Irina

Delegacioni i Bashkimit Europian në Tiranë uroi sot të gjithë shqiptarët, Gëzuar Pashkët.

Delegacioni i BE theksoi se, në këto kohë të vështira, le të mbushë kjo ditë shtëpinë tuaj me paqe, gëzim dhe solidaritet.

“Delegacioni i Bashkimit Europian i uron Gëzuar Pashkën të gjithë atyre që festojnë sot. Në këto kohë të vështira, le të mbushë kjo ditë shtëpinë tuaj me paqe, gëzim dhe solidaritet”, thuhet në mesazhin e urimit të Delegacionit të BE-së.

Besimtarët katolikë festojnë dhe kujtojnë sot një nga momentet më të rëndësishëm të besimit, ringjalljen e Krishtit.

Pashka është festa më e madhe në kalendarin liturgjik. Besimtarët katolikë kremtojnë sot Pashkët, ku gjatë drekës mblidhet e gjithë familja, me një tryezë të mbushur plot me gatimet më të mira, për festuar ringjalljen e Jezu Krishtit pas kryqëzimit të tij.

Të premten Krishti kryqëzohet e më pas ndodh mrekullia, ai ringjallet. Në këtë festë nuk mungon simboli i saj, veza e Pashkës.

Pashka festohet nga shumë besimtarë katolikë në shumë vende të botës. Kjo është një ditë për të festuar me miqtë dhe për të kujtuar Lavdinë e Zotit./atsh

Një tjetër shembull përkujdesje në kushtet e pandemisë së COVID-19 vjen nga Shtëpia e Foshnjeve në Tiranë, stafi i së cilës qëndron 24 orë i izoluar pranë fëmijëve pa kujdes prindëror duke i mbrojtur me përkujdesje dhe dashuri.

Deputeti i Partisë Socialiste, Ervin Bushati solli sot rastin e Orjeta Hasanaj, prej një vitit drejtoreshë e Shtëpisë së Foshnjeve në Tiranë.

“E ka nisur punën si punonjëse sociale. Orjeta e Njësisë 1 kujdeset çdo ditë nëpërmjet komunikimit dhe masave që ka marr për fëmijët. Bashkë me të palodhurat: Afërdita Doçi, Miranda Nika, Valbona Nuri, Drita Sadria, Amanda Lleshi, Irma Karameti, Xhevahire Memia, Lorena Dragoi”, tha ai.

“Këto ditë kanë qenë të vështira për të gjithë, por në situata të tilla ndërthurja e punës së vështirë me emocione të bukura humori na ka ndihmuar të ecim para dhe këtë unë e përcjell çdo ditë dhe tek stafi im. Sfida jonë e përbashkët në këto ditë të vështira është të jemi çdo ditë pranë familjes sonë të madhe dhe engjëjve të vegjël të Shtëpisë së Foshnjës”, shprehet Orjeta.

Ajo thotë se “24 orë ne jemi pranë tyre me shpirt e me zemër pasi ne jemi familja më e madhe në botë”.

“Jemi izoluar dhe jemi zotuar që të jemi në çdo moment pranë fëmijëve pa kujdes prindëror dhe do t’i mbrojmë me përkujdesjen dhe dashurinë tonë. Unë rri në Shtëpinë e madhe të Foshnjeve! Ne do vijojmë të qëndrojmë dhe do të përkujdesemi për ta. Të lutem bëje dhe ti! Familja jote mund të jetë më e vogël dhe ti mund t’ia dalësh! Bashkë do ja dalim”, tha ajo./atsh

Drejtori i Përgjithshëm i Policisë së Shtetit, Ardi Veliu i ftuar në një emision televiziv tha sot se Policia e Shteti është në gatishmëri prej një muaji për shkak të situatës së pandemisë nga COVID-19.

Veliu u shpreh se “policia është e angazhuar dhe e përfshirë për të siguruar të gjitha aktet normative që kanë dalë në funksion të fatkeqësisë dhe emergjencës, të gjitha vendimet e Qeverisë si dhe të Ministrisë së Shëndetësisë dhe Mbrojtjes Sociale, që kanë synuar normimin e disa masave për të përballuar këtë pandemi”.

Duke folur për gjobat ndaj shkelësve të karantinës, Veliu tha se “nuk kemi pasur qëllim vetëm të ndëshkojmë, por të kufizojmë lëvizjet. Detyra jonë është që të informojmë, dhe qytetarët kanë qenë bashkëpunues, por ka pasur edhe individë për të cilët kemi përdorur gjobat”, – tha Veliu.

Veliu tha se gjobat janë vendosur për qytetarët që kanë shkelur fashat e orareve duke dalë jashtë, apo pa autorizim, që janë 4 363 gjoba në më shumë se një muaj.

“Kemi vendosur 1 624 masa për automjetet dhe veç masës së gjobës edhe bllokim automjeti dhe heqje leje drejtimi. 4 363 masa administrative për këmbësorët që nuk kanë respektuar detyrën për të marrë autorizimin për nevojat e tyre. Ka dhe qytetarë që kanë thyer urgjencat mjekësore. Janë 10 masa për thyerje të urgjencës mjekësore. 237 raste të masave në lidhje me qytetarët që nuk kanë mbyllur lokalet dhe baret”, – tha ai. /atsh

Ministri i Brendshëm Sandër Lleshaj gjatë vizitës së sotme në Durrës ka zhvilluar një takim me drejtues dhe punonjës të Policisë vendore në qark, të cilët i falënderoi për gjithë angazhimin në përmbushje të detyrave.

Në takim, ministri Lleshaj tha se “vërtet duket sikur kemi sot dy herë më shumë polici. Në fakt, Policia është ai numër që ka qenë, por është shtuar prezenca, është shtuar koha e shërbimit për secilin prej jush. Kështu që gjej mundësinë që përmes jush t’i përshëndes dhe t’i falënderoj të gjithë punonjësit e Policisë për angazhimin që po bëjnë”.

Lleshaj u premtoi nga Durrësi punonjësve të Policisë së Shtetit se do merren masa për kompensimin financiar të tyre.

“Sigurisht, qeveria mban shënim për këtë, në kuptimin që ne do të marrim masat e plota për kompensimin e përpjekjeve tuaja, në kuptimin e orëve shtesë, të ngarkesës së madhe që po mbani, por prapë theksoj se ne mbajmë një barrë të madhe për këtë situatë, pas barrës që mbajnë punonjësit e bluzave të bardha. Por ju, bluzat blu po ashtu, mbani një barrë të madhe në këtë situatë dhe duhet të vazhdojmë me këtë intensitet”, theksoi ai.

Po ashtu, Lleshaj shtoi se “e rëndësishme është që Policia nuk është përgjegjëse vetëm për koronavirusin, por është përgjegjëse për të gjithë atë gamë detyrash, të cilat vazhdojnë të jenë në fuqi, lufta ndaj krimit, parandalimi i krimit, lufta ndaj fenomeneve të tjera, që cenojnë rendin e sigurinë publike e shumë e shumë përgjegjësi të tjera”./atsh