Arsim

Në gjimnazin “Ismail Qemali” në Tiranë është organizuar sot takimi me maturantët e këtij viti për prezantimin e risive dhe ndryshimeve të Maturës Shtetërore.

E pranishme në këtë aktivitet ka qenë zëvendësministrja për Arsimin Parauniversitar, Nina Guga dhe drejtoresha e Qendrës së Shërbimeve Arsimore, Rezana Vrapi.

Ndryshimet thelbësore në rregulloren e “Maturës Shtetërore 2020” kanë qenë fokusi kryesor i këtij prezantimi. Disa prej tyre janë vlerësimi elektronik i provimeve, rritja e cilësisë së administrimit të provimeve, shtimi i masave disiplinore etj.

Njëkohësisht, nxënësit dhe mësuesit u njohën me dy botimet e fundit të QSHA-së: “Matura Shtetërore Gjuha Shqipe dhe Letërsia” dhe “Matura Shtetërore 2019, teste dhe skema vlerësimi, gjuhët e huaja, matematika dhe lëndë me zgjedhje (për gjimnazin)”, të cilat do t’i orientojnë nxënësit dhe do t’i ndihmojnë ata për t’u përgatitur më mirë./atsh

Së shpejti, Ministria për Europën dhe Punët e e Jashtme do të hapë thirrjen tjetër për specialistë e ekselentë të rinj, me qëllim forcimin e diplomacisë së Shqipërisë dhe rritjen e cilësisë së përfaqësimit ndërkombëtar të saj.

Nëntë diplomatë të rinj të cilët i janë bashkuar së fundmi politikës së jashtme. Ministri në detyrë për Europën dhe Punët e Jashtme, Gent Cakaj i ka cilësuar ata pjesë të përpjekjes strategjike për forcim të trupës diplomatike të Shqipërisë.

“Tashmë kemi edhe një gjeneratë më shumë të diplomatëve të rinj në sistemin e karrierës së diplomacisë së Shqipërisë! Diplomatët e rinj iu bashkuan sistemit të karrierës diplomatike si pjesë e përpjekjes strategjike për forcim të trupës diplomatike të Shqipërisë dhe ripërtëritjen e kuadrove të saj”, -tha Cakaj.

Më tej, ministri i Jashtëm ka falënderuar edhe ministrin e Jashtëm të Republikës së Kosovës, Behgjet Pacolli i cili do të jetë mentor i kësaj gjenerate.

“Shumë shpejt do të vazhdojmë me një thirrje tjetër të hapur për specialistë e ekselentë të rinj me qëllim që të forcojmë diplomacinë e Shqipërisë dhe rrisim cilësinë e përfaqësimit ndërkombëtar të saj”,-thotë Cakaj./atsh

Ministria e Financave dhe Ekonomisë, Anila Denaj, mori pjesë sot në forumin e diskutimit zhvilluar me brezin e parë të studentëve të ekselencës, të punësuar pranë MFE dhe në institucionet e saj të varësisë.

Denaj bisedoi me ta mbi sfidat e hasura gjatë këtij rrugëtimi dhe mbi të ardhmen e tyre në vijim të Paktit për Universitetin.

“Studentët e ekselencës janë të rëndësishëm për të sjellë një frymë të re në administratën publike. Në MFE kemi vlerësuar këtë kontigjent të rinjsh dhe kemi ofruar mbështetje përmes trajnimeve të nevojshme dhe një integrimi të plotë në vendin e punës”- tha Denaj.

Përfundimi me sukses i testimeve dhe përfshirja e tyre në shërbimin civil do të ishte përmbyllja e duhur e këtij rrugëtimi, vijoi ministrja, ndërsa i uroi suksese brezit të parë në këtë finalizim dhe një vit po aq të mbarë për brezin e dytë të studentëve ekselentë.

Në kuadër të Paktit të Universitetit, pranë Ministrisë së Financave dhe Ekonomisë dhe institucioneve të saj të varësisë u punësuan rreth 175 studentë të ekselencës, nga 350 studentë pranë administratës publike në tërësi./atsh

Rikonstruktohet konvikti i vajzave të Universitetit “Ismail Qemali” në Vlorë, teksa së shpejti starton gara për Kampusin e Madh të Universitetit të Tiranës.

Lajmin e ka dhënë Kryeministri Edi Rama, i cili ka publikuar një video nga transformimi rrënjësor që ka pësuar konvikti i vajzave të Universitetit “Ismail Qemali” në Vlorë.

Për rikonstruksionin e konviktit të vajzave në Vlorë është bërë zëvendësimi i dritareve, veshje me kapot termik. Sallë leximi dhe dushe në çdo kat, ngrohje qendrore, lavaman në çdo dhomë, shkallë emergjence, kuzhinë në çdo kat, sistem kamerash.

“Nga puna që vijon në kantieret e Paktit për Universitetin, Ju uroj një ditë të mbarë me konviktin e vajzave të Universitetit “Ismail Qemali” në Vlorë, teksa së shpejti starton gara për Kampusin e Madh të Universitetit të Tiranës”, është shprehur kryeministri Rama.

Ndërtesa e amortizuar 5-katëshe i konviktit të vajzave ka ruajtur vetëm strukturën bazë, ndërsa gjithçka tjetër u ringrit rishtas si një mjedis modern dhe bashkëkohor për 300 studentet e saj./atsh

https://www.facebook.com/edirama.al/videos/587263318721480/?t=0

Sipas përfundimeve që demonstroi Programi i Vlerësimit Ndërkombëtar të Nxënësve “PISA 2018”, 87% e nxënësve shqiptarë “ndjejnë se i përkasin shkollës” – shifër kjo krahasimisht më e lartë se vendet e tjera të rajonit.

Ministrisë së Arsimit, Sportit dhe Rinisë (MASR) ka publikuar disa të dhëna sipas gjetjeve të “PISA 2018” ku thuhet se 65% e nxënësve në Shqipëri presin të përfundojnë një diplomë shkencore, ndërkohë që 75% e nxënësve që janë ekselentë të paktën në një fushë të “PISA”, aspirojnë të përfundojnë “Master Shkencor” ose “Doktoraturë”.

MASR nënvizon gjithashtu se nxënësit me ndjenjë të lartë përkatësie ndaj shkollës janë mbi 1 vit shkollor më të avancuar sesa nxënësit me ndjenjë më të ulët përkatësie.

“Nga mënyra se si vlerësohet nxënësi në këtë lloj testimi përmes pikëve (60 pikë=2 vite shkollore), rezulton se nxënësit me ndjenjë më të lartë përkatësie ndaj shkollës, në lexim, matematikë dhe shkencë kanë marrë mbi 30 pikë më shumë sesa nxënësit që ndjenjën e përkatësisë ndaj shkollës e kanë më të ulët”, thekson MASR.

“Kjo do të thotë se në aplikimin e njohurive të marra, ata nxënës që “shkojnë me qejf” në shkollë janë mbi 1 vit shkollor më përpara. Fatmirësisht, 87% e nxënësve shqiptarë ndjejnë se i përkasin shkollës”, përfundon MASR./atsh

Studentët shqiptarë kanë mundësi punësimi sezonal në Gjermani gjatë pushimeve verore.

Ambasada e Gjermanisë ka publikuar një thirrje nga Qendra Gjermane e Informacionit për Migracion, Arsim Profesional dhe Karrierë, (DIMAK Albania) në lidhje me 4 hapat që duhet të ndjekin studentët shqiptarë që dëshirojnë të aplikojnë për punësim sezonal në Gjermani.

Së pari ata duhet të lexojnë me vëmendje fletën e informacionit. Më pas duhet të shkarkojnë dhe plotësojnë elektronikisht formularin e aplikimit dhe vërtetimin nga Universiteti/Shkolla Profesionale.

Së treti duhet të fotokopjojnë pasaportën, vërtetimin e dijeve të gjermanishtes (nëse kanë) dhe lejen e drejtimit (nëse kanë).

Së katërti duhen dorëzuar dokumentet origjinale pranë DIMAK Albania deri më 14 shkurt ora 15:00

DIMAK Albania thekson se, “përmes Facebook do të publikojmë edhe sesionet e ardhshme informuese ku ju mirëpresim për një prezantim të programit, si dhe t’u përgjigjemi pyetjeve që mund të keni. Na ndiqni rregullisht për t’u njoftuar në kohë mbi aktivitetet”.

Synimi i qendrës së informacionit DIMAK është sjellja në një vend të përbashkët e ofertës informues gjermane dhe e ofertës ekzistuese në Shqipëri rreth temës së migrimit legal në Gjermani dhe veçanërisht rreth temës së nxitjes së punësimit për qytetarët shqiptarë./atsh

“Parlamenti i Nxënësve”, i themeluar në 2019 do të shërbejë si një forum ku do të dëgjohet zëri i nxënësve.

Ky forum do të jetë në funksion jo vetëm të përmirësimit të cilësisë së arsimit, por edhe eksperiencës së tyre shkollore.

Ministria e Arsimit, Sportit dhe Rinisë, bën të ditur se “vitin që lamë pas dhe për herë të parë në Shqipëri u themelua “Parlamenti i Nxënësve”, i cili do të shërbejë si forum ku do të dëgjohet zëri i nxënësve në funksion jo vetëm të përmirësimit të cilësisë së arsimit, por edhe të eksperiencës së tyre shkollore”.

Angazhimi në “Parlamentin e Nxënësve” përbën një ushtrim demokracie dhe vullnetarizmi.” Deputetët e rinj mësojnë për vlerat e të shërbyerit bujar në komunitet, ku punohet jo për interesin personal por për të mirën publike dhe interesin e përbashkët të të gjithë nxënësve./atsh