Art-Kulture

Kryeministri Edi Rama ka publikuar sot një video nga parodistët e Vlorës.

Ata i kanë kushtuar një këngë situatës që po kalon vendi ynë nga koronavirusi, duke ngritur moralin e qytetarëve të Vlorës, por jo vetëm.

Dy parodistët e Vlorës Afrim Agalliu dhe Agron Hamo, së bashku me këngëtarin dhe kompozitorin vlonjatë Artur Dhamo, nëpërmjet këngës së tyre apelojnë qytetarët të qëndrojnë në shtëpi deri sa periudha e vështirë e koronavirusit të kalojë dhe më pas të gjithë mund t’i rikthehemi jetëve tona normale.

“Edhe ti more trimosh, bëj si ne që të shpëtosh. Jepe besën jepe fjalën të gjithë së bashku do t’ia dalim”, janë disa nga vargjet e parodistëve të Vlorës./atsh

https://www.facebook.com/edirama.al/videos/170929490637447/?t=0

Artistët në shesh dhe njerëzit në ballkone e dritare. Kjo është forma më e re e koncerteve në Durrës, në kuadër të ditëve të vështira të krijuara nga lufta ndaj COVID-19.

Distancimi social është vlerësuar si një nga rrugët për të mënjanuar përhapjen e koronavirusit të ri, duke ulur kurbën e infeksionit dhe duke ndihmuar kështu sistemin shëndetësor për të përballuar fluksin e të infektuarve që kanë nevojë për shtrim në spital.

Bashkia e Durrësit, në kuadër të këtyre masave ka organizuar një koncert të thjeshtë në lagjet e Durrësit.

“Artistët në shesh dhe njerëzit në ballkone e dritare, ky është koncerti më i thjeshtë dhe më njerëzor në këto ditë të vështira të COVID-19”,- tha Zhuljen Varfaj, kryetari në detyrë i bashkisë Durrës.

njofton Bashkia e Durrësit. “Faleminderit artistëve durrsakë të cilët ofruan këngë dhe humor duke thyer rutinën e pasditeve të izolimit në shtëpitë e lagjes 16 në Durrës. Nesër në një lagje tjetër, me të tjera surpriza! Ju rrini në shtëpi, artistët vijnë te ju!”,- u shpreh Varfaj./atsh

https://web.facebook.com/Agjencia.Telegrafike.Shqiptare/videos/2582543355185511/?t=0

Qendra e gërmimeve në Apoloni, në afërsi të Fierit, është një vend ku sot takohen arkeologe dhe arkeologë nga shtete të ndryshme.

Gjatë një vizite me studiuese dhe studiues të ndryshëm ambasadori gjerman në Shqipëri, Peter Zingraf, ambasadorja e Francës në Shqipëri, Christina Vasak dhe ajo greke Sophia Philippidou vizituan qendrën e gërmimeve në Apoloni.

“Ambasadori Gjerman Zingraf dhe kolegia franceze Christina Vasak si dhe ajo greke Sophia Philippidou mundën të bindeshin lidhur me fraktin, se sa mirë funksionon bashkëpunimi gjermano-francezo-shqiptar në hulumtimin e këtij qyteti antik”, thekson ambasada gjermane në një njoftim.

“Në kuadrin e një takimi ndërkombëtar në kontekstin e muajit të frankofonisë, ekipe të ndryshme kishin patur mundësi të prezantonin paraprakisht në Tiranë rezultatet e punës së tyre”, shton Ambasada e Gjermanisë në Tiranë./atsh

Teatri do të jetë në pronën e vet, do të jetë 3-herë më i madh dhe do të ketë të gjithë teknologjinë moderne që kërkuan artistë, përfshi edhe skenën ultramoderne me rotativë.

Ky është premtimi i Erion Veiaj i cili siguroi qytetarët dhe artistët se falë këtij vendimi teatri i ri do të bëhet edhe më shpejt. I ftuar në një nga mediet e vendit, kryetari i bashkisë sqaroi se kompania nuk kishte mundësi që të plotësonte në kohë kërkesat teknike, ndaj edhe godina e re e teatrit do të bëhet nga vetë bashkia dhe qeveria.

“Unë nuk kam betejë me asnjë. Unë respektoj ligjet e këtij vendi dhe ligjet e këtij vendi kaluan një ligj për një negociatë të teatrit e cila ishte mandatuar Bashkia e Tiranës ta kryente në këto dy muaj, kështu që në këto dy muaj nuk kisha betejë, por kisha një negociatë, një negociatë ku patëm një ofertë nga një ofertues privat për të ndërtuar teatrin, një negociatë që pati një kundër-ofertë nga pjesa që negocionte që janë përfaqësues të Bashkisë së Tiranës, qeverisë dhe komunitetit të artistëve me dy anëtarë të cilët kërkuan diçka më shumë se ajo që u ofertua, pra u kërkua që të bëhej një investim më i madh në një skenë, një skenë e ngjashme me disa nga skenat më moderne sot në botë ku përveç oxhakut sipër që sjell skenografi apo ashensorit poshtë apo edhe dy krahëve të skenës, u kërkua që të kishte edhe një skenë rotative, si ajo që shohim shpesh në Broduej apo shumë prej performancave moderne të teatrit. Kjo kërkesë e tejkalonte ofertën që ishte bërë nga kompania, pra kalonte biznes-planin e tyre. Jo vetëm kaq, por duke qenë se ishte lidhur edhe me negociatën tjetër që do do të duhej të bënte bashkinë për pronën e vet, na çonte në një kohë kalendarike disa vjeçare, ndaj morëm një vendim në fund të një negociate, provë për të gjithë ata që mendonin që çdo gjë ishte e parapërgatitur. Në momentin që ne zgjodhëm që të bashkonim votat me artistët dhe të thonim: Ky është një shans që na jepet një herë në 100 vjet, pra le të bëjmë maksimumin me teknologjinë dhe gjithashtu maksimumin në një kohë të shpejtë zgjodhëm të shtrëngojmë duart, të ndahemi në paqe dhe të themi faleminderit por jo, faleminderit! Ne do të bëjmë vetë, me investimin publik të qeverisë dhe Bashkisë teatrin, duke marrë një kredi të posaçme. Pastaj do marrim kohën tonë për pjesën pas Bashkisë, si një negociatë tipike që bashkia bën rëndom nëpër qytet sa herë që ka një pronë që preket nga zhvillimi për të marrë maksimumin, ashtu siç bën maksimumin çdo privat që ka një pronë që preket nga zhvillimi”, -u shpreh Veliaj.

Veliaj theksoi se edhe ata aktorë që dalin kundër nismës së bashkisë për t’i dhënë qytetit dhe artdashësve një teatër modern, përbëjnë më pak se 1% të aktorëve të skenës të cilët janë tashmë të atashuar në organet partiake me të drejtën e tyre, për të qenë në Këshillin drejtues të PD.

“E para, të sqarojmë disa gjëra: Një pjesë e aktorëve që janë më pak se 1% e aktorëve të skenës të cilët janë tashmë të atashuar në organet partiake me të drejtën e tyre, për të qenë në Këshillin drejtues të PD, me një pjesë të militantëve të ish-Ujësjellësit të Bashkisë Kamzë nuk përfaqësojnë të gjithë qytetarët, ndaj unë do të tregoja pak kujdes kur ne themi të gjithë qytetarët. Jo! Kjo pjesë e politizuar që është në fakt i njëjti grup shëtitës që ka qenë edhe kundër këndit të lojrave, kundër bulevardit të ri, Pazarit, edhe kundër sheshit “Skënderbej”, edhe kundër shumë prej investimeve që janë bërë në qytetin e Tiranës, janë një grup shëtitës të cilët unë i marr të mirëqënë për çdo punë publike. Arsyeja pse nuk kemi bërë gabim është një provë konkrete që është stadiumi i Tiranës. Stadiumi Kombëtar, stadium Air Albania ishte produkt i kësaj negociate ku investitori kishte fuqi të paguante edhe me kërkesat shtesë që bëri Federata dhe bashkia bëri pjesën e parkingut dhe qeveria bëri pjesën e sheshit përpara. Të provosh nuk është një gabim, sigurisht nëse do kishim marrë të gjitha kërkesat tona me fondet private do ishte shumë më mirë se sa të marrim kredi, ku sigurisht bashkia e Tiranës ka një limit kredie. Bashkia e Tiranës merr sot kredi nga BERZH-i për ujësjellës-kanalizimiet, merr nga KFV-ja për reformën e mobilierit dhe të transportit, merr nga institucione të ndryshme si CEB-i për banesat sociale. Kështu që çdo kredi që marrim, na ngushton hapësirat, megjithatë ajo që unë besoj është që morëm një vendim të drejtë. Për të gjithë ata që kishin dyshime që këtu çdo gjë është e parapërgatitur dhe kush e ndoqi negociatën 2-mujore pa sesi ne kërkuam maksimumin, nëse ky maksimum nuk arrihet me një investitor privat siç në fakt ishte e suksesshme në rastin e stadiumit, atëherë ne do ta bëjmë vetë”, -tha ndër të tjera Veliaj./atsh

Drejtori i Muzeut Historik Kombëtar, dr. Dorian Koçi, zhvilloi sot një takim me grupin e ekspertëve në kuadër të projektit “Ndërtimi i aftësive të administratës publike shqiptare për lëvizjen e lirë dhe luftën kundër trafikimit të paligjshëm të mallrave kulturore”, organizuar nga Ministria e Kulturës dhe Instituti Kombëtar për Regjistrimin e Trashëgimisë Kulturore.

Të pranishëm në këtë takim ishin Alexic Castro dhe Valisio Marra nga grupi i ekspertëve, si dhe Drejtoresha e Institutit Kombëtar për Regjistrimin e Trashëgimisë Kulturore, Silva Breshani.

Projekti konsiston në përafrimin e legjislacionit kombëtar të Shqipërisë me atë të Unionit në fushën e luftës kundër trafikimit të paligjshëm të objekteve kulturore dhe zbatimin e ligjeve dhe akteve nënligjore nga stafi i institucionit përkatës, përkatësisht Ministria e Kulturës, si edhe ai i Doganave, Policisë, INTERPOL-it dhe institucionet gjyqësore të gjithë vendit./atsh

Ministrja e Kulturës Elva Margariti përkujtoi sot aktorin e mirënjohur Skënder Sallaku në 85-vjetorin e lindjes.

“Është e pamundur të mos buzëqeshim sa herë kujtojmë aktorin Skënder Sallaku”, u shpreh Margariti.

“Edhe sot, në 85-vjetorin e lindjes së tij, sjellim në mendje kaq shumë role që kanë lënë gjurmë në komedinë shqiptare, kaq shumë batuta që mbeten të pavdekshme”, tha Margariti.

Skënder Sallaku lindi më 25 janar 1935 Tiranë dhe u nda nga jeta më 11 shkurt 2014.

Ai ishte një nga aktorët tanë të humorit, ish-kampion kombëtar në mundjen klasike, autor skeçesh e parodish.

Sallaku mbaroi Institutin e Lartë të Kulturës Fizike “Vojo Kushi” dhe kreu një kualifikim njëvjeçar në Kinë, pranë cirkut të Pekinit.

Fillimisht filloi punë si profesionist në Estradën e Kufirit, më pas si klloun akrobatik në cirk, duke dhënë një kontribut të papërsëritshëm në ecurinë e këtij profili sa të vështirë aq edhe të bukur.

Skënder Sallaku është vlerësuar me titujt “Artist i Merituar”, “Artist i Popullit” dhe “Mirënjohja e Qytetit të Tiranës”. /atsh