Art-Kulture

Të shumtë ishin fëmijët por edhe të rriturit të cilët kanë ndjekur shfaqjen interaktive të trupës së Cirkut Kombëtar në sheshin “Skënderbej”, në kryeqytet.

Një atmosferë fantastike u krijua, për të gjithë të pranishmit, ku u zhvilluan lojëra e akrobaci të ndryshme. Trupa profesioniste iu dha mundësinë edhe të pranishmëve për të provuar dhe realizuar truke shpejtësie si vetë mjeshtrat e cirkut.

”Një pasdite në shesh ndryshe, me fëmijë e të rritur dhe trupën e mrekullueshme të Cirkut Kombëtar. Fatlumë ata që patën mundësinë të ishin të pranishëm”, shprehet ministrja e Kulturës, Elva Margariti e cila ka publikuar edhe disa foto nga kjo shfaqje.

Gjatë muajve të verës, trupa e Cirkut Kombëtar me mbështetjen e Ministrisë së Kulturës ka performuar edhe në zona të ndryshme të kryeqytetit.

Në ciklin e aktiviteve, “Eja luaj në Parkun tënd”, nëpërmjet lojërave zbavitëse, rekreative, sportive, argëtuese dhe numrave të mrekullueshme të artistëve të Cirkut Kombëtar, lumturuam në këto ditë pushimesh, fëmijët e kryeqytetit./atsh

U çel në ambientet e Muzeut Historik Kombëtar, pasditen e sotme ekspozita me foto në të cilat përshkruhet rrugëtimi i jetës së Nënë Terezës që nga fëmijëria, rinia, përkushtimi ndaj të varfërve e deri në vitet e fundit të jetës.

Në ceremoninë e hapjes së kësaj ekspozite të veçantë morën pjesë zv.ministrja e Kulturës, Valbona Shujaku, Drejtori i Muzeut Historik Kombëtar, dr. Dorian Koçi, si dhe shumë dashamirës të artit.

Në fjalën e tij përshëndetëse Drejtori i Muzeut Historik Kombëtar, dr. Dorian Koçi, u shpreh se, “është kënaqësi e veçantë që Muzeu Historik Kombëtar ka sjellë këtë ekspozitë fotografike të Nënë Terezës me foto origjinale, duke përmendur kontributin e Don Lush Gjergjit në pasurimin e ekspozitës me foto origjinale në të cilat përshkruhet rrugëtimi i jetës së Nënë Terezës”.

Zv.ministrja e Kulturës, Valbona Shujaku u shpreh se pas një bisede me Don Lush Gjergjin, i kish rrëfyer se nëse ajo do ishte një politikane, ne shqiptarët do të ishim edhe më mirë, pasi ajo ishte shumë e vendosur në idetë e saj ku veçonte humanizmi dhe mirësia e saj, ku reflektohet më së miri në këtë ekspozitë. /atsh

Raporti mbi Situatën e Mirëqenies së Fëmijëve në Shqipëri nga World Vision tregoi se, gjatë vitit të fundit 70% e fëmijëve të moshës 8 deri në 18 vjeç kanë përjetuar një formë dhune.

Në ditën e dytë të Festivalit të Rinisë, në Qendrën Kulturore të Katedrales Ortodokse, të rinjtë do të sjellin për diskutim problemin e dhunës tek fëmijët; mungesën e shërbimeve që mbështesin fëmijët e dhunuar, por nga ana tjetër edhe arsyet kryesore të mosraportimit të dhunës.

46% e fëmijëve janë indiferentë dhe nuk duan të përfshihen në raportimin e rasteve të dhunës dhe 34% e tyre nuk e raportojnë për shkak të mungesës së besimit që institucionet do ta zgjidhin situatën.

Dhuna është një prej faktorëve kryesorë që pengon zhvillimin dhe mirëqenien e fëmijëve si dhe cenon arritjen e rezultateve në ndërhyrjet socio-ekonomike, që çojnë në përmirësimin e cilësisë së jetës në Shqipëri.

“World Vision Albania prej më shumë se 10 vitesh punon ngushtë me fëmijët, komunitetet
dhe institucionet shtetërore për identifikimin, raportimin dhe menaxhimin e rasteve të fëmijëve të dhunuar. Përkushtimi i institucioneve shtetërore, donatorëve, korporatave, organizatave të shoqërisë civile në ofrimin e shërbimeve të integruara vazhdon të jetë thelbësor për eliminimin e dhunës ndaj fëmijëve në Shqipëri. Në mbështetje të nevojës për shërbime, World Vision hartoi standardet dhe po piloton në bashkitë Durrës dhe Dibër Shërbimin e Emergjencës për Fëmijët në rrezik të lartë”, – shprehet Artina Morava, drejtoresha e programit të World Vision për Shqipërinë dhe Kosovën. /atsh

“Kopshti i qershive” nga Anton Çehov do të vijë premierë për artdashësit korçarë në skenën e teatrit “Andon Zako Çajupi”.

Tashmë ka nisur shitja e biletave për premierën e 31 gushtit, e cila do të vendoset në skenën teatrore me regji nga Dino Mustafic.

Me një kastë aktorësh të njohur, si Ema Andrea, Sotiraq Bratko, Zamira Kita, Ligoraq Riza, Gert Ferra, Jozef Shiroka dhe të tjerë artistë të teatrit, kjo shfaqje vjen me koreografi nga Gjergj Prevazi.

Provat për shfaqjen kanë nisur që në muajin qershor dhe kanë vijuar edhe gjatë muajit korrik.

I lindur në Bosnje, regjisori Dino Mustafic, e ka lidhur jetën herët me skenën. Ai është diplomuar në Akademinë e Arteve të Bukura në Sarajevë, dhe është drejtor i një festivali ndërkombëtar teatror MESS, që mbahet në Sarajevë prej gati 20 vitesh./atsh

Aktori dhe regjisori Genc Fuga, diplomuar në Londër dhe pedagog në Universitetin e Arteve, është shprehur që herët për domosdoshmërinë e një teatri të ri e dinjitoz, me të gjithë parametrat që duhet të ketë një teatër i vërtetë kombëtar.

Kryeministri Edi Rama ka ndarë qendrimin e regjisorit Fuga, sipas së cilës Teatri Kombëtar është një ndër skenat më të painvestuara. Sipas Fugës, edhe pse janë bërë restaurime të herëpashershme, ato kanë rezultuar të pasuksesshme.

“Jam pro ndërtimit të një teatri të ri, duke ruajtur territorin dhe ç’është më kryesorja, duke negociuar shumë fort për këtë pasuri, mbase jo të teatrit në vetvete, jo të ministrisë në vetvete, por këtë pasuri tonën. Do doja një teatër me teknologjinë e fundit të magjisë, mund të përmend podet pneumatikë, hapësira të tjera për lëvizjen e dekorit, teknika skenike që kanë evoluar e që patjetër, në kushtet aktuale, mendoj se po limitohen edhe regjisorët në shprehjen e figurave të tyre artistike. Një teatër i ri i përshtatshëm për teatër është kërkuar që në 1953. Teatri Kombëtar tani është një ndër skenat më të painvestuara. E vetmja teknologji bashkëkohore që mund të ketë skena e teatrit aktualisht është një rotativë, pra një shpikje që në 1800, e trashëguar nga operat. Xhepat skenikë nuk mjaftojnë, hapësirat mbrapa nuk mjaftojnë, janë bërë vetëm restaurime apo mballoma, por nuk është zgjidhur hapësira e përshtatshme për këtë gjë”, – citon Kryeministri i vendit, Genc Fugën.

Aktori dhe regjisori Genc Fuga është diplomuar në Londër dhe përveçse pedagog në Universitetin e Arteve, ai i ka dhënë publikut me dhjetëra role për t’u mbajtur mend, si në teatër, ashtu edhe në kinema. /atsh

Aktori dhe regjisori Qëndrim Rijani, lindur në Maqedoni dhe diplomuar në Tiranë, me produksione të suksesshme në Rusi, Turqi, Bosnjë, Zvicër, Kosovë, Shqipëri, Maqedoni e në shumë vende të tjera të botës shprehet se Shqipëria ka nevojë për një Teatër të Ri.

Kryeministri Edi Rama ka publikuar pasditen e së enjtes mesazhin e artistit të njohur Qëndrim Rijani, i cili shprehet se është pro teatrit të ri.

“QËNDRIM RIJANI: Një Teatër i Ri është kërkuar 38 vite me parë, të cilin ende sot nuk e kemi. Besoj shumë që Shqipëria dhe të gjithë ne shqiptarët, që vazhdimisht sytë i kemi tek ai Teatër Kombëtar dhe vazhdojmë ta konsiderojmë një projekt në Teatrin Kombëtar si arritjen më të madhe tonën ndër Shqiptari, ka dhe kemi nevojë për një Teatër të Ri. Teatri Kombëtar ka nevojë që të vazhdojë të ketë në pronësi çdo pëllëmbë të tokës të cilën posedon sot. Dhe Teatri i Ri Kombëtar do të ketë nevojë për aktorë, regjisorë, skenografë, kostumografë, kompozitorë, etj… të cilët do të arrijnë të shfrytëzojnë dhe menaxhojnë të gjitha mundësitë, që do ofrojë një teatër dinjitoz dhe vazhdimisht do të ofrojnë produkte artistike dinjitoze, pa u fshehur pas formulës së famshme: “Mungesa e kushteve bëri që mos arrijmë të gjitha qëllimet””, – citon Kryeministri i vendit, Qëndrim Rijanin.

Regjisori Qëndrim Rijani është aktualisht pedagog në Universitetin e Arteve në Tiranë ku ligjëron lëndën e Mjeshtrisë së Aktorit dhe në Universitetin e Tetovës ku ligjëron lëndën e Regjisë së Teatrit. /atsh

Ministri i Shtetit për Diasporën Pandeli Majko solli sot në vëmendje talentin e piktorit të diasporës Dastid Miluka e cili vjen me ekspozitë nga kostumografia popullore shqiptare.

“Dastid Miluka është një piktor i talentuar shqiptar që jeton prej kohësh në Belgjikë, i cili vjen para publikut me një stil të veçantë e goditës”, shprehet Majko.

Po ashtu Majko vë theksin te thelbi i ekspozitës që është vendi i origjinës, Shqipëria.

“Me ekspozita këndej e andej kufijve, Miluka kësaj radhe i është përkushtuar një projekti ku punimet e tij do të jenë të frymëzuara nga ‘rrënjët’: vendi i origjinës, njerëzit e sidomos nga kostumografia popullore shqiptare”, shprehet ai. /atsh