Aktualitet

Komisioni i Sigurisë Kombëtare ka shqyrtuar dje veprimtarinë e Shërbimit të Çështjeve të Brendshme dhe Ankesave. Vetë drejtoresha e sapozgjedhur e SHÇBA-së, Anila Trimi ishte në komision ku raportoi para deputetëve të gjithë veprimtarinë e këtij institucioni gjatë 2017.

Por ndonëse mbledhja u zhvillua me dyer të mbyllura për shkak të informacionit të klasifikuar gazeta ka mundur të zbardh raportin e SHÇBA-së për vitin 2017. Sipas raportit të Shërbimit të Çështjeve të Brendshme dhe Ankesave që drejtoresha Anila Trimi prezantoi, gjatë vitit 2017 janë gjetur me shkelje 88 punonjës policie më shumë se një vit më parë.

Pra në ndryshim nga 2016, ku në Prokurorinë e Përgjithshme u depozituan materiale kallëzues për 171 efektivë, në 2017-ën numri i efektivëve të kallëzuar penalisht është 259 policë, shkruan gazeta Sot. Por përveç këtij fakti, është mësuar gjithashtu se drejtoresha Trimi deklaroi në Komisionin e Sigurisë se janë proceduar penalisht edhe 6 oficerë të SHÇBA-së për faktin se, sipas saj, janë gjetur me shkelje. “Drejt kësaj filozofie po shkojmë. Gjatë vitit 2017 janë regjistruar 6 raste ku vetë oficerë të SHÇBA-së janë gjetur me shkelje të ligjit”, mësohet të ketë thënë drejtoresha e SHÇBA-së gjatë mbledhjes me dyer të mbyllura në Komisionin e Sigurisë Kombëtare.

Hetim efektivëve për ngjarjet në Rrugën e Kombit

Veprimet e policisë më 31 mars në Rrugën e Kombit, ku Forcat e Ndërhyrjes së Shpejtë u përleshën me protestuesit e Kukësit po hetohen. Një gjë të tillë e ka konfirmuar vetë drejtoresha e SHÇBA-së, Anila Trimi, e cila përveç se e deklaroi një gjë të tillë para deputetëve në Komisioni e Sigurisë, e pohoi atë edhe para mediave.

Në përfundim të mbledhjes, drejtoresha e SHÇBA, u shpreh para mediave se ka nisur një hetim ndaj veprimeve të policisë por deri tani nuk është arritur në asnjë konkluzion. “Veprimet e Policisë me protestuesit në Rrugën e Kombit po hetohen. Kemi kryer inspektim, por nuk kemi arritur ende në konkluzione. Do njoftoheni kur të merret vendimi në lidhje me veprimet e policisë”, u shpreh para mediave, drejtoresha Anila Trimi.

Ndërkohë, për sjelljen e policisë ditën e protestës kundër taksës në Rrugën e Kombit, që përfundoi me djegien e kabinave të koncesionarit si dhe me disa të plagosur si në radhët e protestuesve ashtu dhe në radhët e efektivëve, është mësuar se po heton edhe Prokuroria e Kukësit, pasi ka dyshime për veprime arbitrare.

Policët e korruptuar drejt largimit

Edhe pse nga viti në vit SHÇBA arrin të identifikojë punonjës të shumtë në shkelje të detyrës duket se së shpejti rastet do të jenë shumë të pakta. Kjo për faktin se prej disa ditësh ka filluar vetingu në radhët e policisë dhe të gjithë efektivët do të kalojnë në sitën e skanimit.

Skanim që do të mundësojë largimin nga detyra të të gjithë efektivëve të implikuar në botën e krimit dhe korrupsionit. Kujtojmë këtu që gjatë viteve të fundit ka pasur shumë raste ku efektivë të lartë policie janë përfshirë në trafikun e kanabisit apo dhe atë të kokainës. Madje, një nga rastet më të fundit ka qenë ai i tre efektiveve të Vlorës të cilët bashkëpunonin me trafikantë të kanabisit. Efektivë që janë shpallur në kërkim nga policia.

Qeveria ka nisur përgatitjet për sezonin e ri turistik. Dje kryeministri Edi Rama ka mbledhur në një takim krerët e bashkive dhe prefektët ku i ka porositur që të marrin masat e duhura. Nga ana tjetër shefi i qeverisë tha se nuk do ketë tolerim ndaj asnjë biznesi.

“Hedhja e mbeturinave vend e pa vend, nga njëra anë, ndotja përmes derdhjes së ujërave të zeza nga hotelet apo nga lokalet, nga ana tjetër, si dhe zhurmat duhen sanksionuar në mënyrën më ekstreme dhe nuk ka ekstrem që të jetë i mjaftueshëm karshi këtyre karshillëqeve ekstreme, të zhvilluara e të kthyera në traditë për kaq shumë vite. Këshillat bashkiakë mund dhe duhet ta marrin një masë të tillë, në mënyrë që të gjitha forcat tona, të gjitha agjencitë ligjzbatuese të ushtrojnë të gjithë kontrollin e nevojshëm dhe të gjitha të ardhurat nga gjobat për këto dëme t’i kalojnë çdo bashkie, sikundër është e merituar. U kemi dhënë prej muajsh, hoteleve dhe lokaleve që derdhin ujëra të zeza në det, mesazhin e qartë që pas 1 qershorit nuk do tolerohen”, tha ai.

Rama tha se do të shmanget çdo lloj forme inspektimi apo kontrolli që krijon pakënaqësi tek pushuesit, por sanksionet për këto struktura do të jenë shumë të rënda.

“Gjëja që duhet të bëjnë është të futen në kornizën e kontratës që kanë me shtetin, kur kanë marrë lejen për të ndërtuar në këto territore dhe ku kanë kusht të shkruar në lejen mjedisore, depurimin e ujërave të zeza me instalime të brendshme të tyre, siç e bën e gjithë bota, aty ku nuk ka një infrastrukturë të lidhur të sistemit të ujërave të zeza me infrastrukturën e përgjithshme. E njëjta gjë vlen për sa i përket respektimit të ligjit për interesin e çdo konsumatori, kur vjen puna tek kontributet e hotelerisë. E kemi ulur 6% TVSH-në për hotelet në rang republike. Nuk mundet më të tolerohet asnjë mashtrim me numrin e pushuese, aq më tepër që të dhënat i kemi shumë të qarta, janë të gjitha plot e përplot përgjatë gjithë sezonit turistik”,  citon “Sot”.

Kryeministri problem cilësoi dhe zhurmën e lokaleve. Ai u shpreh se dhe për të do të merren masa.

“Nëse një problem i madh, i përvitshëm, një sëmundje kronike e sezonit tonë turistik janë zhurmat vend e pavend, që krijojnë shpesh herë tension, stres dhe në vazhdimësi pakënaqësi për pushuesit, ky problem nuk mund të zgjidhet në mënyrë të njëanshme. Ai zgjidhet duke përcaktuar qartësisht në secilën bashki, zonat dhe oraret mbi të cilat duhet të vigjilojnë forcat që kanë përgjegjësinë shtetërore për ta bërë këtë punë dhe për të garantuar qoftë që jashtë këtyre zonave dhe jashtë këtyre orareve të mos shqetësohet askush, qoftë ata që duan të bëjnë zhurmë e të kënaqen me zhurmën gjithë natën, ta kenë këtë mundësi në pika të specifikuara dhe larg atyre që me të drejtë nuk duan të shqetësohen”, tha ai.

Pas publikimit të lajmit se ambasadori amerikan në Tiranë, Donald Lu i ka kërkuar Ardiatik Llallës arrestimin e Ilir Metës, Ish-Kryeministri Sali Berisha deklaroi se dhe ambasadorja e BE-së ka kërkuar arrestimin e tij.

Por në një reagim të Delegacionit të Bashkimit Europian në Tiranë pas akuzave të ish-Kryeministrit nuk kanë pranuar të komentojë deklaratat e ish-Kryeministri, të cilat i quajti trillime të pabaza.

“Bashkimi Europian nuk komenton rreth trillimeve, të cilat janë krejtësisht të pabaza”.

Në një intervistë në studion e ABC Neës, ish-Kryeministri tha se Llalla ia kishte raportuar ish-Presidentit Nishani kërkesën e zonjës Vlahutin, ndërsa ai vete e kishte mësuar nga diplomatë të huaj.

Berisha nuk bëri komente për letrën Llallës drejtuar Senatit Amerikan, por e gjen të pa vend deklaratën e Ambasadorit Donald Lu pas publikimit të saj. Ish-Kryeministri akuzon drejtpërdrejt ambasadorët Lu dhe Vlahutin se ndihmuan Ramën të kapte Reformën në Drejtësi.