Arsim

Dita Ndërkombëtare e Shkrimit dhe Leximit, e cila festohet çdo vit më 8 shtator ka për qëllim që të rrisë vëmendjen e opinionit ndërkombëtar në lidhje me problemin e analfabetizmit, i cili fatkeqësisht si proces është prezent në shumë shoqëri.

Ambasada e Shteteve të Bashkuara në Tiranë nënvizon rëndësinë e kësaj dite, sipas së cilës thuhet se shkrimi dhe leximi është çelësi i suksesit në çdo shoqëri.

“Sot është Dita Botërore e Shkrimit dhe Këndimit! Kjo ditë nënvizon rëndësinë që ka njohuria për të shkruar dhe lexuar për individët, komunitetet dhe kombet. Aftësia për të lexuar është rruga e shkëlqimit akademik dhe një çelës suksesi në çdo shoqëri demokratike. Tema e Ditës Botërore të Shkrimit dhe Këndimit këtë vit është “Shkrimi, këndimi dhe shumëgjuhësia”, -thotë ambasada Amerikane.

8 shtatori u shpall nga Organizata e Kombeve të Bashkuara për Arsim, Shkencë dhe Kulturë (UNESCO) në vitin 1967 si Ditë Ndërkombëtare e Arsimimit me qëllim që çdo vit në këtë datë të theksohet rëndësia e shkrimit dhe leximit në jetën e individit dhe shoqërisë në tërësi. /atsh

Shkolla e Mesme e Bashkuar “Mynyr Xhindi” në fshatin Vllahinë të Vlorës i është nënshtruar një rikonstruksioni të plotë duke ofruar kështu kushte bashkëkohore të edukimit të nxënësve.

Në këtë shkollë ku mësojnë 168 nxënës ishte i pranishëm Kryeministri Rama, ku pati edhe disa momente të këndshme mes disa fëmijëve që këtë vit nisin rrugën e dijes. Të shoqëruar nga prindërit, ata po merrnin paketën e librave, paketë që u mundësohet Falas nxënësve nga klasa e parë deri në klasën e pestë.

Kryeministri bashkëbisedoi me një prej fëmijëve që ulej për herë të parë në bankat e shkollës, të cilën e këshilloi që të mirëmbante librat.

Nxënësit e klasës së parë përfitojnë falas paketën e librave ku përfshihet Abetarja dhe fletorja e punës, Matematika, Dituria e Natyrës dhe fletorja e punës, si dhe Edukimi.

“Këto libra do t’i ruash si sytë e ballit. Nuk do t’i zhgarravisësh, nuk do t’i harrosh, nuk do t’i humbësh, nuk do t’i grisësh, por do t’i ruash kështu dhe do t’i hapësh me dashuri dhe kujdes, sepse shok më të mirë se libri nuk ka”, tha Rama.

Shkolla e Mesme e Bashkuar “Mynyr Xhindi” në fshatin Vllahinë të Vlorës i është nënshtruar një rikonstruksioni të plotë duke ofruar kështu kushte bashkëkohore të edukimit të nxënësve. Në këtë shkollë ku mësojnë 168 nxënës ishte i pranishëm Kryeministri Rama, ku pati edhe disa momente të këndshme mes disa fëmijëve që këtë vit nisin rrugën e dijes. Të shoqëruar nga prindërit, ata po merrnin paketën e librave, paketë që u mundësohet Falas nxënësve nga klasa e parë deri në klasën e pestë.

Në të gjithë vendin po vijon shpërndarja e librave falas, për nxënësit nga klasa I deri në të V.

Rreth 220 mijë nxënës përfitojnë këtë vit tekste shkollore falas, ndërkohë që deri para disa vitesh askush nuk përfitonte. /atsh

Me rastin e ditës ndërkombëtare të shkrimit dhe leximit u zhvillua në Qendrën Komunitare Multifunksionale Nishtulla, eventi sensibilizues dhe informues me temë “Edukimi sjell ndryshimin” i cili bëri bashkë institucione publike dhe organizata të shoqërisë civile, fëmijë dhe prindër të komuniteteve të zonës.

Në këtë aktivitet morri pjesë dhe kryetarja e bashkisë së Durrësit Valbona Sako. E drejta për edukim dhe përgjegjësia prindërore ishin thelbi i këtij takimi i cili vijoi me prezantimin e shërbimeve që ofrohen lokalisht për arsimim dhe të mësuarit përgjatë gjithë jetës, reflektim mbi sfidat dhe hapat e nevojshëm që duhen ndërmarrë lidhur me arsimimin dhe formimin përgjatë gjithë jetës dhe përcjelljen e një mesazhi ndërgjegjësues tek i gjithë komuniteti.

Kryetarja e bashkisë Durrës, Valbona Sako në fjalën e saj përshëndetëse theksoi se arsimi është i rëndësishëm për të ardhmen e çdo njeriu dhe të të gjithë shoqërisë.

“Dëshiroj që ditë të tilla të shënuara si Dita Ndërkombëtare e Shkrim-Leximit në një të ardhme sa më të afërt të mos jenë ditë ku të shprehen problematika, po ditë ku të prezantojmë arritje të reja dhe së bashku të gjejmë rrugën më të mirë për të sjellë zhvillim. Edukimi sjell ndryshimin. Duhet të bëhemi një shoqëri e ndërgjegjshme që ta kuptojmë dhe ndihmojmë njëri-tjetrin dhe vetëm duke punuar të gjithë bashkë do të jemi një shoqëri pozitive”, – u shpreh Sako.

Pasi u fol për të drejtën për edukim, të mësuarit përgjatë gjithë jetës dhe përgjegjësitë prindërore, pjesëmarrësit u sqaruan për shërbimet në funksion të arsimit dhe të mësuarit përgjatë gjithë jetës nga përfaqësues të Zyrës Arsimore Vendore, shkollës 9-vjecare ”Isuf Ferra”, Zyrës Rajonale të Punës, Drejtorisë së Shërbimit Social, njësisë administrative 5, Qendrës Shëndetësore “Nishtulla”, Qendrës Sociale “Nehemia”, Organizata “Terres des hommes” dhe organizata “Nisma për ndryshim shoqëror-ARSIS”.

Fëmijëve 3-18 vjeç iu shpërndanë libra artistikë të mundësuar nga Qendra Komunitare Multifunksionale Nishtulla dhe organizata “Terre des hommes” përmes projektit IRMA të financuar prej Qeverisë gjermane në bashkëpunim me GIZ Albania të nxisin sadopak leximin, shkrimin dhe aftësitë shprehëse të 30 fëmijëve.

Aktiviteti përcolli mesazhin “Një fëmijë, një prind, një mësues, një libër, një penë, një fjalë dhe një mundësi mund ta ndryshojë dhe shpëtojë një person, një familje, një komunitet dhe gjithë botën”.

Aktiviteti u organizua nga Këndi i BE-bashkia Durrës, Qendra Komunitare Multifunksionale Nishtulla, “Terre des Hommes” dhe Nisma për Ndryshim Shoqëror ARSIS. //atsh

Kryeministri Edi Rama dhe kryetari i bashkisë së Tiranës, Erion Veliaj ishin sot në konviktet 24 dhe 25 të Qytetit Studenti, aty ku puna po vijon në infrastrukturën e brendshme.

Gjatë inspektimit të punimeve Kryeministri Rama u informua se në Qytetin Studenti ka përfunduar rikonstruksioni 11 konvikteve dhe janë drejt përfundimit edhe 6 godina të tjera, ndërsa 3 të fundit nisin javën e ardhshme.

Në fjalën e tij, Rama theksoi se edhe në qytete të tjera ku ka rezidenca studentore puna po vijon brenda parashikimeve.

“Ne jemi në kohë për t’i akomoduar pjesën më të madhe si duhet. Tani kanë mbetur disa këtu. Plus, Korça ka filluar, Shkodra po ashtu është në proces për të filluar, fillon këto ditë, sepse gjithçka është bërë gati. Po ashtu për Elbasanin, Vlorën dhe Gjirokastrën”, tha Kryeministri Rama.

Drejtoresha e Rezidencave Studentore, Anila Shehu tha se “konvikti 24 ka 88 dhoma, ka një kapacitet prej 240 studentësh. Po punohet në ambientet e përbashkëta. Është duke u ndërtuar një bateri e re dushesh, pastaj do të vazhdohet me rrjetin hidraulik dhe elektrik”.

Ndërsa nga ana e tij, kryetari i bashkisë së Tiranës Erjon Veliaj tha se kanë mbetur dhe tre konviktet e fundit që fillojnë punë javën tjetër.

“Kemi mbaruar 11 totalisht, kemi aktualisht nja 5-6 kantiere të hapura”, – tha kryetari i bashkisë Tiranë, Erion Veliaj, i cili theksoi se sfida e radhës është mirëmbajtja e tyre, për të cilën ideja e punësimit të studentëve si administratorë mbetet zgjidhja më e mirë.

Po ashtu Veliaj shtoi se në Qytetin “Studenti” , ne punësojmë shumë staf, recepsionistë, administratorë, etj.. Çdo gjë ka nevojë për t’u mirëmbajtur.

“Menduam që ideja më e mirë, meqë specialistët janë me paga minimale, është që ne mund të punësojmë studentë. Pra, do të hapim disa vende pune dhe do t’u themi që kemi disa vende pune si administratorë. Po u prishën dushet, po ndodhi diçka, apo ndonjë problem tjetër kemi një administrator që është një prej studentëve”, – tha ai.

Ndërsa Anila Shehu shtoi se përfaqësimi studentor e ka lehtësuar së tepërmi komunikimin me studentët.

“Kemi gjithashtu një përfaqësues student për çdo konvikt, kemi një përfaqësues për kat, i cili gjatë gjithë kohës zgjidh edhe problemet e mirëmbajtjes, edhe problemet e bashkëjetesës, por edhe probleme të ndryshme që mund të kenë studentët. Kur kemi nga një përfaqësues për konvikt është më e thjeshtë për të komunikuar me të gjithë studentët”, – tha ajo.

Veliaj shtoi se Karta e Studentit pritet të fuqizohet nga 1 tetori dhe se skema e saj do të implementohet edhe në qytete të tjera.

“Një gjë e cila na ka shkuar shumë mirë dhe që ne do të vazhdojmë ta fuqizojmë nga data 1 tetor është Karta e Studentit. Presim të lidhim një marrëveshje me një bankë tjetër që i bën interesat zero për studentët, pra, për të hapur një kartë, për të bërë një transaksion, një kredi të butë. Kështu që me Kartën realisht jemi në gjendje që ta implementojmë dhe në qytete të tjera. E kemi skemën gati,” – u shpreh Veliaj.

Kryetari i bashkisë, Veliaj e vlerësoi të suksesshëm bashkëpunimin me sektorin privat, pa ndihmën e të cilët, shumë projekte për ndërtimin e shkollave të reja në Tiranë do të ishin të pamundura.

“Nëse i shikojmë gjërat, pavarësisht nga debatet, – flas për Tiranën, – shkollat, inceneratorët, kjo historia me spitalet, janë disa nga projektet ku bashkëpunimi me privatin ka qenë histori suksesi. Inceneratori i Tiranës nuk do ishte bërë kurrë me forcat tona. Po ashtu me shkollat e Tiranës, ku sot kemi 16 kantiere të hapura.”

Në fund, Kryeministri Rama pohoi se bashkëpunimi me sektorin privat ka qenë zgjidhja e duhur për shumë vepra të rëndësishme në vend.

“Pa diskutim që ky është i vetmi mekanizëm. Sot pashë videon e re nga Rruga e Arbrit, ajo është bërë spektakël, ka shkuar deri në gjysmë të rrugës. Është një fond që qeveria nuk e kishte, se po ta kishte do ta kishte bërë 30 vjet. Nga ana tjetër, këto nuk shikohen të veçuara. Sepse dikush mund të pyesë, pse nuk i keni ju 300 milionë? Por nuk janë vetëm këto që duhen, sepse janë dhe 1500 gjëra të tjera. Qeveria nuk i mbledh të gjitha në një vend. Ndërkohë që Rruga e Arbrit mbaron brenda 2021 dhe ne shlyejmë deri në 2031, që do të thotë njerëzit 10 vjet e gëzojnë, ndërkohë që me atë lloj ritmi do të ishin dashur 13 vjet ta bënim. Këtu krijohet ideja se, kur këtu fton privatin, ai merr lekët e shtetit dhe ikën. Ai hedh lekët e veta për një periudhë kohe, sa të garantohet ai shërbim apo ajo vepër dhe publiku e përfiton pa asnjë shpenzim ekstra, ndërkohë që qeveria paguan pastaj me këste deri kur ta shlyejë dhe i kthehet në pronën e vet”, – tha Kryeministri. /?atsh