Irina

Zv.ministrja e Shëndetësisë dhe Mbrojtjes Sociale, Mira Rakacolli u shpreh se miratimi i Aktit Normativ për marrjen e masave të përkohshme për mbështetjen e sektorit të turizmit” synon për të mbrojtur më tej shëndetin e qytetarëve në kohën e turizmit, në kuadrin e pandemisë Covid-19.

E pranishme në Komisionin e Kuvendit për Veprimtarinë Prodhuese Tregtinë dhe Mjedisin, Rakacolli tha se, një turizëm i suksesshëm është i lidhur ngushtësisht me sigurinë shëndetësore e cila kushtëzohet nga dy mënyra; kushtet higjeno sanitare të favorshme dhe duke ofruar shërbim shëndetësor pranë qendrave turistike.

Ministria e Shëndetësisë ka në fokus respektimin e këtyre masave përmes kontrolleve për kushtet higjieno-sanitare apo edhe shtimin e qendrave shëndetësore të lëvizshme pranë pikave turistike që operojnë 24 orë në 24, por në kushtet e pandemisë këto masa bëhen dyfish më të rëndësishme, u shpreh Rakocolli.

Sipas saj, referuar treguesve, në Shqipëri ka një rritje të rasteve me Covid, ndonëse kjo nuk është një tendencë shqiptare, por vihet re edhe në botë. Gjithsesi theksoi ajo, “Komiteti Teknik në Shqipëri është i mendimit, se kjo rritje lidhjet me moszbatimin rigoroz të masave në protokollet tona të mbrojtjes nga përhapja e Covid-19”.

Rakacolli tha se, në këtë periudhë pandemie hapja e sezonit turistik e shton rrezikun e pandemisë, ndaj është shumë e rëndësishme zbatimi i protokolleve të masave mbrojtëse.

“Në aktin normativ të propozuar nuk janë parashikuar penalitete për ato subjekte apo struktura që ofrojnë shërbim turistik. Nëpërmjet këtij akti normativ parashikohet të penalizohen subjektet që ushtrojnë veprimtari turistike në stacionet e plazhit dhe që nuk respektojnë rregullat dhe protokollet e sigurisë, të nxjerra nga organet kompetente, me
dënimin me gjobe 700 mijë lekë dhe, në rast përsëritjeje, iu shtohet edhe mbyllja e veprimtarisë nga inspektoratet përgjegjëse, duke synuar kështu të mbrohet shëndeti i turistëve në zonat e plazheve nga infeksioni Covid-19 si edhe mjedisi”- deklaroi Rakacolli.

Zv.ministrja bëri të ditur se, në datën 5 korrik janë kryer 619 inspektime në shkallë vendi për respektimin e protokolleve të masave antiCovid dhe për shkeljet e evidentuara janë marrë 6 masa administrative, dy në vlerën e 1 milion lekëve dhe 2 në vlerën e 100 mijë lekëve.

Rakacolli informoi komisionin se, në kuadrin e masave të mbrojtjes kundër Covid-19 aktiviteti i pishinave vijon të jetë i mbyllur në të gjithë vendin me urdhër të Ministrisë së Shëndetësisë, deri në një vendim tjetër. Ndërsa inspektorët e shëndetësisë, tha ajo vijojnë kontrollet për dezifektimin e hapsirave në zonat turistike të vendit. /atsh

Komisioni për Veprimtaritë Prodhuese, Tregtinë dhe Mjedisin në drejtimin e kryetarit Niko Peleshi, në mbledhjen virtuale të radhës, shqyrtoi dy akte normative të Këshillit të Ministrave, që lidhen me masat e marra nga qeveria për përballimin e situatës së pandemisë dhe efektit të saj në turizëm.

Fillimisht u shqyrtua Akti Normativ “Për marrjen e masave të përkohshme për mbështetjen e sektorit të turizmit”, i cili u prezantua nga Blendi Klosi, ministër i Turizmit dhe Mjedisit dhe u relatua për komisionin nga deputeti Ilir Beqaj.

Ministri Klosi sqaroi se Akti normativ përcakton masat e veçanta që do të merren në sektorin e turizmit për agjencitë e udhëtimit, operatorët turistikë dhe klientët e tyre në ofrimin e një shërbimi turistik, nga dita e shpalljes deri në përfundim të gjendjes së fatkeqësië natyrore të shkaktuar nga COVID-19, me qëllim mbështetjen e sektorit të turizmit, si dhe parashikon rregulla për operatorët turistikë apo agjencitë e udhëtimit, si dhe klientët e tyre.

Klosi u shpreh se në të gjitha vendet e rajonit është bërë e njëjta procedurë, duke shtuar se: “ka qenë një ndër kërkesat e para që kanë pasur operatorët turistikë, të cilët në fillimin e pandemisë, kur dhe situata ishte ende e paqartë u gjendën përballë një presioni shumë të madh nga klientët, të cilit kishin prenotuar pushimet e tyre, madje kishin paguar një pjesë të pushimeve apo gjithë pushimet”.

Ai shtoi se Akti Normativ nuk ka efekte financiare shtesë në buxhetin e shtetit dhe brendia e tij është vendosja e një raporti të munguar kontraktor midis klientëve dhe kompanive turistike.

Klosi tha se tashmë jemi në fushën tonë “pusho shqip” apo “unë qëndrojë në Shqipëri” nisma që i shërben rigjallërimit të turizmit në vendin tonë, në kushtet e vështira që ka krijuar pandemia.

Ministri tha se, hapësirat publike në plazhe për qytetarët, janë në administrimin e bashkive dhe janë ato, që marrin përsipër menaxhimin e këtyre plazheve dhe mbrojtjen e shëndetit të qytetarëve, kushtet higjenosanitare e kështu me radhë.

“Jemi në fillim të korrikut dhe fluksi në plazhe ka filluar ndaj kërkon impenjim më të madh kujdesi dhe kontrolli nga strukturat përkatëse lokale. Sot kemi ndarjen transparente të plazheve publike kundrejt hapësirës që i takon strukturës turistike dhe sot në të gjithë territorin e vendit kemi një situatë shumë herë më të mirë menaxhuar të këtyre hapësirave, ndryshe nga ç’ishte më parë, kur hapësirat e plazhit ishin të uzurpuara nga subjektet”- tha Klosi.

Ministri informoi se është hapur aplikimi onlinë në këto 5 ditë, pasi ka pasur një numër jo të vogël plazhesh për të cilat nuk është aplikuar ashtu siç duhet. “Asnjë kontratë me bashkitë, nuk është e vlefshme në asnjë rast se nuk aplikohet në e- albania”- u shpreh Klosi.

Ministri tha se angazhimi për menaxhimin e turizmit në kushtet e masave anticovid është një betejë për ekonominë. Në 1 qershor ne hapëm kufijtë me vendet e rajonit e më pas punuam për të pasur çarterat e parë me turistë nga jashtë dhe në qershor hynë 30% e 600 mijë turistëve që erdhën vitin e kaluar, pra kemi një lëvizje të turizmit rajonal dhe nëse do të ketë politika lehtësues nga BE presim një fluks në rritje”- tha Klosi./atsh

Kryetari i bashkisë së Vlorës, Dritan Leli, deklaroi sot se “ne pretendojmë të kemi një sezon turistik të suksesshëm , por e gjithë kjo ka një varësi të fortë nga ajo që ka përgjunjur njerëzimin COVID-19”.

Në një intervistë televizive, kryetari Leli tha se “situata në të cilën ndodhemi na bën të mendohemi të jemi skeptikë, të mendohemi më shumë për të lëvizur dhe absolutisht është e justifkikuar dhe e pritshme pavarësisht përpjekjeve të mëdha që ne jemi duke bërë bashkë me operatorët turistikë në të gjithë territorin e bashkisë së Vlorës, por jo vetëm në Vlorë, në të gjithë Shqipërinë janë duke u përpjekur të sjellin fluks turistësh në qytet”.

“Situata që kemi kaluar , apo që po përjetojmë akoma janë ato ngërçet tek njerëzit që bëjnë më pak skeptikë për të ndërmarrë udhëtime”, – tha Leli.

Duke folur për turizmin, Leli tha se “plazhet në qytetin bregdetar në fundjavë kanë qenë e të populluara, qyteti plot, hotelet kanë një rritje të numrit e të pronotimeve dhe shpresoj se përmirësimi i kushteve atmosferike do të sjellë më shumë vizitorë”.

Më tej ai tha se “qytetarët e Vlorës e duan cilësinë e jetës, infrastrukturën që ju shërben. 450 biznese të reja janë hapur vetëm në Lungomare. Këtu ka pasur situata vetëm të ndërtonin objekte sot ka shumë ndërtues që lejet për pallate duan t’i kthejnë në hotele për t’ju shërbyer qytetarëve. Kemi arritur në një situatë shumë pozitive ku më shumë leje i japim për hotele dhe jo për pallate”.

Lidhur me vendosjen e çadrave në plazhe, Leli tha se “midis hapësirës me çadra ka pjesë pa çadra, janë për banorët që të dalin si turistë të lirë pa pasur nevojë të paguajnë për një çadër. Kjo ka ndodhur brenda të gjithë vijës bregdetare”.

Kryebashkiaku Leli bëri të ditur se “nga zona e tunelit në drejtim të Orikumit do kemi një tjetër projekt, ku do të bëhet rikonstruksion total, do ketë 2 bypass-e që të devijohet trafiku. Do bëhet një shëtitore jo si Lungomare, por me një standard shumë të mire”.

Ai u shpreh se me rikonstruksionin e bulevardit “Ismail Qemali”, Vlora është bërë edhe një atraksion historik.

“Bulevardi Ismail Qemali është rikonstruktuar. Kur isha në Kosovë thashë të ftoj ata që e ndjejnë dhe duan të vijnë në një vend që ka shumë histori. Dhe pastaj të shkosh tek rruga historike ku kaloi Ismail Qemali kaloi tek shtëpia e Marigosë që qëndisi flamurin është diçka e papërsëritshme”, – tha Leli.

Kryebashkiaku Leli tha se “kemi shumë për të bërë, por në sezonin turistik na takon të promovojmë më tepër vlerat të tregojmë anët pozitive, se po të shikojmë problematikat janë aty dhe do vazhdojnë të zgjidhen. Por duhet të ketë një klimë pozitive për të bërë më tepër ekonomi”.

“Qasja pozitive nuk është vetëm politike, por është strategjike për të garantuar një zhvillim të qëndrueshëm të turizmit në Shqipëri Vlora është nga ato potencialet turistike më të rëndësishme qe ne kemi në gjithë territorin e vijës bregdetare dhe çdo investim ka justifikuar shpenzimin e parave publike për të shndërruar Vlorën në destinacionin turistik elitar në vitet që do të vijnë”, – tha Leli. //atsh