Aktualitet

Shtohen pikëpyetjet dhe dyshimet mbi besueshmërinë e përgjimit të publikuar nga Partia Demokratike, e cila pretendon se ka të bëjë me Agron Xhafajn, vëllain e ministrit të Brendshëm, Fatmir Xhafaj. Teksa përfaqësuesit e PD po fshehin dhe mjegullojnë të dhënat kryesore rreth përgjimit të publikuar, që nga identiteti i personit X, origjina etj.,

Prokuroria e Krimeve të Rënda është shfaqur dje në selinë e Partisë Demokratike, për të sekuestruar pamjet filmike të përgjimit. Përfaqësuesit e organit të akuzës po hetojnë tashmë mbi origjinën dhe autenticitetin e përgjimit ambiental, i cili trazoi më tej politikën shqiptare. Gjithsesi, sekuestrimi nga prokurorët konfirmon paraprakisht se përgjimi nuk është realizuar përmes vendimeve të organeve të drejtësisë, por jashtë saj.

Ndërkaq, misteri shtohet në kushtet kur Partia Demokratike ‘harroi’ dje për të publikuar pjesën e dytë të përgjimit, sikundër paralajmëruan disa përfaqësues të saj. Kur pritej publikimi i pjesës tjetër, befas në PD nuk flet më askush për këtë çështje.

Distancohet Basha

Kryetari i opozitës, Lulzim Basha, doli dje në një konferencë për të shtyp, teksa foli gjatë rreth kësaj çështjeje, por çuditërisht nuk tha asnjë fjalë për përgjimin e publikuar nga tre bashkëpunëtorët e tij të ngushtë. Nëse ditën e hënë PD e paraqiti përgjimin si ‘provën’ më kompromentuese rreth çështjes ‘Xhafaj’, ditën e martë, Lulzim Basha nuk tha asnjë fjalë për të, duke distancuar në heshtje.

Ndërkaq, dy ditë më parë vëllai i ministrit Fatmir Xhafaj, Agron Xhafaj kishte depozituar kallëzim penal për tre zyrtarët e PD, Enkelejd Alibeaj, Ervin Salianji dhe Gazmend Bardhi duke i akuzuar se kanë sajuar prova. Agron Xhafaj pretendon se në asnjë moment zëri që është dëgjuar në përgjimin e publikuar dje nuk është i tij.

Kallëzimi penal ndaj tre zyrtarëve Enkelejd Alibeaj, Gazment Bardhi dhe Ervin Salianji u bë pasi këtë të hënë, ishin ata që publikuan një material, që sipas tyre është përgjim ambiental, që provon se organet ligjzbatuese kanë dijeni për aktivitetin kriminal të Agron Xhafajt, si drejtues i një organizate kriminale që kontrollon trafikun e drogës.

Misteret e tjera

Së pari, trafikanti që pretendon PD se dëgjohet në audio-përgjim identifikohet vetëm me një “X” dhe nuk thuhet nëse përgjimin e ka bërë ai vetë, apo prokuroria. Për personin në fjalë nuk ka asnjë të dhënë se kush është. Edhe pse PD thotë se ai është një trafikant i dënuar më parë, ajo nuk e bën të ditur identitetin e tij, duke i shtuar edhe më shumë pikëpyetjet mbi besueshmërinë e përgjimit.

PD ka dhënë edhe një numër telefoni që pretendon se i përket Agron Xhafajt, por nga audio e publikuar PD nuk thotë se cila është prova që zëri që dëgjohet në të është i njëjtë me atë të Agron Xhafajt. Agron Xhafaj nuk është person publik dhe pakkush e njeh zërin e tij. Përgjimi ambiental, PD thotë se është kryer në një lokal që njihet si pronë e Agron Xhafajt, por edhe për këtë nuk ka asnjë të dhënë.

Në fakt, bashkëpunëtori “X” përmend lokalin me emrin e një personi tjetër, që ai e quan “Toto Qorri”. Në asnjë pjesë të bisedës telefonike apo asaj ambientale nuk përmendet një lokal tjetër, që të mund të japë ndonjë indice që të lidhet me Agron Xhafajn.

Rama do flasë sot për situatën e krijuar

Kryeministri Edi Rama do të mbajë sot një qëndrim rreth situatës së krijuar në Ministrinë e Brendshme. Kryeministri njoftoi në rrjetin social Facebook se, ditën e sotme, në orën 11:00 do të flasë para grupit parlamentar të PS, mbi akuzat e PD mbi vëllezërit Xhafaj. Rama lajmëroi se sot do të mbajë një qëndrim, përpara deputetëve të PS-së.

“Jemi të gjithë njësoj? JO, s’kemi qenë asnjëherë të gjithë njësoj e s’do jemi kurrë njësoj! Nesër në 11.00 përpara Grupit Parlamentar, qëndrimi im për situatën e krijuar me Ministrin e Brendshëm dhe ecurinë e përpjekjes diplomatike drejt objektivit historik të çeljes së negociatave”, shkruan kryeministri.

Sekuestrimi

Prokuroria e Krimeve të Rënda është shfaqur dje në selinë e Partisë Demokratike, për të sekuestruar pamjet filmike të përgjimit. Përfaqësuesit e organit të akuzës po hetojnë tashmë mbi origjinën dhe autenticitetin e përgjimit telefonik.

Dyshimet

Dyshimet shtohet në kushtet kur Partia Demokratike ‘harroi’ dje për të publikuar pjesën e dytë të përgjimit ambiental, sikundër paralajmëruan disa përfaqësues të saj./Shqiptarja.com

Elion Semanaj është larguar nga posti i drejtorit të Përgjithshëm të Hipotekës dhe në vend të tij është emëruar kreu i hipotekës së Tiranës, Valdrin Pjetri.

Semanaj qëndroi në krye të Zyrës Qendrore të Regjistrimit të Pasurive të Paluajtshme për 6 muaj, duke zëvendësuar Blerina Doracajn, e cila qëndroi në këtë detyrë 5 muaj. Gjatë periudhës që Semanaj drejtoi Hipotekat ka ekzekutuar disa denoncime penale për punonjës të hipotekave që janë kapur në shkelje të ligjit dhe abuzime korruptive.

Janë mbi 80 punonjës të hipotekave në të gjithë vendin që janë shkarkuar si nga hetimi i brendshëm administrativ ashtu dhe nga denoncimet e qytetarëve në platformën e bashkëqeverisjes shqipëriaqëduam.al.

Detyra e mëparshme e Semanajt ishte ajo e Drejtorit Ekzekutiv të Agjencisë Kombëtare të Burimeve Natyrore. Mësohet se ka qenë ministrja e Drejtësisë, Etilda Gjonaj që ka bërë prezantimin e Pjetrit në drejtorinë e Përgjithshme të Hipotekave. Motivi i kësaj lëvizje duket se ka qenë impulsi i ri që kërkohet në zyrat e hipotekave në të gjithë vendin, ku edhe ankesat e qytetarëve janë më të mëdha.

Ministrja Gjonaj ka vlerësuar punën e mirë të Valdrin Pjetrit në krye të hipotekës së Tiranës gjatë pesë muajve që ai drejton këtë degë, duke e emëruar atë në krye të zyrës qendrore të hipotekës.

Valdrin Pjetri ka mbajtur disa detyra drejtuese në ministrinë e Mbrojtjes që nga viti 2014. Ai ka qenë Drejtor i Përgjithshëm Rregullator dhe i Përputhshmërisë në Fushën e Mbrojtjes, Drejtor i Përgjithshshëm i Shërbimeve Mbështetëse dhe Drejtor i Drejtorisë së Menaxhimit të Aseteve në Ministrinë e Mbrojtjes.

Çmimet e banesave në kryeqytet gjatë muajve të parë të 2018-ës, kanë shënuar rritje .

Banka e Shqipërisë vetëm pak ditë më parë deklaroi një ulje të çmimit në terma real me 3.1% për banesat në Tiranë gjë e cila nuk është konfirmuar nga agjentët imobiliarë. Këta të fundit shprehen për televizionin Scan se çmimet kanë lëvizur krahasuar me një vit më  parë kryesisht në zonat e preferuara, duke  kapur vlerën nga  120 euro në 160 euro për metër  katror. Por ajo që vihet re  është se pavarësisht rritjes së vazhdueshme të çmimeve  kërkesa për të blerë  apartamente  vijon të mbetet e lartë, kryesisht në zonën e ish Bllokut, te  21 Dhjetori dhe në rrugën Don Bosko.

Rritje  ka pasur edhe në qeratë të cilat në zonat e preferuara kapin vlerën  nga 300 deri në 700 euro.

Të dhënat e Bankës së Shqipërisë tregojnë se optimizmi rreth rritjes së çmimeve në tregun e pronave në kryeqytet ende nuk mbështetet plotësisht në shifra.

Në fakt, rritja e çmimeve është më e prekshme në ndërtimet e reja, të nisura në vitet e fundit, ku ka ndikuar pjesërisht edhe dyfishimi i taksës për ndikimin në infrastrukturë, si edhe përqindjet shumë të larta që kërkojnë pronarët e tokës.