Arsim

Data e zgjedhjeve për organet drejtuese të Institucioneve Publike të Arsimit të Lartë (IAL) shtyhet deri në një moment të dytë kur mund të sigurohet pjesëmarrje më gjithëpërfshirëse e studentëve.

Ministrja e Arsimit, Sportit dhe Rinisë Besa Shahini deklaroi sot se procesi përgatitor i zgjedhjeve duhet të vazhdojë në mënyrë që IAL-të të jenë gati të fillojnë fushatën zgjedhore menjëherë pas shpalljes së datës.

Në urdhrin e Ministrisë së Arsimit, Sportit dhe Rinisë thuhet se shtyrja vjen për shkak të gjendjes së fatkeqësisë natyrore të shkaktuar nga pandemia e COVID-19, deri në një datë të caktuar nga Ministria e Arsimit, Sportit dhe Rinisë.

Ndërkohë, ministrja Shahini risolli në vëmendje të udhëheqësve të arsimit të lartë publik planifikimin e mbylljes së suksesshme të vitit akademik për studentët./atsh

Ministrja e Arsimit, Sportit dhe Rinisë, Besa Shahini tha se po merren të gjitha masat që shkollat të jenë gati për rikthimin e maturantëve në klasa në 18 maj deri në 5 qershor, ndërsa mbetet zgjedhje e tyre nëse do të duan të marrin pjesë në konsultime.

“Të gjitha masat po merren, bashkitë po bëjnë punën e vet, por edhe ne përmes drejtorisë së Përgjithshme të Arsimit Parauniversitar, po bëjmë përgatitjet tona. Nëse nxënësit ndjehen se mund ta bëjnë provimin e maturës pa bërë këto konsultime mund të përgatiten vetë në kushte shtëpie. Mësimi online është zhvilluar gjatë gjithë kësaj kohe. Ka patur edhe transmetim në RTSH, leksione specifike për maturantët. Ka çdo ditë informacion shtesë për strukturën e testit dhe mënyrën sesi do të zbatohet ai. Kështu që një maturant që është duke i ndjekur të gjitha këto informacione, është plotësisht i përgatitur që ta bëjë provimin pa ardhur në shkollë. Nëse ndjehet shumë rehat, të vijë në shkollë. Por pjesa dërrmuese e letrave që kemi marrë nga maturantët është për kthim në shkollë dhe kjo është ajo që na ka shtyrë të shohim nëse është e mundur të bëhet ky kthim. Shumica dërrmuese kërkojnë kthimin në shkollë, kanë nevojë të bëjnë konsultimet përfundimtare me mësuesit e tyre para se të bëjnë testin”, u shpreh Shahini.

Shahini sqaroi faktin se edhe pse pyetjet e maturës do të jenë të gjitha me alternativa, shkalla e vështirësisë është po e njëjta me testet e kaluara. “Pyetjet me alternativa nuk e dobësojnë testin, e thjeshtëzon dhe shkurton kohën që i nevojitet nxënësit për ta plotësuar. Një pjesë e pyetjeve, duhet të zgjidhen. Pra një pjesë e pyetjeve duhet të zgjidhen, edhe pse përgjigja është me alternativa nxënësi duhet të kalojë kohë për të zgjidhur detyrën në mënyrë që të dijë se cila është përgjigja e saktë. Nxënësi duhet të jetë në gjendje të lexojë një tekst relativisht të gjatë, në mënyrë që të përgjigjet saktë, duhet të ketë një vëmendje të shtuar për tekstin që e lexon. Pra modifikimi është që të na mundësojë të shkurtojmë kohën që nxënësi kalon me provimin, pra që të mos bëjë zgjidhje të gjata të detyrave dhe shkrim të gjatë të eseve dhe na mundëson korrigjimin digjital që të mos jemi të detyruar të mbledhim një numër të madh të mësuesve në salla të cilat shfrytëzohen për të korrigjuar provimet”, sqaroi ministrja Shahini.

Sipas saj, që të bëhet korrigjimi digjital është hartuar teksti me alternativa, por këto nuk janë pyetje të lehta. Një pjesë e pyetjeve prapë kërkojnë zgjidhje, në mënyrë që të jepet përgjigja e saktë, sidomos për shkencat dhe matematikën./atsh

Ministrja e Arsimit, Besa Shahini deklaroi sot se urdhri për marrjen e masave për vitin akademik 2019-2020 kërkon nga universitetet të fillojnë një planifikim urgjent e serioz për mbylljen e vitit akademik në kushtet e jashtëzakonshme në të cilat po punojmë.

“Situata me përhapjen e COVID-19 në Shqipëri po shkon drejt përmirësimit nga dita në ditë, po nuk jemi ende jashtë rrezikut, ndaj çfarëdo hapje e pjesshme e universiteteve duhet të shoqërohet me protokolle strikte për ruajtjen e shëndetit të studentëve dhe pedagogëve”, u shpreh Shahini.

Ndaj, vijoi ajo, kemi kërkuar nga universitetet që të planifikojnë se cilat janë ato lëndë që mund të mbyllen online, pra që nuk do të ketë nevojë që studentët të kthehen në auditorë, numrin e studentëve që kanë nevojë të kthehen në auditorë dhe laboratorë dhe se sa është numri i saktë i studentëve që do të futen në provime gjatë korrikut të këtij viti.

Ministrja bëri të ditur se universitetet kanë afat deri me 15 maj që të sjellin këto plane

“Më pas, në bashkëpunim me ministrinë e Shëndetësisë ne do të hartojmë protokolle se si do të operohet për ruajtjen e shëndetit të studentëve dhe pedagogëve gjatë kohës që ata do të rikthehen në auditorë apo laboratorë.

Ministrja informoi më tej, se gjatë ditës së sotme ajo kishte komunikuar me rektorët e universiteteve publike dhe se ata i kishin konfirmuar se kanë nisur punën për të hartuar planet.

“Ndryshe nga sa pretendoi pozita gjatë fundjavës së shkuar që bëri një keqinterpretim kaotik të qëllimshëm, universitetet nuk janë të paqarta dhe kanë nisur nga puna për të siguruar shërbimin më të mirë e cilësor që studenti i tyre meriton”, deklaroi Shahini. /atsh

Ministrja e Arsimit, Sportit dhe Rinisë, Besa Shahini ka deklaruar se nxënësit që duan të vijojnë konsultat online pas 18-majit dhe nuk duan të vijojnë në klasë, do të mund të vijojnë nga shtëpia.

Përmes një videomesazhi, Shahini ka sqaruar se nga data 4 maj do të jetë Rozana Vrapi, Drejtore e Qendrës së Shërbimeve Arsimore që do informojë mbi detajet e provimeve të maturës.

“Nga data 4 maj Rozana Vrapi, Drejtore e Qendrës së Shërbimeve arsimore çdo ditë do ju informoj mbi detaje të ndryshme për provimet e maturës, jo vetëm për përmbajtjen e testit, por dhe për elementë të administrimit, që do të jeni plotësisht të informuar përpara se të bëni provimin. Paralelisht Akademi.al ka xhiruar pyetje dhe zgjidhje të detyrave për provimet kryesore në matematikë dhe shkenca, do transmetohen në RTSH. Sivjet do jeni më të përgatitur si kurrë më parë për provimet e maturës”,- tha Shahini.

“Kthimi në shkollë nuk është i detyrueshëm, por dyert janë të hapura për maturantët që duan të kenë konsultim në klasë. Nëse mendoni dhe keni besim se ia dilni edhe pa konsultat mund të vijoni nga shtëpia gjatë kësaj kohe e të punoni individualisht dhe duhet të lajmëroni Drejtorinë e shkollës para datës 11 maj me qëllim që të planifikojnë uljen e nxënësve nëpër klasa dhe distancimin social”,- thekson Shahini.

Lidhur me nxënësit që ndodhen jashtë vendit, Shahini tha se “më datë 11 maj është e mundur të merret një vendim për hapjen ose jo të kufijve, nëse s’kemi një vendim deri atëherë do merremi me ju individualisht, nëse hapen kufijtë s’do keni problem të vini. Për çfarë do arsye nuk do të ktheheni përpara 18 majit, do vijojmë punën përmes mësimit online dhe në qershor do jeni gati për të dhënë provimet e maturës”,- tha Shahini.

“Jo nuk do ketë nevojë të punohet të shtunë e të diel. Do jenë tri javë për përgatitje për maturën shtetërore dhe do të mjaftojë koha e paracaktuar. Fatkeqësisht sivjet s’do ketë mbrëmje mature, pasi nuk mundësojnë distancimin social. Do gjenden forma të tjera për të festuar”,- tha ministrja Shahini. /atsh