Lajmi i fundit

Kjo shtetase në katër raste është prezantuar si kushërirë

Zbulohen të tjera detaje nga vrasja që ndodhi pak ditë më parë brenda burgut te Peqinit. Sokol Mjacaj rezulton se ka bërë 5 takime për vitin 2023.

I fundit ka qenë më 25 Gusht. Sa i përket futjes së ushqimeve kjo ka ndodhur nga dy persona. Vetëm një herë, më 1 Shtator, i ka dërguar i vëllai Paulin Mjacaj. Ndërsa në 4 raste të tjera ia ka dërguar një grua. Ajo është prezantuar si kushërirë e Mjacajt, ndërsa më 16 Nëntor, që rezulton edhe hera e fundit, është prezantuar si mikeshë. Sipas Kamber Hoxhës, gruaja në fjalë quhet Ilda Rapo.

“Nga verifikimi për futjen e ushqimeve, nga data 01.09.2023 deri sot ka futur ushqime në datën 01.09.2023, 14.09.2023, 22.09.2023, 03.10.2023 dhe 16.11.2023. Në datën 01.09.2023, i ka sjellë i vëllai Paulin Mjacaj, kurse në rastet e tjera i ka sjellë kushërira e tij me emrin Ilda Rapo.

Kjo shtetase në katër raste është prezantuar si kushërirë dhe në datën 16.11.2023 është prezantuar si mikeshë. Personi që sjell ushqimet regjistrohet nëpërmjet kartës së identitetit dhe pyetet i burgosuri nëse është dakord që t’i pranojë ose jo ushqimet. Për rastin konkret, për periudhën që unë jam në detyrë nuk ka pasur rast të tillë, duke u bazuar në informacionin paraprak që kam marrë. Në dijeninë time për këtë periudhë nuk ka pasur asnjë konflikt”, tha drejtori i burgut.

12 persona janë vënë në pranga pas rastit të rëndë në burgun e Peqinit ku i dënuari Sokol Mjacaj vrau me armë zjarri të dënuarin tjetër Arben Lleshin dhe plagosi Indrit Shaqjen. Një ndër të arrestuarit është edhe drejtori i komanduar i burgut, Kamber Hoxha.

Bari (Osman) Tosku, 65 vjeç nga Rrogozhina, ka humbur jetën duke u zënë poshtë nga mjeti bujqësor, freza.

Ngjarja ka ndodhur rreth orës 11:30 të ditës së sotme dhe viktima ka qenë duke zbritur me mjetin e tij nga kodra për në banese, i cili është përmbysur në tatëpjetën e rrugës.

Sipas banorëve, viktima ka qenë duke prerë dru ulliri për ngrohje në kodrën e Rrogozhinës dhe po i transportonte ato për në shtëpi.

Në këtë rrugë me gropa dhe të pashtruar, është përmbysur mjeti duke e zënë poshtë 65-vjecarin. 65-vjecari jetonte vetëm me gruan, ndërsa në shtëpi janë hapur dyert e mortit, trupi i viktimës është dërguar në morgun e spitalit Durrës.

Një ditë më parë, të gjitha mediat pro qeveritare i dhanë zë “uljes” së çmimit të naftës me vetëm 10-15 lekë për litër. Nafta nga 200 lekë që ishte litri, tani po shitet me 185-190 lekë/litri.

Por kjo “ulje” që vjen pas gjashtë muajsh, as që krahasohet me çmimin që duhet të jetë në të vërtetë. Ditën e sotme, datë 19 Dhjetor, një fuçi nafte në bursën e Teksasit në Shtetet e Bashkuara të Amerikës, shitet për 72.2 dollarë. Sipas kësaj burse, në Shqipëri çmimi duhej të ishte, 160-165 lekë/litri dhe jo mbi 180 lekë/litri ashtu siç është sot.

Ndërkohë sipas të dhënave nga Global Petrol Price, datë 11 Dhjetor 2023, Shqipëria renditet në vendin e katërt në rang global për çmimin më të lartë të naftës. Pas Hong-Kongut, Monakos dhe Islandës, Shqipëria renditet në vendin e katërt me 1 litër nafte 2.088 dollarë duke lënë pas edhe vende më të shtrenjta si Holanda, Lihtenshtejni, Zvicra apo edhe Singapori.

Ndërkohë edhe në rajon, Shqipëria mban vendin e parë për çmimet e larta, pasi Maqedonia e Veriut, Kosova dhe Serbia kanë çmime më të ulëta krahasuar me ne./Shqiperiaime

Këtë të martë janë përcjellë për në banesën e fundit, Marsel Tefa, 32-vjeç dhe Egila Celami, 29-vjeçe, dy të rinjtë që humbën jetën në aksidentin tragjik në Rrugën e Arbrit.

Çifti i të rinjve, me origjinë nga Burreli po udhëtonin me një mjet tip “Toyota” nga ByPassi i Murrizit drejt Tiranës, kur u përplasën me një mjet tip ‘Caddy’ me drejtues shtetasin Klaudio Ruçi.

Përplasja ka qenë tepër e fortë dhe makina e të rinjve ka dalë nga rruga duke rënë rreth gjashtë metër poshtë në humnerë. Si pasojë e përplasjes së fortë, mjeti Toyota është shtypur totalisht dhe është dashur ndërhyrja e zjarrfikësve për prerjen e tavanit të makinës dhe nxjerrjen e trupave të pajetë.

Ka dyshime se shkak për aksidentin tragjik është bërë një parakalim i gabuar, por qytetarët kanë raportuar për JOQ ALBANIA se në këtë aks rrugor mungon sinjalistika.

Historia e Alex Baty 17-vjeçarit britanik , i cili u zhduk në Spanjë 6 vite më parë ka një fund të lumtur. Adoleshenti u gjet këtë javë në jug të Francës dhe më pas u kthye në shtëpinë e tij në Londër i shoqëruar nga oficerët britanikë. Do të jetojë me gjyshen, e cila kishte kujdestarinë e tij para se të rrëmbehej.

Aleksi u rrëmbye në vitin 2017 gjatë pushimeve në Malaga të Spanjës nga nëna e tij dhe gjyshi, ndërsa mediat britanike shkruajnë se në atë kohë ata po kërkonin një mënyrë jetese alternative dhe nuk donin që Aleksi të shkonte në shkollë.

Mediat shkruajnë se adoleshenti gjatë 6 viteve ka bërë një jetë “nomade”. Ai u gjet rastësisht mbrëmjen e së enjtes nga një shofer teksa ecte përgjatë një rruge, në një zonë malore, pranë Toluzës.

Fabien Accidini, një student francez kujton momentet kur gjeti adoleshentin e zhdukur.

“Ai po ecte në mes të një pylli, në një vend që ishte plotësisht i humbur, 20 minuta me makinë nga fshati më i afërt dhe kjo nuk është e zakonshme, nuk ka asnjë shpjegim që dikush të ecë në atë zonë kaq vonë. Gjatë rrugës mendova të ndaloja dhe ta pyesja nëse është mirë, apo edhe thjesht ta ndihmoja, ose të paktën ta dërgoja në një qytet sa më shpejt që të ishte e mundur.”

Ai thotë se i dha celularin e tij, në mënyrë që t’i dërgonte një mesazh gjyshes së tij në Angli.

“Është një histori e pabesueshme. Nuk e kisha menduar kurrë se do të nisesha për në punë në mesnatë dhe do të përfundoja duke marrë dikë në anë të rrugës që është rrëmbyer prej gjashtë vitesh.”

Autoritet britanike thonë se adoleshenti është në gjendje të mirë shëndetësore dhe nuk është keqtrajtuar gjatë këtyre 6 viteve.

Rasti i zhdukjes së adoleshentit po hetohet nga drejtësia britanike ndërsa ende nuk dihet asgjë për fatin e nënës së tij.

Një 27-vjeçar shqiptar i dha fund jetës në Angli rreth një javë, ndërsa mediat britanike kanë zbuluar identitetin e tij. Leonard Farruku, 27 vjeç, nga Manza e Durrësit është shqiptari i vetëvrarë në anijen Bibby Stockholm ku mbahen azilkërkuesit e regjistruar në Britani.

Identiteti i viktimës, i cili u gjet pa jetë javën e kaluar, është zbuluar nga ‘The Telegraph’, që shkruan se i riu pagoi 4,000 euro për të kaluar Kanalin La Mansh me gomone duke hyrë ilegalisht në Britani verën e kaluar.

Vetëvrasja u bë publike të mërkurën ndërsa mediat raportojnë se azilkërkuesi shqiptar ishte ankuar për gjendjen e tij mendore një ditë para se të vdiste. Dëshmitarët i thanë medias britanike se 27-vjeçari ishte dëgjuar duke bërtitur dhe përplasur në murin e kabinës ku mbahej.

Motra e tij, Jola Dushku, 33 vjeçe, e cila jeton në Lombardi të Italisë, tha se ishte e tronditur nga lajmi, të cilin e morën vesh nga të afërmit në Mbretërinë e Bashkuar. Ajo ka deklaruar se “do të gjejë qetësinë vetëm atëherë kur të mësojë të vërtetën se çfarë ndodhi atë natë me vëllanë në anijen hotel Bibby Stockholm”.

“Kur fola me të herën e fundit, ai më tha se po trajtoheshin nga rojet si kafshë.”- ka thënë motra e Farrukut.

“Vëllai im, kur mbërriti në MB, i dha Home Office adresën e të afërmve tanë në Londër. Ata u kontaktuan nga policia e cila u tregoi se çfarë kishte ndodhur.

“Sipas të afërmve tanë që janë në kontakt me policinë, Leonardi atë natë në orën 23 të mbrëmjes ka pasur disa probleme dhe është qetësuar nga roja. Në orën 3 të mëngjesit ai u gjet i vdekur. Nuk kemi më shumë detaje se si ai vdiq.”
Sipas saj, Leonardi emigroi drejt Anglisë për një jetë më të mirë dhe për të fituar një leje qëndrimi. Ajo ka thënë për mediat britanike se pikërisht për këtë arsye, vëllai i saj iu bind kërkesës së Home Office për të shkuar për t’u akomoduar në atë anije, ku edhe i dha fund jetës.

“Ai erdhi në MB me ëndrrën për të gjetur punë më të mirë dhe, më e rëndësishmja, për të marrë leje të pacaktuar për të qëndruar në Mbretërinë e Bashkuar,” tha Dushku.

“Ai tha: “Po”, kur i thanë atij se akomodimi i tij i ri do të ishte në atë varkë ku ai kaloi ditët e fundit të jetës së tij,” tha ajo.

Ajo tha se ata kishin humbur të dy prindërit e tyre, një humbje që ndryshoi vëllain e saj.

“Leonardi u bë një person tjetër kur nëna jonë vdiq. Vdekja e saj e ndryshoi atë”, tha ajo.

Për këtë ngjarje, një zëdhënës i Home Office tha se ky ishte një incident tragjik dhe s engjarja është në hetim.

“Ky ishte një incident tragjik dhe ngushëllimet tona shkojnë me të prekurit. Mirëqenia e personave nën kujdesin tonë ka një rëndësi parësore dhe ne marrim përgjegjësinë tepër seriozisht për këtë. Kjo ngjarje është duke u hetuar nga policia dhe mjekësia ligjore në analizimin e fakteve e rrethanave të kësaj vdekje”.

Mendohet se aktualisht, 300 azilkërkues meshkuj janë vendosur në anijen hotel “Bibby Stockholm” e cila ka një kapacitet deri në 506 persona.

Lordi Syla është njëri nga tre personat që humbi jetën në aksidentin në Prizren. Pas vdekjes së Lordit ka reaguar babai i tij, Muhamet Syla.

“Ma kpute zemren bab, ishallah Allahu në xhehnet”, ka shkruar Syla sipër një fotografie ku shihet me Lordin.

Ndërkaq dy të vdekurit tjerë janë Nue Bibaj dhe Molos Delija.

Aksidenti që u mori jetën tre të rinjve në afërsi të Prizrenit, është shkaktuar si pasojë e garave me makina.

Njëra nga makinat ka goditur disa persona, të cilët po qëndronin pranë autostradës dhe ishin duke e ndjekur garën.

Policia përmes njoftimit për media, ka bërë të ditur se shoferi që përplasi tre të rinjtë është arrestuar.

Më herët, u raportua se shoferi i automjetit ishte Arlind Syla, i afërm i njërit prej viktimave.

Ndërsa së fundmi, policia njoftoi edhe për arrestimin e një tjetër personi, Irfan Hotin nga fshati Dejnë raporton indeksonline.

Viktimat e këtij aksidenti janë: Lordi Syla, Molos Delija dhe Nue Bibaj, të tre të moshës rreth 20- vjeçare.