Arsim

“Arsimi profesional nxit punësimin e të rinjve”, u shpreh kryetari i Kuvendit, Gramoz Ruçi, i cili përshëndeti sot nxënësit, mësuesit dhe prindërit e shkollës “Petro Sota”, Fier, me rastin e fillimit të vitit të ri shkollor.

“Sot rreth 42 mijë nxënës, të ushqyer nga dituria, pasioni dhe talenti i rreth 3.400 mësuesve, në 168 shkollat e qarkut të Fierit nisin takohen e ritakohen në vendin më të bukur në botë. Në shkollë, që merr jetë nga zërat e nxënësve, që zbukurohet nga bukuria juaj, që ndriçohet nga drita juaj, që fisnikërohet nga çiltërsia juaj”, tha Ruçi.

“Arsimi dhe kërkimi shkencor janë themelet e ndërtimit të së ardhmes, rruga kryesore e progresit dhe e përballimit të sfidave të integrimit euroatlantik, janë një e mirë publike, e cila realizohet nga arsimi publik, por edhe ai privat. Nuk ka një sektor tjetër ku publikja dhe privatja të jenë thirrur në një mision tërësisht e thellësisht publik: përgatitjen profesionale të gjeneratave të reja”, theksoi Kreu i Kuvendit.

Ne, vijoi ai, “po ndërtojmë një sistem arsimor, i cili nuk jep vetëm dije e nuk krijon vetëm shprehi, por kultivon e konsolidon identitetin kombëtar, zhvillimin e intelektit, formimin kulturor dhe të vlerave qytetëruese e morale, edukon dhe krijon të bukurën, forcon vetëdijen e përgjegjësinë individuale, komunitare e shoqërore, shpirtin e sipërmarrjes dhe aksesin në teknologjitë e reja dhe inovacionin”.atsh

Një qytetare nga Tirana i është drejtuar me një mesazh kryeministrit Edi Rama pasi nuk po arrinte të regjistronte fëmijën e saj në shkollën e mesme “Petro Nini Luarasi”, në Tiranë.

Në mesazhin drejtuar kryeministrit Rama dhe duke i kërkuar një zgjidhje, qytetarja thotë se prej 10 ditësh është paraqitur në shkollë për të regjistruar të bijën dhe në ditën e fundit i kanë mbyllur derën. Ndërkohë thotë ajo, në shkollë janë regjistruar disa vajza edhe pse nuk ishin banore të lagjes.

“Përshëndetje Kryeministër!Jam një prind.Vajza ime ka mbaruar shkollën 9-vjeçare te Konferenca e Pezës. Banoj te Stadiumi Dinamo.Kam 10 ditë që që shkoj të shkolla Petro Nini dhe nuk ma regjistrojnë, ndërkohë që I takon. Disa shoqe të saja janë regjistruar pa problem ndërkohë që nuk janë as banore të lagjes. Nxirrni justifikime të ndryshme për të mos ma regjistruar dhe sot në ditën e fundit ma mbyllën derën. Ndërkohë vajzën e kam të shkëlqyer me 10-ta. Nuk e di çfarë të bëj sepse të hënën fillon shkolla. Ju lutem më jepni një zgjidhje, kam besim tek ju”, shprehet qytetarja në mesazhin drejtuar kryeministrit.

Pasi problemi iu zgjidh, qytetari i shkroi sërish Kryeministrit duke e falënderuar: Fale minderit janë të pakta për zgjidhjen që më dhatë. Qofshi prind i lumtur.

Nga ana e tij, Rama i përgjigjet duke u shprehur se: “ S’ka nevojë për falenderime, detyrë dhe kënaqësi të ndihmosh këdoqoftë, po sidomos kalamajtë me 10-ta”.atsh

Në ndërtesën emblematike të historisë së arsimit shqip, Mësonjëtorja në Korçë kanë nisur punimet për rikonstruksionin e saj. Rikonstruksioni i kësaj ndërtese pritet të përfundojë para fundit të vitit.

Ky rikonstruksion do t’i shtojë një tjetër vlerë qytetit të serenatave duke e shndërruar në një destinacion kulturor dhe historik të denjë për turistë vendas dhe të huaj.

“Ndërtesa emblematike e historisë së arsimit shqip, Muzeu ABC në Korçë po i nënshtrohet rikonstruksionit. Kishte ardhur koha që Mësonjëtorja, ky objekt-dëshmi i arsimdashjes dhe kurajës, t’i kthehej jo vetëm korçarëve, por gjithë Shqipërisë, sipas të gjithë parametrave bashkëkohorë, por duke ruajtur karakterin e saj monumental”, u shpreh ministrja e Kulturës Elva Margariti.

“Pas sondazheve, do të fillojnë punimet në të gjithë strukturën, mure, çati, dyer e dritare të amortizuara nga koha, për të vijuar me rrjetin elektrik, sistemin e ngrohjes, të mbrojtjes nga zjarri. Para fundit të vitit, gjithçka do të jetë gati”, tha ministrja Margariti. /atsh

Një investim i Qeverisë shqiptare, si një premtim i mbajtur, në kuadër të Paktit për Universitetin, është rikonstruksioni i Universitetit të Arteve në Tiranë. Studentët e këtij Universitetit do të kenë shumë shpejt ambiente të reja mësimore dhe kreative.

Ministrja e Kulturës Elva Margariti së bashku me rektorin Kastriot Çaushi kanë qenë sot për të ndjekur nga afër punimet në këtë objekt.

“Ndërtesa historike, monument kulture, po i nënshtrohet një rikonstruksioni total të ambienteve të brendshme, që konsiston në sisteme të reja elektrike, hidraulike dhe ngrohje, si dhe punime të restaurimit të fasadës. Do konsolidohen kornizat e dritareve dhe do ndërrohen ato ekzistuese, të cilat janë tepër të degraduara, në bazë të modelit origjinal. Ka filluar procesi i izolimit të soletës dhe gjithashtu instalimet hidraulike dhe elektrike. Shpresojmë që në semestrin e dytë të këtij viti akademik, studentët të hyjnë në ambiente të reja, më komode dhe motivuese për krijimtarinë e tyre artistike”, theksoi Margariti./atsh

Ambasada e Italisë në Shqipëri ka dorëzuar sot gjashtë bursa për studentë më të mirë të cilët do të mbështeten nga Ambasada për nëntë muajt e ardhshëm.

Ambasada ka theksuar se, “gërshetimi i kulturës shqiptare dhe italiane bëhet gjithnjë e më i ngushtë falë mendjeve të reja që vendosin të studiojnë në Itali”.

“Janë dorëzuar sot gjashtë bursa për studentë më të mirë të cilët do të mbështeten nga Ambasada për nëntë muajt e ardhshëm. Ambasada e Italisë në Tiranë ka kënaqësinë të mbështesë dhe të kontribuojë në forcimin e mëtejshëm të kësaj lidhjeje”, ka nënvizuar Ambasada e Italisë.

Rocco Romano-n, shef i Kancelarisë Konsullore i ka dorëzuar sot bursën studentit Beqir Llani, i klasifikuar në vend të parë. Beqiri do të ketë mundësinë që të vazhdojë studimet në Inxhinierinë Mekatronike në Universitetin e Romës “Tor Vergata”./atsh

Kristina, studente e sapodiplomuar pas aplikimit pranë Zyrës Vendore të Punësimit në Tiranë u punësua pranë një subjekti.

Kristina pas diplomimit u përfshi në programet e Nxitjes së Punësimit nga Zyra e Punësimit Tiranë dhe u referua pranë një institucioni të administratës publike për të kryer praktikën profesionale.

Shërbimi Kombëtar i Punësimit ka bërë të ditur se në përfundim të programit, ajo sërish u trajtua si punëkërkuese dhe në përshtatje me profilin e saj akademik, iu ofruan disa pozicione pune.

Nga intervistat e zhvilluara, Kristina rezultoi fituese pranë një subjekti në pozicionin arkëtare zyre.

Modernizmi i Zyrave të Punës ka mundësuar shërbim më të mirë për qytetarët./atsh