Nën moton “Shqipëria fiton”, kryedemokrati Lulzim Basha, ka prezantuar sot programin e Partisë Demokratike për arsimin.
Në prani të ekspertëve të arsimit, nga selia blu, Basha tha se ky plan, është më i miri, duke e cilësuar arsimin si bazën dhe të ardhmen e shoqërisë.
Ai theksoi se programi do të ndryshojë sistemin aktual të arsimit. Pika e parë e planit të Bashës, është shpërndarja e teksteve falas për 350.000 nxënës.
Po kështu, ai shtoi se fëmijët e të gjitha familjeve në nevojë, do të përfitojnë paketë shkollore gjatë gjithë arsimit parauniversitar.
Basha premtoi se do të ofrojë për çdo të ri dhe çdo të rritur shqiptar deri në 35 vjeç, kurse private pa pagesë të platformës së mirënjohur amerikane “Education World Wide” për 5 gjuhë të huaja.
Kreu i demokratëve, u zotua se do të rrisë me 60% pagat e mësuesve dhe as edhe një mësues nuk do të marrë më pak se 700 euro në muaj rrogë.
Ai premtoi rritje të pagave me 50%, duke iu garantuar pedagogëve shqiptarë paga prej 900 eurosh në muaj dhe profesorëve, paga prej 1.300 euro.
“Përsëris sot angazhimin tim para studentëve shqiptarë, se me qeverinë e re të dalë pas zgjedhjeve të 25 prillit, ne do të paguajmë 10 mijë stazhe 12 mujore për studentët më të mirë çdo vit, – deklaroi kryedemokrati. – Brenda 4 viteve, çdo familje do të ketë të paktën 1 tablet apo kompjuter në shtëpi. Ne do të arsimojmë çdo fëmijë, pavarësisht statusit të tyre social, ekonomik apo aftësive të kufizuara”. /noa.al/
Artisti vlonjat Skender Kamberi feston sot 82 vjetorin e lindjes Kryebashkiaku Dritan Leli i ben urimin e vecant nepermjet rrjetit social facebook. Urimi: Kur u takuam, pak ditë më parë, Dona, e bija e profesorit, Skënder Kamberit, na tha se shumë shpejt do të ishte ditëlindja e tij e 82-të. Sot është dita e tij! Marrëdhënien me figurat e ngjyrat e Kamberit e kam krijuar ende pa pasur asnjë mendim për artin, por përmes tij u rrita dhe kultivova vëmendjen ndaj pikturës. Ishte fat fqinjësia me të! Atëherë nuk e kuptoja, as këtë e as rëndësinë e librave që huajta nga biblioteka e shtëpisë së tyre! Sot i jam mirënjohës, siç duhet t’i jetë jo vetëm Vlora, për kujtimet e karaktereve e shpirtit të qytetit që diti të përjetësojë nëpër dekada! Përmes veprës së Skënder Kamberit, qyteti dhe i gjithë vendi, është pasuruar me dëshmi për brezat që do të vijnë! Çfarë mund ta bëjë më të rëndësishëm njeriun? Gëzuar Mjeshtër i Madh!
Stafi i orikuminews i uron jete te gjare, shendet dhe krijimtari sa me te vrullshme!
Zv/ministrja e Shëndetësisë dhe kryetarja e Komitetit Teknik të Ekspertëve në Shqipëri, Mira Rakacolli, ka njoftuar ditën e sotme se do të vijojnë të qëndrojnë të pezulluara fluturimet me Britaninë e Madhe për shkak të variantit të ri të COVID 19.
Ajo u shpreh po ashtu se po punohet me ministrinë e Arsimit për të vlerësuar edhe mundësinë e dhënies së provimeve në auditore, në përgjigje të kërkesës së studentëve, por duke lënë në fuqi vendimin për vijimin e mësimit ‘online’
”Kjo rritje ka lidhje me moszbatimin e duhur të masave për festat e fundvitit. Deri tani, situata vijon të mbetet e kontrolluar dhe për këtë arsye u vendos vazhdimi i ndërprerjes së fluturimeve me Britaninë e Madhe deri në një urdhër të dytë. Në lidhje me universitetet, po punojmë me ministren e Arsimit për të vlerësuar mundësitë për dhënien e provimeve në auditorë. Do të kemi një vendim së shpejti për këtë brenda fundit të kësaj jave”, tha Rakacolli.
Mbi 9 mijë studentë kërkojnë rikthimin në auditore të paktën për seminaret, laboratoret dhe praktikat. Afati që studentët i kanë lënë Qeverisë për vendimin lidhur me rikthimin në auditore përfundon nesër, ndërsa studentët paralajmërojnë se do të bojkotojnë edhe mësimin online.
Studentët shprehen se shpresojnë që brenda ditës së enjte, Komiteti Teknik i Ekspertëve të kthejë një përgjigje pozitive lidhur me kërkesat e parashtruara 10 ditë më parë.
“Shpresojmë të kemi një vendim pozitiv për rikthimin në auditore. Është e pakuptimtë që lokalet qëndrojnë hapur dhe universitetet janë të mbyllura.
Ka propozime për organizime protestash para Ministrive të linjave, mund të bojkotohen provimet, por edhe mësimi online”, deklarojnë studentët.
Gjatë ditëve të fundit ka pasur një shtim të rasteve të reja me Covid-19, sikunder edhe numrit të vdekjeve, ndërkohë që ekspertët paralajmërojnë se 7 ose 10 ditët e ardhshme pritet të kenë një shtim të rasteve. Kjo nuk favorizon rikthimin e studentëve në auditorë, ndonëse nesër pritet të ketë një përgjigje, bazuar në afatin që studentët i kanë lënë Komitetit Teknik.
Fakulteti i Gjuhëve të Huaja në Tiranë, ka deklaruar zyrtaritsht se provimet e sezonin do të mbahen online.
Ky vendim vjen në një kohë që studentët kanë kërkuar me ngulm rikthimin në auditore, madje kanë dorëzuar edhe një peticion në Ministrinë e Arsimit.
Kujtojmë se ministrja Evis Kushi ka mbajtur një takim me rektorët e universiteteve, por edhe me Komitetin Teknik të ekspertëve, për të marrë mendimin e tyre.
Po ashtu studentët u takuan edhe me Komitetit Teknik, Mira Rakacolli, dhe deklaruan se kanë kërkuar rikthimin në auditore, të paktën për provime dhe praktika mësimore.
“Takimi shkoi mirë, i thamë që kërkojmë mësimin nëpër auditore, për seminare për praktika dhe laboratore. Kërkesat janë dorëzuar që ditën e hënë, dhe siç na është thënë dhe që në fillim brenda 10 ditësh presim një përgjigje. Sot është dita e katërt, kështu që brenda javës tjetër do të kemi një përgjigje zyrtare. Profesoreshë Mira Rakacolli iu drejtohet studentëve që nëse auditoret do të rihapen, duhet të kemi një bashkëpunim që studentët të mos jenë burim infeksioni”,- u shprehën studentët.
Alfabeti fonetik egjiptian dhe gjuha shqipe.
Thot-i, ngulmon Katapano, është themeluesi i besimit të DRITËS dhe shkencës kulte të mistereve, është gjithashtu botërisht i njohur si shpikës i shkrimit.
Pikërisht, duke studiuar me shumë kujdes këtë autorësi të fundit, Profesor Katapano zbuloi se Thoti Fliste Shqip dhe se, në hartimin e hieroglifëve të alfabetit fonetik egjiptian, ai u mbështet gjithherët nga fjalët e kësaj gjuhe. Ndërkohë, vargu i ideogramave që e përbëjnë, në këtë rast, kanë një vlerë të vetme fonetike: përfaqësojnë vetëm tingullin nistor – zanor apo bashkëtingëllor – të fjalës shqipe, të cilës i referohet.
Ja disa shembuj nga “Thoti fliste shqip” të zhvilluara pak më tej përmes gjuhës shqipe:
Gërma A përfaqësohet nga shqiponja, pasi pellazgët, ilirët dhe arbërit shqiponjën e kanë quajtur AIN. Shqiponja si simbol përfaqëson parimin e dritës, parimin jetësor mashkullor, frymëdhënës i lëndës. Më kujtohet kur isha fëmijë, shkonim shpesh në fshat te gjyshja me prindërit, të cilët në disa raste më kishin lenë atje një ose më shumë muaj. Dëgjoja gjyshen e ndjerë se si dilte shpesh nga shtëpia dhe shkonte të shikonte pulat që kullosnin prapa shtëpisë në kopshtin aty pranë. Ngrinte kokën nga qielli për të parë dhe kur konstatonte se lart aty rrotull fluturonin shqiponja apo skifterë, ajo thërriste duke tundur dorën: Ain, Ain, Ain, me qëllim që t’i trembte ato nga frika se mos i rrëmbenin pulat e shkujdesura, ose u tërhiqte vëmendjen pulave që të fshiheshin. Kujdes se mbi kokat tuaja po sillen rrotull shqiponjat=AIN, skifterët, shpendët grabitqarë. Thirrja Ain, Ain, nuk ishte e re dhe një shpikje e gjyshes sime, por e trashëguar brez pas brezi. Edhe Thot-i kur krijoi alfabetin fonetik egjiptian 12 mijë vjet më parë, jo pa qëllim simbolit të shqiponjës i vendosi shkronjën A (a).
AIN=Shqiponjë=A në alfabetin fonetik egjiptian.
Gërma B përfaqësohet nga një këmbë deri në pjesën poshtë gjurit. Ç’lidhje ka këmba me gërmën B, do të pyesni me të drejtë ju. BROF (në këmbë) shpreh gjendjen karakteristike të njeriut, të qenies që mendon, në pozicionin drejt, me kryet lartë, duke vështruar pareshtur qiellin. Brof në këmbë, është një fjalë apo një shprehje tejet kuptimplote në gjuhën shqipe, ardhur nga ilirishtja dhe kjo nga pellazgjishtja. Brof=Ngrehu në këmbë, çohu në këmbë. Brof=Ec në këmbë. Brof=Qendro në këmbë dhe vështro yjet, kundro diellin, lufto për të mbrojtur Atdheun tënd, mprehi qetë dhe lëro tokën, vrapo për të përcjellë lajmin e parë të fitores.
B=Brof=Ngrehu, Qëndro, Ec, Vrapo në Këmbë.
Gërma D përfaqësohet nga një dorë e shtrirë, pasi vetëm tek pellazgët-ilirët-shqiptarët dorës i thuhet DORË. Përfaqëson punën e dorës së njeriut; të gjithë ndërhyrjet e njeriut për zotërim, me qëllim që gjërat të bëhen pasuri, të mira të dobishme në funksion të jetës së njeriut. Dora i shtrihet mikut, Dora shkruan historinë, Dora ndëshkon armikun, Dora përkëdhel, Dora qep, Dora mbjell, Dora korr, Dora tregon Universin, Dora drejton anijet…
Dora=D në alfabetin fonetik egjiptian.
Gërma G = GATH = mbërthej, rrethoj, (gardh) vend i rrethuar, për ata që konsideroheshin jo të përshtatshëm shpirtërisht dhe fizikisht, ose për pronën, tokën, kopshtin. Gardhi lindi kur pellazgo-ilirët kaluan nga bashkësia primitive në familje të veçanta patriakale, të cilat nisën të kufizonin pronën e tyre, kasollet, tokën, vathën, duke i kufizuar nga pronat e fqinjëve. Lindja e gardhit ishte procesi i parë i ndarjes nga prona kolektive në bashkësinë primitive të pellazgëve të lashtë, e cila u bë më e qartë në kohën e ilirëve. Por fjala Gath që ka lindur gërmën e parë të tingullit nistor G, ka edhe kuptimin e vathit që rrethonte dhëntë në kohët e vjetra, por edhe në ditët tona. Pra, një vend ku strehoheshin bagëtia pasi ktheheshin nga kullota, ose gjatë stinës së dimrit, rrethohej me shkurre dhe thupra shkurresh dhe quhej Garth, ose…
Gath=G në alfabetin fonetik egjiptian.
Germa H përfaqësohet nga një gërshet, pasi në shqip (arbërisht) gërsheta quhej HJETË, gërshetë=hjetë, kordon, thurje, kryqëzim të tufave të flokëve, të litarëve prej liri. Në jetën ezoterike, pra kur një njeri nga dera princërore vdiste, bëhej balsamosja e trupit të tij. Zakonisht përdoreshin fasha të lyera me esenca dhe dyllë, të cilat kryqëzoheshin apo thureshin si gërsheta për të krijuar një izolim më të sigurt dhe të tendosur mirë që t’i rezistonte kohës. Gërma H ezoterikisht përfaqëson tre planet e jetës: fizike, hyjnore, shpirtërore, na mëson Katapano.
H=Hjetë=Gërshetë.
Gërma K = KUFË përfaqësohej nga enë ujë mbajtëse, kupë, tas, pasi shqiptarët e lashtë enën që mbante ujë ose qumësht e quanin KUFË=enë mbajtëse e ujit. KUFË=enë prej balte të pjekur, enë balte me një vesh për të mbushur ujë në një guvë të fshehur, duke e hedhur në një enë më të madhe si shtamba, ose diçka e ngjashme, ose enë vere. Kjo enë gjatë procesit të zënies së djathit përdoret shumë në baxho për të hedhur apo hequr qumështin, hirën, apo në punishtet e verës etj. Mund të përdoret edhe si Kallëp për derdhje metalesh të çmueshme si ari apo argjendi.
KUFË=K, në alfabetin fonetik egjiptian.
Gërma F përfaqësonte një nepërkë të rrezikshme dy-brirëshe, pasi në dialektin gegë në Malësi, nepërka quhej FJERË. Zvarranikët, sipas shkencës moderne, janë qeniet e gjalla që u shfaqën të parat mbi Tokë, pasi planetin ta kishte mbuluar bimësia, sipas Katapanos.
Fjerë (zvarranik) që del nga bimësia ku ka qëndruar e fshehur dhe zvarriten në tokë. Fjerë=nepërkë e rrezikshme që qëndron fshehur poshtë barit, gurëve apo shkurreve dhe që fishkëllen sapo i afrohet ndonjë rrezik, apo kërcënon dikë që kalon pranë saj, gjuan insekte apo brejtës toke. (Ç.H)
FJERË=F, në alfabetin fonetik egjiptian.
Gërma L përfaqësonte një LUAN, pasi pellazgët, ilirët, etruskët ishin të parët që e quajtën këtë kafshë me emrin LUAN. Të parët banorë të Mesdheut nga Europa kontinentale e deri në kufijtë shkretëtiror të Afrikës pellazgët, ishin të parët që e quajtën mbretin e kafshëve me emrin LUAN. Ata panë së pari një luaneshë që po luante me këlyshët e saj dhe e quajtën Luan. Pra, një kafshë që luante, lozte, që vraponte dhe që gjuan familjarisht. Mashkulli me kreshtën e tij të fuqishme dhe madhështore prinë grupin në shtegtimet ushqimkërkuese dhe që luan, vrapon, sulet mbi prenë e vet për të kapur, rrëzuar dhe vrarë. Më pas vrapojnë pjesëtarët e tjerë të familjes për të ndarë gjahun. (Ç.H)
Pra, Luan=L, në alfabetin fonetik egjiptian, e kështu me radhë deri në shkronjën e fundit të këtij alfabeti shpikur nga Thot-i, duke u mbështetur te gjuha pellazgo-iliro-shqipe.
Përfundimet e studimeve të Xhuzepe Katapanos të kryera në të gjitha drejtimet për 40 vjet, na dëshmojnë se në tokat e Nilit dhe jo vetëm atje, flitej shqip 12.000 vjet më parë. Kjo do të thotë se gjuha pellazge, ILIRISHTJA është shumë më e vjetër se sa besohet zakonisht. Kultura e sjellë në Egjipt nga pellazgët, të cilët konsideroheshin popull i lirë, ose Populli i Lirisë, është shumë e lashtë së paku më shumë se 12.000 vjet, duke kapërcyer edhe shumë parashikime të kumtuara si hipoteza pune në libra apo revista të ndryshme shkencore botërore.
Të nderuar ndjekës shqiptar dhe bijë shqiptarësh, për më shumë ju ftoi të lexoni librin, “Traktati i origjinës së shqiptarëve”. Aty do të gjeni fakte dhe vetëm fakte të vërteta dhe shkencore mbi origjinën tonë pellazgo-ilire dhe gjuhën e shkruar shqipe, të cilat na janë fshehur dhe manipuluar prej shekujsh.
Për shkak të pandemisë, mësimi për studentët në universitetet publike do të vijojë “on-line”.
Fakulteti i Historisë dhe Filologjisë ka njoftuar të gjithë studentët se ky Vit i Ri do të nisë me mësim online. Pritet që edhe fakultetet e tjera të ndjekin të njëjtin hap, pasi vendimi merret nga rektorati dhe u është deleguar fakulteteve.
Sipas njoftimit zyrtar, të martën, më 5 janar të gjithë studentët që frekuentojnë këtë Fakultet duhet që të ndjekin mësimin sërish online, aty ku e lanë 1 vit më parë.
Universitetet vijojnë të jenë të mbyllura dhe studentët tashmë prej muajsh janë në mësim online teksa ende nuk dihet se kur do të rikthehen në auditore.
Gjithçka varet nga ecuria e pandemisë në ditët në vijim, nëse studentët do të kthehen në auditore./NOA.al
Ministrja e Arsimit, Sportit dhe Rinisë, Evis Kushi, njoftoi se shkollat për këtë vit do të mbyllen në datën 23 dhjetor, dy ditë para Krishtlindjeve, ndërsa pas pushimeve dimërore, shkollat do të fillojnë në datën 11 janar 2021.
“Në bashkëpunim me Komitetin e Ekspertëve kemi vendosur që pas pushimeve të fundvitit shkolla të nisë në datën 11 janar dhe jo në 4, siç parashikonte urdhri i mëparshëm”, u shpreh Kushi.
Ndërkohë, në shkolla procesi mësimor vijon i alternuar, në shkollë dhe ‘online’. Ky vendim ka hyrë në fuqi më datën 1 dhjetor. Ndërsa, studentët zhvillojë ‘online’ procesin mësimor.
Kushi e bëri këtë deklaratë gjatë një aktiviteti të zhvilluar në Pustec, ku ishte i pranishëm edhe kryeministri maqedonas, Zoran Zaev.
Që prej 1 dhjetorit në shkolla ka nisur mësimi i alternuar, me prani fizike dhe ‘online’. Ndërkaq në universitete studentët po e zhvillojnë mësimin tërësisht ‘online’.
Më herët. Komiteti Teknik është shprehur se nëse shkollat do të kthehen në vatra infeksioni, atëherë do të bëhet rivlerësim i situatës.
Megjithatë, sipas zv.ministres së Shëndetësisë, Mira Rakacollit, situata paraqitet e qëndrueshme, ku ka një rënie të shtrimeve në spitale dhe rasteve pozitive me koronavirus. /noa.al/
