 49.
Këto ditë keni parë, këtë hartë, e cila bart brenda saj, me simbole të qarta hartografike, projektin e ndarjes së detit në Kanalin e Korfuzit, që është hapësirë e Detit Territorial të të dy vendeve.
Aty përvijohet qëllimi për projektin e nesërm të zbatimit të diktatit ”duke e ndarë detin me mënyrën e vijës së mesit, baraslarguar nga brigjet”, e aplikuar në vitin 2009 në Paktin Detar, tanimë të përmbysur.
Nga opinioni i gjerë shqiptar kjo hartë është parë pa vëmendje për ta lexuar dhe interpretuar se ç’përfaqëson ajo vijë!
Kjo është vizatuar dhe përtërirë pa dijeninë e Republikës së Shqipërisë.
Ndiqni me vëmendje, hartën e Arkiplagut të Korfuzit!
Në krahun perëndimor dallohen hapësirat e Detit Territorial të zgjeruar nga 6 md në 12 md e përvijuar me pika të bardha deri në përfshirje të Othonoit dhe në veri të ishullit Erikuza.
Vija ndarëse e mëtejshme është me pika të kuqe e cila përshkon gjithë Kanalin e Korfuzit deri në Gjirin e Ftelias, tek piramida 49.
E gjitha kjo vijë është “toidhio” si ajo e vitit 2009!
Greqia fqinjë realizon objektivët e saj strategjikë.
Avokat Spartak Ngjela ka reaguar sërish për pretendimet e Greqisë për t’u zgjeruar me 12 milje në detin Jon.
Teksa shkruan se presidenti Turk deklaroi dje se do të dërgojë luftanijet turke në Vlorë e Sarandë, Ngjela sulmon kryeministrin Rama.
“Presidenti i Turqisë, Erdogan deklaroi dje se:
Luftanijet Turke do shkojnë në Vlorë dhe në Sarandë të mbrojnë detin e Shqipërisë që kërkon të pushtohet nga Greqia. Kurse, kryeministri i Shqipërisë iu thotë shqiptarëve se Greqia ka të drejtë të marrë 12 km det.
E kuptoni se kush po e drejton Shqipërinë?
Po, pas kësaj; akoma do të rrijë kryeministër i Shqipërisë ky bakall i pacipë?”, shkruan Ngjela.
Kryetarja e LSI-së Monika Kryemadhi, ka zgjedhur një mënyrë jo të zakontë, për të reaguar në lidhje me projektligjin që po përgatit Greqia për të zgjeruar ujërat territoriale në Detin Jon nga gjashtë në 12 milje detare.
Kryemadhi, ka publikuar një video në mediat sociale, teksa shfaqet duke lundruar me kanoe në detin Jon, ndërkohë që po dëgjon dhe këngën “Desperado”, i ka drejtuar edhe një mesazh kryeministrit Edi Rama.
“Ti i dëshpëruar detin e shqiptarëve nuk e fal dot!”-shkruan Kryemadhi teksa shfaqet duke lundruar, në ujërat e kristalta të detit Jon.
Lëvizja Soclaisite për Integrim e akuzon për tradhëti ndaj shqiptarëve Kryeministrin Rama në lidhje me çështjen e detit me Greqinë.
Në një reagim na Facebook, Petrit Vasili shkruan se Kryeministri Rama po përpiqet të justifikojë atë që duartrokitet nga mediat greke
“Rama tradhëtari pa atdhe, që po duatrokitet në Greqi! Edi Rama është sot nën akuzën e tradhëtisë së lartë nga shqiptarët!
Ai po përpëlitet shëmtueshëm, i përdhosur dhe turpërisht duke kërkuar që të justifikojë tradhëtinë e tij.
Greqia po e duatroket këtë se i intereson, shihni mediat me te medha greke”, shkruan Vasili.
Dhe në këto pretendime, Vasili thotë se ka disa pyetje për Ramën.
Përse përballë një çështje kombëtare të tillë si kjo e Kufirit Detar grupi negociator i Shqipërisë qenka i paplotësuar dhe vazhdon si i tillë? Cili interes i huaj dhe privat ja mban dorën tradhëtarit, që e pengon ta plotësojë grupin negociator? Po si mundet tradhëtari të justifikojë, që përballë një Greqie shumë të përgatitur dhe me nivel të lartë ekspertësh, Rama vendos një grup ekspertësh copë copë, te paplotësuar dhe me një udheheqje politike zero? Në funksion të cilit interes Qeveria dhe Grupi negociator për dy vjet rresht u ngroh në diell dhe s’bëri asgjë, ndërkohë, që pala greke punon e bën gjithçka për të marrë detin? Përse tradhetari nuk informon shqiptarët, të cilëve informacionet në çdo rast për Kufirin për detin u vijnë nga Greqia. Kush ja mban tradhëtarit dorën të kërkojë ekspertizën më të mirë ndërkombëtare dhe ta paguajë siç paguan koncensionet e tij hajdute? Si shpjegohet që Greqia është gjithmonë shumë e kënaqur nga qëndrimet e tradhëtarit, në një kohë që dihet botërisht se interesat e Shqipërisë cenohen? Përse tradhëtari nuk ka bërë e bën asnjë veprim për t’i dalë përpara logjikës së faktit të kryer të palës greke? Meqenëse tradhëtari i përmend vetë, përse nuk informon shqiptarët se çfarë bashkëpunimi ka pasur, në e ka pasur, me Presidentin dhe Parlamentin për këtë çështje kombëtare? Çfarë komunikimi ka pasur tradhëtari me institucionet ndërkombëtare, nëse ka pasur, për të ngritur shqetësimet për kufirin detar e për të kërkuar mbështetjen e tyre profesionale dhe politike? Përse tradhëtari nuk bën publike se çfarë marrëveshje kishte bërë dhe ishte thuajse gati të firmoste me Qeverinë greke të Tsipras?
Vasili i kërkon Ramës të përgjigjet për të gjitha këto pyetje.
“Shqipërisë detin nuk ja merr dot kush se ka zot, por tradhëtari do të paguajë për gjithçka bëri dhe bën për të shitur detin e Shqipërisë dhe kufijtë e Kosovës. /k.k/noa.al/
Akademiku Artan Fuga e ka cilësuar si shqetësuese për Shqipërinë faktin që Greqia po zgjerohet me 12 milje në detin Jon.
Fuga në një shënim të tijin në Facebook, shkruan se forcimi i komshiut është dobësimi jot, dhe pavarësisht kushteve që ndodh zgjerimi detar i Greqisë, nuk e bën Shqipërinë të thotë s’ka problem.
Sipas Fugës, raporte të reja do të vendosen mes Greqisë e Shqipërisë në rast zgjerimi edhe nëse nuk preket territor.
Po ashtu Fuga kritikon qeverinë që nuk ka një program rritjeje në det duke mos ia ditur vlerën territorit të saj.
STATUSI NGA ARTAN FUGA:
A mundet “rritja” e Greqisë, të jetë “zvoglim” i Shqipërisë?
Shënim
Menjëherë pas kryeministri grek bëri lajmërimin në Parlamentin e shtetit fqinj se Greqia do ta çojë hapësirën e vet ujore në 12 milje, te ne nisën debatet shpesh të hidhura, por edhe në formën e frazave goditëse të ndërsjella midis politikanëve nga të cilat qytetari qendron i hutuar, i habitur, dhe nuk kupton asgjë!
Ka edhe nga ata zemërgjerë, hyjnorë, ëngjëllorë që nuk mungojnë të shkruajnë në media duke u tallur me shqetësimin qytetar, për ta quajtur këtë thjesht një alarm i kotë, me qëllime politike ose për t’u evidentuar. Megjithatë problemi mbetet në rend të ditës dhe shumë serioz.
Pikëpyetjet shumë të mëdha, kurioziteti po ashtu, shqetësimi atdhetar dhe pragmatik është për t’u përgëzuar. Sigurisht unë nuk jam asapk specialist i gjeopolitikës as i hartave dhe as edhe i teknologjive GPS, për të hyrë në detajet e çështjes apo në klauzolat e konventave ndërkombëtare. Megjithëse si cdo qenie racionale, homo sapiens, jam në gjendje t’i kuptoj edhe shpjegimet e specialistëve për konventat edhe hartat e paraqitura. Mirëpo, para se të jetë një çështje teknike, kemi një çështje politike mes dy vendeve, një çështje diplomatike dhe një çështje komunikimi ndërkombëtar.
Imagjinoj në ëndërr sikur nga pesëdhjetë a gjashtëdhjetë deputetë nga ata të listave që janë në Kuvendin e Shqipërisë, të ngriheshin në këmbë dhe të duartorkisnin një fjalim patetik rreth sloganit : Shqipëria po rritet! Do t’u kisha hequr kapelen dhe do të kisha lënë lotë të më rridhnin në faqe. Dhe nëse Kosova, Maqedonia e Veriut, Italia, Greqia, do të dridheshin nga frika nga ato çaste solemne, ndonjeri nga deputetët do të sqaronte: Mos kini frikë fqinjë të dashur sepse Shqipëria do të rritet vertikalisht, pa u cënuar juve asnjë centimetër të territorit. Do të çpojë më thellë galeritë e minierave nëntokë si edhe do të lëshojë një sondë në galaktikat e ariut të murmë, për të vendosur në yjet e atjeshëm sonda observimi të hapësirës!
Pasi u zgjova nga kjo ëndërr, mendova me një lloj simpatie për fjalimin e z. Kryeministër të vendit fqinj kur e pashë dhe dëgjova te shprehej solmenisht nën duartrokitjet e deputetëve të krahut të tij, se Greqia po rritet, dhe se kjo është realizimi i projekteve sikurse e kuptova të një lloj të kaluare që m’u duk sikur simbolizonte traditën! Një shtet dhe një komb që kërkon të rritet dhe të zmadhohet horizontalisht apo vertikalisht dëshmon që ka nevojë për këtë, një lloj lebensbraum, si edhe ka energji dhe forca për ta realizuar. Kombe të tilla nga energjia që kanë janë për t’u marrë shembull. Se çfarë lidhje ka kjo gjë pastaj me konfliktin Greqi – Turqi për platformat e naftës në det, me dobësimin e kontrollit të BE ndaj politikës të jashtme të vendeve të veçanta, me një lloj gjeopolitike ballkanike ku një sërë vendesh, si ne, kemi status inferior me Greqinë përsa i përket integrimit europian, me politikat e sotme amerikane, me krizën në Biellorusi dhe ndërmjetësimin e OSBE atje, apo me nuk e di se çfarë tjetër, duke vazhduar ta zemë me krizat e familjes mbretërore britanike, etj., kjo është tjetër gjë.
Unë mendoj që politika jonë nuk ka asnjë arsye as se përse zemërohet me shtetin tonë të dashur fqinj të Jugut, por as edhe nuk ka përse deklaron se kjo “rritje” nuk prek Shqipërinë, interesat e saj, prandaj nuk ka përse të shqetësohemi. Sigurisht ka të drejtë të shqetësohet opinioni publik, shyqyr thuaj, ka të drejtë të shqetësohet opozita, ka të drejtë të shqetësohet Presidenti i republikës, madje edhe Gjykata Kushtetuese t’i ngrejë veshët përpjetë. Pa paragjykime, pa stereotipime, por me analiza, informacione dhe shqyrtime të hollësishme dhe shumë të matura.
Ne nuk mund të themi, hajde flemë gjumë sepse interesat e Shqipërisë nuk preken!!! Nëse nuk ka një marrëveshje, nuk ka një sqarim të hollësishëm diplomatik sepse pritet të vijë ministri i jashtëm grek të sqarojë shtetin tonë, ku e dimë ne se ka apo nuk ka probleme për Shqipërinë? Edhe nuk dimë gjë, por edhe e dimë që nuk ka asnjë problem!!! Kjo është një kontradiktë e rëndësishme në arsyetimin llogjik.
Greqia dhe Shqipëria janë dy shtete që nuk kanë asnjë arësye që të mos i zgjidhin në interes të përbashkët çështjet e tyre. Unë nuk dua të mendoj që ndryshimi drastik i ambasadores dhe i stafit të ambasadës të Shqipërisë në Athinë, si edhe kriza e emigrantëve në kufi, të kenë asnjë lidhje me “rritjen” e Greqisë. Por, gjithçka bën vaki në këto kohë të turbullta dhe të pista me Covid19 në botën që jetojmë!
Kryeministri grek i kërkoi ministrit të vet të jashtëm që për vendimin e marrë për “rritjen” e Greqisë, të njoftojë shtetet fqinje si Italinë dhe Shqipërinë! Vendimmarrje krejt zeusiane! E fortë, e vendosur!!! Por, duhet të jemi të qartë dhe mos fshehim hënën pas gishtit! Nuk u konsultua njëherë me Italinë dhe Shqipërinë, por fillimisht deklaroi solemnisht “rritjen” e shtetit të vet, dhe pastaj me një lloj vendosmërie neglizhuese kërkoi të njoftoheshin fqinjët për vendimin e marrë!
Pra, ai e di shumë mirë se çdo rritje, edhe nëse është në det dhe nuk prek territore të tjera, është një ndryshim raporti forcash midis një shteti dhe fqinjëve të tij. I madhi i gjeopolitikës në filozofi Rajmond Aron theksonte se pushteti nuk është një vlerë absolute, por një vlerë relative, pra ka kuptim sesa më i fuqishëm bëhesh ti me një veprim ose mosveprim në krahasim dhe mbi të tjerët me të cilët je në marrëdhënie.
Nisur këtej edhe sikur fare të mos cënohen interesat detare të Shqipërisë, fakti që vendi fqinj mik, Greqia e bukur, shteti i një kombi mik dhe mikpritës i shqiptarëve “rritet”, Shqipëria ka nevojë të reflektojë, të arsyetojë, të masë, të shqetësohet për mirë a keq, dhe jo të thotë “nuk ka problem”. “Rritja” e komshiut sigurisht është dobësimi yt, por pastaj tjetër është sesi krijohen aleancat dhe energjitë më pas.
Unë nuk e di nëse politikanët tanë dhe sidomos qeveritarët e dinë teorinë e shkollës realiste të gjeopolitikës, të themeluar nga Lakostë. Nëse u duhet edhe teoritë e Aronit, Lakostës, etj., mund t’i qëmtojmë me kujdes! Por shkolla realiste e gjeopolitikës ka argumentuar se gjeografia është një një shkencë për të bërë luftë! Nuk ka nevojë të alarmohemi.
Greqia dhe Shqipëria nuk kanë asnjë arsësye për t’u acaruar sepse janë shtete të dy popujve miq që jetojnë pranë e pranë prej shekujsh të tërë. Por, nëse Greqia do të “rritet”, sigurisht nuk është sepse Uliksi do të bëjë shëtitje me varkë nëpër detin Jon duke mos gjetur dot rrugën e kthimit në Itakë!
Sigurisht që shteti fqinj ka interesa ekonomike, financiare, ushtarake, turistike, etj. Nga kjo pikëpamje ne e kemi për detyrë si shtet i Natos si vetë Greqia të dimë çfarë raporti i ri vendoset mes nesh dhe Greqisë në planin e strategjisë të mbrojtjes dhe të sigurimit të rrugëve të kalimit në detin Jon, me rëndësi mesdhetare dhe botërore. Kjo sigurisht nuk është vetëm çështja jonë sepse interesat e vendeve të Aleancës të Atlantikut të Veriut janë gjithashtu aktive dhe në lojë.
Në fjalën e zotit kryeministër grek në Parlament pati edhe nota nostalgjie sepse deklarimi i tij sigurisht bën pjesë në një ëndërr kombëtare. Të gjithë popujt e Ballkanit, mirë a keq, me delir, a me realizëm, me miqësi, a me dhunë, ushqejnë të njejtën ëndërr të “rriten”. Por, nuk ka zbuluar kot psikanaliza që kalimi në realitet nis me censurimin e ëndërrave kur ato sidomos krijojnë neuroza të ndryshme. Edhe ne si popull në të kaluarën kemi ëndërrime të rritjes, ndofta jo në dete, por në tokë patjetër. Sepse ne e kemi harruar detin dhe nuk kemi qenë aq lundërtarë që nga Teuta e këtej. Por, ëndërr rritjeje kemi pasur dhe kemi.
Imagjinoj një grup deputetësh nga këta tanët të komisionit të edukimit dhe medias që në këmbë ngrihen në Komision dhe njeri prej tyre deklaron: Njoftoni Kosovën, Maqedoninë e Veriut dhe Malin e Zi se ne do të “rritemi”! Sigurisht komshinjtë tanë grekë, italianë, kombe të zgjuar dhe me humor, do të mbanin barkun me dorë nga të qeshurat!
Prandaj ajo “ëndërra e rritjes” e detyron politikën shqiptare të jetë e kujdeshme dhe ta analizojë mirë semantikën e retorikës politike, duke hequr dorë nga një lloj sigurie e shtirur sikur i ka të gjitha krizat e botës në dorë! Mos harrojmë se jemi një komb e shtet i vogël, mikroskopik në popullsi dhe territor, sado i lavdishëm dhe heroik në tradita! Mos na rrejë mendja shumë!
Ka vend që politika qeveritare të dijë edhe të vërtetat e mëdha që ka përpunuar Fridrih Ratzel i shkollës romantike gjermane të gjeopolitikës. Sado i përdorur keq që teoritë e tij kanë qenë. E them këtë sepse brenda konceptit të tij mbi shtetin si një sistem organicist, shteti i ngjan një peme që për t’u rritur lart i duhet që rrënjët të hapen sa më shumë horizontalisht.
Pra nuk ka kuptim që sikurse është bërë këto ditë, çështja e “rritjes” të Greqisë mike të shihet në mënyrë abstrakte, numerikisht, jo 6 po 8, jo 8 po 12 milje!!! Ratzel thekson se çështja kufitare është një çështje që nuk lidhet thjesht me hapësirën sikur të kemi në hartë figura gjeometrike trekëndësha apo elipsoidë. Një majë mali shpesh vlen sa mijra metra në tokë fushë, një grykë vlen sa mijra kilometra, kujto Torviollin Termopilen, etj., në imagjinatën e popujve tanë, një ngushticë vlen sa mijra dallgë me shkumë deti, një minierë vlen sa pesë krahina. Pra, relievi dhe territori janë realitete konkrete dhe aspak thjesht figura gjeometrike.
Prandaj, mbi gjithçka nuk duhet thënë “s’ka problem”, janë norma konventash ndërkombëtare sepse nuk janë gjeometri, janë gjeopolitikë. Nëse politika qeveritare nuk e kupton këtë do të bënte gabim!
E në fund, sa keq më vjen që ne nuk shpallim dot programe rritjeje në det!!! Sepse suprina e detit te ne është bosh! Peshkimi, turizmi detar në anije, kërkimi i naftës, flota detare, transporti detar, janë braktisur ose asnjëherë menduar si projekte madhështore. Ne po rritemi në Lanë!!! Sepse ne nuk ja dimë vlerat territorit! Por kjo është një çështje që kërkon shqyrtime të tjera dhe që unë personalisht modestisht i kam paraqitur në botimin tim, nga Papirus, “Origjinat e Pushtetit, Pronës, Pasurisë në Shqipërinë pastotalitare” ku argumentoj që ne jo vetëm jemi shtyrë nga fqinjët dhe nga perandoritë në breg të deteve, gati sa nuk na kanë hedhur në det, në kënetë, por edhe atë rryp toke që na ka mbetur, ne e braktisim duke e lënë bosh, e mbledhur si minjtë rreth Lane. Por edhe kjo do biseda të gjate në netë dimri ku brenda ka zjarr në vatër dhe jashtë Covid.
