Irina

Deputetja e Partisë Socialiste, Vasilika Hysi theksoi se me paketën ligjore antishpifje të miratuar sot në Kuvend mundësohet që të krijohet një komunikim me portalin, i cili cenon imazhin e qytetarëve.

“Shumica e njerëzve nuk e njohin ligjin. Është ligj i vështirë, është teknik. Zhvillimet e teknologjisë kanë qenë të vrullshme sa dhe mediet tradicionale kanë nga një faqe online. Këtu po vendoset një balancë mes lirisë së shprehjes dhe lirive e të drejtave të njeriut. Deri sot i është dhënë shumë hapësirë lirisë së shprehjes duke cenuar liritë e tjera. Liria e shprehjes përfundon aty ku cenohet liria e tjetrit”, tha Hysi.

Duke iu referuar një studimi të këshillit të medies Hysi tha se, “1280 raste cenimesh keni gjetur në 40 portale dhe 35 portale i keni gjetur me shkelje të etikës”.

“Portalet mund të jenë private, por çdo qytetar ka detyrimin të respektojë lirinë e tjetrit”, tha Hysi.

“Nëse dikush boton në portalin e tij një lajm të rremë unë e detyroj atë të ketë një adresë, e-mail që unë t’i shkruaj dhe t’i them zotëri informacioni që keni botuar është i rremë. Pra të ketë një adresë dhe t’i them që lajmi është i rremë dhe ai të më japë një përgjigje”, theksoi Hysi.

“Kur ra tërmeti u dha lajmi që në morgun e Tiranës janë fshehur 100 kufoma. Unë se dija që ai portal ishte i regjistruar në Kolumbi. Por kështu e dimë kush e ka portalin dhe merr një përgjigje”, tha Hysi.

Hysi gjithashtu sqaroi një nga ndryshimet e bëra nga mazhoranca në paketën antishpifje, në pikën ku thuhet “pezullim të përkohshëm të licencës dhe/ose autorizimit (shtohet) për ofruesit e shërbimeve audio dhe audio-vizive”. Hysi sqaroi se një gjë e tillë nuk kërcënon televizionet. Që do të thotë, duke qenë se ligji tashmë përveç TV i shërben edhe portaleve, është shtuar ” audio-vizive” për të specifikuar se cilës media i referohet.

“Licencë kanë mediet vetëm audiovizive, sepse duhet ta dallojnë që në rastet e portaleve nuk ka nevojë për autorizimin. Dhe kur flitet për rastet e gjobave. Për të qartësuar. Deri tani, ky nen ka qenë vetëm për mediet audiovizive, me ndryshimin e ligjit është edhe për portalet. Në këtë rast duhet bërë dallimi se kujt i referohet”, tha Hysi.

Hysi tha se gazetarët janë ftuar për konsultim. “Kemi bërë 5 seanca dëgjimore në çdo Komision të Ligjeve, Mediave dhe Veprimtarive Prodhuese”, theksoi ajo.

“Ky ligj nuk rregullon përmbajtjen por ka parashikuar 2 mekanizma procedurialë. E para të gjitha portalet të japin adresë. A është rregullim përmbajtje nëse të gjitha portalet do kenë rregullat e privatësisë? Nëse një lajm është i rremë. Ai që është prekur i drejtohet portalit. Nëse portali thotë se nuk e ndryshon lajmin i drejtohet AMA-s. Nëse dhe pas AMA-s portal nuk e ndryshon lajmin shkohet në gjykatë”, tha Hysi.

Hysi tha se, “anëtarët e AMA-s zgjidhen nga parlamenti. I njëjti parlament që zgjedh dhe presidentin dhe Kryeministrin dhe Prokurorin e Përgjithshëm”./atsh

Kryeministri Edi Rama përcolli sot fjalët e shenjta të Shën Terezës, si një tjetër mesazh për t’u solidarizuar me të prekurit nga tërmeti i fortë i 26 nëntorit dhe lehtësimin e pasojave që ky tërmet la pas.

“Disa njerëz vijnë në jetën tënde si bekim. Disa të tjerë vijnë si mësim”, është shprehur Shën Tereza.

Që pas rënies së tërmetit Kryeministri Rama ka zgjedhur që të publikojë thënie nga njerëz të urtë, apo nga librat e shenjtë siç janë Kurani apo Bibla, duke i titulluar si ‘Fjalët e shenjta’./atsh

Kryeministri Edi Rama deklaroi sot në Kuvend se “këtu jemi përballë një turme që nuk denjon të lexojë dhe thotë hapur nuk na intereson çfarë shkruhet në ligj, ne nuk duam ligj, sepse çdo ligj cenon lirinë tonë. Sipas një raporti të OSBE 2017 në 3/4, pra në 42 shtete nga 57 që janë anëtare të OSBE, fyerja dhe shpifja është vepër penale. Nga analiza e thellë që është bërë për të bërë këtë ligjin, 28 teksteve legjislative të Bashkimit Europian rezulton se aktualisht ka tre qasje ndaj fyerjes dhe shpifjes”.

Në fjalën e tij në kuadër të diskutimeve për projektligjin “Për komunikimet elektronike në Republikën e Shqipërisë” Kryeministri Rama tha se “së pari, 20 shtete Austria, Belgjika, Republika Çeke, Danimarka, Finlanda, Gjermania, Greqia , Hungaria, Polonia, Portugalia, Sllovenia, Sllovakia, Spanja, Suedia, Italia, Letonia Letuania, Luksemburgu dhe Holanda parashikojnë fyerjen dhe shpifjen si vepër penale që dënohet me burg”.

Së dyti, vijoi Rama, pesë shtete Qipro, Iralnda, Anglia, Rumania dhe Estonia nuk e parashikojnë fyerjen dhe shpifjen si vepër penale, por e rregullojnë me pasojat e tyre në legjislacionin e tyre.

“Anglia zbaton gjobën më të lartë të vendeve anëtare të Këshillit të Europës që shkon në 200 mijë stërlina”, – tha Rama.

Kreu i qeverisë u shpreh se “së treti tre shtete Bullgaria, Kroacia dhe Franca e konsiderojnë fyerjen dhe shpifjen si vepër penale dhe dënim vetëm me gjobë dhe jo me burgim si sanksion për këto vepra penale”.

“Legjislacioni absolutisht më i ashpër ndaj fyerjes dhe shpifjes në BE është legjislacioni i Republikës Federale të Gjermanisë. Kodi penal i Gjermanisë parashikon 11 vepra penale për fyerjen dhe shpifjen dhe rastësisht është vendi ku ka më pak shpifje dhe më pak fyerje. Përgjegjësia civile për shpifjen dhe fyerjen rregullohen sipas modelit të vendeve që kanë një ligj të veçantë që nga Kosova dhe Maqedonia e Veriut, Britania e Madhe dhe Irlanda, ndërkohë që shtete si Kroacia, Austria dhe Luksemburgu kanë miratuar ligje të përgjithshme që kanë parashikime serioze për fyerjen dhe shpifjen”,- nënvizoi Rama.

Kryeministri Rama tha se “në tetor të 2018 për shkak të rritjes së ndikimit të rrjeteve sociale në aspektin social, kulturor dhe ekonomik dhe politik të vendeve anëtare të BE-së, direktiva e BE-së është për afruar plotësisht në Republikën e Shqipërisë dhe ligjin përkatës për mediet audiovizuale dhe është rishikuar dhe përditësuar rregullimi i ligjeve”.

“Parlamenti francez ka miratuar një ligj kundër lajmeve të rreme është ligj që mban emrin e Presidentit të Francës, që krijon rregulla të reja tejet të ashpra për t’i dhënë autoriteteve fuqi për të hequr përmbajtjen e rreme të përhapur përmes medieve sociale madje për të bllokuar aksesin e vendeve që e publikojnë atë, si dhe për zbatuar me transparencë përmbajtjen e sponsorizuar deri në 5 muaj para periudhës zgjedhore një disiplinë super strikte”,- shtoi Rama.

Sipas tij, në SHBA byroja federale e hetimit ndërhyn pa vendim gjykate dhe mbyll me urdhër çdo lloj website dhe përmbajtje që konsiderohet cenuese, në shumë aspekte.

“Në Gjermani është miratuar ligji për përmirësimin e zbatimit të ligjit ekzistues në rrjetet sociale. Ligji gjerman është sot përpjekja më e suksesshme për të shuar përmbajtjen potencialisht të dëmshme në internet”, tha Rama.

Më tej Kryeministri theksoi se “vijmë tek gjithë kjo punë e bërë për të analizuar shtetet e BE-së, i gjithë entuziazmi ynë për të ndërtuar një ligj që i referohet këtyre shteteve ndeshi qysh në fillim pengesën nga përfaqësuesve të BE-së, OSBE-së dhe të Këshillit të Europës, në formën e një fjalie mos iu referohuni këtyre shteteve se i kanë ligjet shumë të ashpra nuk janë këto shembulli që duhet të ndiqni”./atsh

Presidenti i Republikës, Ilir Meta mori pjesë sot në mbledhjen e parë të Këshillit Koordinues të Diasporës ku vlerësoj solidaritetin e diasporës me fatkeqësinë natyrore të 26 nëntorit.

Në takim ishin të pranishëm Kryeministri Rama, Ministri i Shtetit për Diasporën Majko, ministrat e kabinetit qeveritar Çuçi, Margariti, Klosi, anëtarë të Këshillit, deputetë, drejtuesi i mbledhjes dhe anëtari i Këshillit Bashkiak të Nju-Jorkut, zoti Mark Gjonaj, si dhe përfaqësues të diasporës shqiptare.

Në fjalën e tij, Presidenti Meta shpreh se “Ky Këshill ka një rëndësi të veçantë pasi dëshmon përfshirjen e përfaqësuesve të diasporës në struktura ekzekutive që merren drejtpërdrejtë me identifikimin real të problematikave, me propozimet dhe zgjidhjen e tyre, si edhe në hartimin e strategjive mbi marrëdhënien me diasporën. Uroj që ky takim i parë i Këshillit Koordinues të Diasporës të vijojë me një sërë arritjesh në zgjidhjen e këtyre problematikave që ndesh diaspora jonë, por edhe mbi masat konkrete të qeverisë shqiptare në bashkëpunim edhe me diasporën në lidhje me situatën e rëndë të shkaktuar nga tërmeti i 26 nëntorit!”, tha ai.

Presidenti Meta vlerëson rolin e diasporës për solidaritetin me për fatkeqin e 26 nëntorit

“Shfrytëzoj këtë rast të falënderoj të gjitha komunitetet e diasporës në mbarë botën për ndihmën dhe për mesazhet e solidaritetit për fatkeqësinë natyrore që goditi vendin tonë më 26 nëntor. Shoqata dhe individë të shumtë të diasporës sonë, jo vetëm nga vendet fqinje, por edhe nga Amerika, Kanadaja e deri në Australi, kanë mbledhur ndihma dhe të ardhura në mbështetje të njerëzve të prekur nga tërmeti, duke treguar kështu një solidaritet të rrallë ndaj vendit dhe bashkatdhetarëve të tyre.”, theksoi ai.

Po ashtu Meta tha se “Kjo fatkeqësi le të shërbejë edhe si moment reflektimi, rindërtimi, rimëkëmbjeje dhe pajtimi për të forcuar bashkëpunimin në interes të qytetarëve tanë, të vendit tonë, por edhe të kohezionit tonë kombëtar”.

Presidenti Meta ka vlerësuar rolin e diasporës në vite në shërbim të vendit

“Historia e Shqipërisë na mëson se në momentet më kyçe dhe më vendimtare të vendit, diaspora ishte shtysa kryesore në arritjen si të Pavarësisë së Shqipërisë’ ashtu edhe në sigurimin e lirisë dhe në avancimin e çështjes kombëtare. Diaspora jonë e hershme, komuniteti arbëresh ruajti për pesë shekuj gjuhën shqipe dhe figurën e Skënderbeut, dhe ishin nismëtarë të Rilindjes Kombëtare, e cila çoi na çoi edhe drejt Pavarësisë. Një kontribut të madh dhe të vyer në të mirë të vendit tonë jep edhe diaspora e re e pas viteve 90-të.Tashmë Diaspora shqiptare ka hyrë në një etapë të re. Shumë përfaqësues të saj janë pjesë e rëndësishme në institucionet shtetërore qendrore dhe vendore në shtetet ku ata jetojnë”, tha ai. /atsh