Irina

Parqet natyrore, pika të forta të zhvillimit të qëndrueshëm turistik

Aktualitet, Turizem / /

“Parqet natyrore janë pika të forta të zhvillimit të qëndrueshëm turistik dhe ekonomik, ndaj dhe nevojitet përfshirja e banorëve që jetojnë afër këtyre zonave për zhvillimin e tyre”.

Kështu deklaroi sot prefekti i qarkut Gjirokastër, Astrit Aliaj, gjatë takimit të parë të Komitetit Rajonal të Menaxhimit të Zonave të Mbrojtura Mjedisore.

“Bashkëpunimi dhe përfshirja e banorëve që jetojnë afër këtyre zonave të mbrojtura është shumë i rëndësishëm, sepse asnjë zonë nuk mund të mbrohet e zhvillohet pa kontributin e banorëve, që kanë jetuar e menaxhuar në kohë këto zona”, tha ai.

Një pikë e fortë e përmbushjes së këtyre detyrave, sipas Prefektit, “është edhe edukimi dhe sensibilizimi i brezit të ri dhe të gjithë banorëve, për rëndësinë e veçantë që mbartin këto zona”.

“Çdo institucion kompetent, por edhe mediet lokale duhet të punojnë fort në drejtim të promovimit të vlerave të Zonave të Mbrojtura, si një pasuri e përbashkët që na ka falur natyra”, tha Prefekti Aliaj.

Komiteti Rajonal i Menaxhimit të Zonave të Mbrojtura Mjedisore e shtrin veprimtarinë e tij në territorin e qarkut Gjirokastër dhe në pjesën e Zonës së Mbrojtur që shtrihet edhe në qarkun e Korçës, sipas rrjetit të zonave të mbrojtura mjedisore të miratuara, përfshirë këtu edhe parqet natyrore bashkiake.

Aktualisht në territorin e qarkut Gjirokastër ka rreth 62492 ha Zona të Mbrojtura, ose rreth 22% e territorit, ku përkatësisht janë të ndara në katër zona të mbrojtura të kategorive të ndryshme sipas Qendrës Botërore të Ruajtjes së Natyrës:

– Rezerva Strikte Natyrore “Bredhi i Kardhiqit” (kategoria I), bashkia Gjirokastër;
– Parku Kombëtar “Bredhi i Hotovës-Dangëlli” (kategoria II), bashkia Përmet;
– Monumenti i Natyrës “Bredhi i Sotirës” (kategoria III), bashkia Dropull;
– Parku Natyror “Zagori” (kategoria IV), bashkia Libohovë./atsh

Parqet natyrore, pika të forta të zhvillimit të qëndrueshëm turistik Read More »

Moti sot,30 janar, 2019

Aktualitet / /

Vendi ynë do të ndikohet nga masa ajrore relativisht të paqëndrueshme. Sipas Shërbimit Meteorologjik Ushtarak, moti do të jetë kryesisht i vranët me intervale të shkurtra e lokale kthjellimi. Parashikohen reshje shiu të herëpashershme me intensitet të ulët në të gjithë vendin. Në orët e pasdites, në Ultësirën Perëndimore reshjet do të bien me një intensitet deri mesatar në formë shtrëngatash, ku si pasojë e tyre pritet të ketë edhe mjegullinë. Era do të fryjë në drejtimin Juglindje-Jugperëndim me shpejtësi 1-10 m/sek, duke u shoqëruar me një valëzim të forcës 0-1 ballë në detet Adriatik e Jon.

Temperaturat parashikohen në vlerat e mëposhtme:

QYTETET Temperaturat në °C
Shkodër 6/13 re shi
Kukës 4/11 re shi
Lezhë 7/12 re shi
Dibër 2/9 re shi
Durrës 7/14 re shi
Tiranë 6/13 re shi
Elbasan 4/13 re shi
Berat 5/12 re shi
Vlorë 6/11 re shi
Korçë 0/6 re shi
Gjirokastër 4/11 re shi
Sarandë 6/14 re shi/atsh

Moti sot,30 janar, 2019 Read More »

Sarandë- Drejt përfundimit mozaiku në qytetin bregdetar

Art-Kulture, Turizem / /

Rehabilitimi i shkallareve të Sarandës, objekti i parë në kuadër të projektit “Për Zhvillimin e Integruar Urban dhe Turistik”, i financuar nga qeveria shqiptare dhe Banka Botërore është drejt përfundimit.

Fondi Shqiptar i Zhvillimit bën të ditur se puna për rifiniturat dhe detaje të tjera finale parashikohet të mbyllen në muajin shkurt.

Sipas FSHZH-së, Saranda është pjesë e një programi ambicioz investimesh prej 13 milionë eurosh që do të zbatohen në këtë bashki nëpërmjet Fondit Shqiptar të Zhvillimit.

“Janë rikonstruktuar nga e para 4 arteriet komunikuese të cilat formojnë një mozaik të bukur në një sipërfaqe 5,200 m², duke kombinuar gurin e bardhë me qeramikën. Është punuar edhe për ndërhyrjet në rrjetin elektrik dhe sistemin e kanalizimeve (400 metra linear), arredimin urban dhe ndriçimin”, thekson FSHZH.

Në muajt në vijim, sqaron FSHZH, ky invesim do të pasohet nga një tjetër ndërhyrje për Rigjenerimin Urban të Shëtitores “Naim Frashëri”, që parashikon rehabilitimin e 12,700 m² sipërfaqe.

Këto ndërhyrje kanë për qëllim ridimensionimin e vlerave të qytetit, përmirësimin e peizazhit urban dhe forcimin e identitetit turistik të qytetit të Sarandës.

Qyteti i Sarandës e ka origjinën në shekullin VI para erës sonë, por qyteti filloi të merte formën e tij në vitin 1930, kur filloi të zbatohej plani i parë urban. Masterplani i parë i qytetit të Sarandës u hartua nga një arkitekt austriak gjatë sundimit të Zogut I.

Vizioni kryesor i këtij masterplani ishte krijimi i një qyteti port , në harmoni me peizazhin rrethues. Me kalimin e viteve plani austriak u pasua nga ai italian gjatë pushtimit të Shqipërisë, si dhe nga shumë plane të tjera gjatë regjimit komunist (1960,1976, 1982).
Ky qytet, cili ka marrë emrin e një manastiri bizantin, që quhej në greqisht “Agioi Saranta”, 40 shenjtorët, njihet për plazhet mahnitëse dhe ujin si kristal. Plazhi i pllakave, plazhi i Manastirit, i quajtur kështu për shkak se në kodrën sipër tij gjendet një Manastir, plazhi i pasqyrave, i Ksamilit, etj, ofrojnë për turistët vendas e të huaj gjatë verës pushime mbresëlënëse.

I përkufizuar si “Qyteti i bardhë”, ai është i rrethuar nga kodra dhe përballë tij ndodhet ishulli grek i Korfuzit. Përveç diellit e plazhit, Saranda njihet dhe për historinë dhe kulturën e saj: e magjishme është kalaja e Lëkurësit, ndërsa Parku Arkeologjik i Butrintit kuriozon turistët e shumtë me historinë e tij mijëra vjeçare./atsh

Sarandë- Drejt përfundimit mozaiku në qytetin bregdetar Read More »

Fillon monitorimi 24 orë për 270 të dënuar me kamera në burgje

Aktualitet, Lajmi i fundit / /

Sistemi “41 bis” hyn në fuqi nesër dhe fillon të zbatohet me asistencën e Prokurorisë Antimafie dhe me partnerët italianë, që na kanë mbështetur në mënyrë të vazhdueshme për dizenjimin dhe aplikimin e këtij regjimi të posaçëm.

Kështu deklaroi sot ministrja e Drejtësisë, Etilda Gjonaj, pas përurimit të sallës së re operative të Drejtorisë së Përgjithshme të Burgjeve, së bashku me Prokurorin e Antimafias Italiane Federico Cafiero De Raho.

Në këtë sallë është instaluar sistemi i kamerave që do të monitorojë 24 orë në ditë burgjet në vend.

“Mbështetja jo vetëm e palës italiane, por edhe e partnerëve të tjerë si Ambasada britanike dhe Këshillit të Europës, për Ministrinë e Drejtësisë dhe qeverinë shqiptare për masat e sigurisë në sistemin penitenciar është një kundërpërgjigje dhe reagim për luftën kundër kriminalitetit dhe krimit të organizuar në veçanti. Me një përllogaritje të përafërt janë rreth 270 subjekte që pritet t’i nënshtrohen regjimit 41 BIS. Është menduar të ketë ambiente të posaçme në institucione që kanë seksione të sigurisë së lartë”, tha Gjonaj.

Ministrja Gjonaj u shpreh se “me ngritjen e kësaj salle operacionale për monitorimin 24 orë në të gjitha sistemet penitenciare do të rritet siguria në burgje, lufta kundër korrupsionit si dhe përgjegjësia e punonjësve të policive në burgje dhe stafit që i administron ato. Por, nga ana tjetër, edhe për të eliminuar rastet kur subjektet e krimit të organizuar kanë kontakte me botën jashtë dhe që mund të vazhdojnë aktivitetin kriminal”.

“Me dy sistemet, aplikimin e sistemit “41 bis” dhe me sallën operacionale 24-orëshe, e cila do të jetë e lidhur edhe me operacionin ‘Forca e Ligjit’ dhe me shërbimin e kontrollit të brendshëm të burgjeve, do të arrijmë të minimizojmë të gjitha rastet kur krimi i organizuar vazhdon aktivitetin e tij edhe në sistemin penitenciar”, nënvizoi Gjonaj.

Prokurori i Antimafias Italiane, Federico Cafiero De Raho theksoi se “kohët e fundit ka pasur shumëfishim të hetimeve nga ana shqiptare dhe italiane. Skuadrat hetimore të përbashkëta po punojnë për të luftuar sa më mirë organizatat kriminale shqiptare, që kryejnë veprimtarinë në Shqipëri dhe Itali”.

Sipas tij, rezultatet shihen, sepse edhe arrestimet kanë qenë të shumta gjatë vitit të fundit.
De Raho shtoi se të shumta janë edhe projektet e fundit mes autoriteteve gjyqësore italiane dhe shqiptare, gjë që më parë nuk ekzistonte.

“Ka zhvillim të madh nga ana shqiptare të mjeteve të ndryshme për të luftuar sa më mirë krimin e organizuar”, tha De Raho./atsh

Fillon monitorimi 24 orë për 270 të dënuar me kamera në burgje Read More »

Soreca: Shqipëria, përparime të rëndësishme kundër krimit të organizuar

Aktualitet / /

Ambasadori i Bashkimit Europian, Luigi Soreca, theksoi rëndësinë e progresit të Shqipërisë në luftën kundër krimit të organizuar, si një nga pikat kyçe që do ndikojë në vendimin e Bashkimit Europian në qershor.

“Këshilli i BE-së në qershor të këtij viti do të marrë një vendim të rëndësishëm për të ardhmen e negociatave mes Bashkimit Europian dhe Shqipërisë. Një nga prioritetet kyç, në bazë të së cilave ky vendim do të marrë parasysh janë rezultatet konkrete që Shqipëria do të arrijë kundër krimit të organizuar dhe korrupsionit”, tha Soreca në fjalën e tij në konferencën “Mjetet në luftën kundër krimit të organizuar: Masat parandaluese pasurore dhe masat brenda sistemit të burgjeve në eksperiencën italiane”.

Ambasadori Soreca u shpreh se “ka pasur përparime të rëndësishme në muajt e fundit si nga pikëpamja e ndërtimit të institucionit të gjyqësorit me krijimin e dy këshillave të parashikuara nga kushtetuta, ka pasur operacione të rëndësishme, si dhe arrestime të rëndësishme”.

Sipas tij, tani është momenti për të vazhduar konsolidimin e mëtejshëm të këtyre veprimeve me rezultate konkrete dhe me vendime të rëndësishme.

“BE e mbështet këtë veprim, këtë aksion nga pikëpamja politike dhe financiare, por edhe operative”, shtoi Soreca.

Kreu i BE-së, Soreca theksoi gjithashtu se “konfiskimi i pasurive të paligjshme është i rëndësishëm në parandalimin e luftës kundër krimit të organizuar dhe korrupsionit. Autoritetet shqiptare të eksperimentojnë dhe përmirësojnë aktivitetin në sektorin e masave parandaluese”, tha Soreca.

Soreca u shpreh se “ne presim vendime përfundimtare të konfiskimit, por është edhe një sinjal i progresit që ky vend po bën kundër krimit të organizuar dhe korrupsionit.
Prania ime këtu sot është për të dëshmuar rëndësinë që kjo temë ka për BE-në”. /atsh

Soreca: Shqipëria, përparime të rëndësishme kundër krimit të organizuar Read More »

Çuçi: Zero tolerancë ndaj kujtdo që abuzon me sigurinë ushqimore

Aktualitet, Problematika / /

Ministri i Bujqësisë dhe Zhvillimit Rural, Bledi Çuçi, reagoi sot pas bllokimit të 41.7 tonë banane me cilësi jo të përshtatshme për konsum njerëzor, duke theksuar se “kur vjen fjala tek siguria ushqimore zbatimi i ligjit do të jetë pa kompromis”.

“Zero tolerancë ndaj kujtdo që abuzon me cilësinë e produkteve që ne konsumojmë. Vlerësoj aksionin e Autoritetit Kombëtar të Ushqimit në Durrës për bllokimin e 41.7 tonëve banane me probleme për konsum njerëzor”, thekson Çuçi.

Ministri Çuçi inkurajon të gjithë trupën e inspektorëve të AKU-së kudo në Shqipëri të tregohen vigjilentë ndaj çdo rasti dhe të zbatojnë ligjin me rigorozitet.

Po ashtu, ministri fton qytetarët të jenë bashkëpunes me AKU-në duke denoncuar rastet e produkteve të papërshtatshme për konsum.

“Le të jemi të ndërgjegjshëm se siguria ushqimore është një sfidë e përbashkët. Krahas punës së AKU-së dhe institucioneve të tjera, kontributi i qytetarëve është i domosdoshëm për të pasur në tregjet tona produkte cilësore”, nënvizoi Çuçi.

Sipas tij, siguria ushqimore është një komponent i rëndësishëm i sigurisë kombëtare, prandaj ne do të bëjmë çdo pë​rpjekje që shqiptarët të konsumojnë produkte me standarde.

Autoriteti Kombëtar i Ushqimit në Durrës bllokoi sot 41.7 tonë banane me cilësi jo të përshtatshme për konsum njerëzor. Ngarkesa vinte nga Kosta Rika. Pas konstatimit nga inspektorët e AKU-së ajo u kthye mbrapsht në vendin e origjinës sipas legjislacionit në fuqi./atsh

Çuçi: Zero tolerancë ndaj kujtdo që abuzon me sigurinë ushqimore Read More »

Në vijim të punës për kapjen e personave në kërkim, gjatë 24 orëve të fundit kapen nga Policia e Vlorës 3 persona të shpallur në kërkim

Aktualitet, Lajmi i fundit / /

Në vijim të punës për kapjen e personave në kërkim, gjatë 24 orëve të fundit kapen nga Policia e Vlorës 3 persona të shpallur në kërkim. Gjithashtu është arrestuar në flagrancë për vjedhje edhe një person tjetër.

Specialistët e Seksionit për Hetimin e Krimit Kundër Personit dhe Pronës kanë bërë ndalimin e shtetasit në kërkim L. B., 50 vjeç, banues në Vlorë. Ndalimi i tij u bë mbi bazën e Urdhrit të Ndalimit të Prokurorisë pranë Gjykatës së Shkallës së Parë Vlorë, si i dyshuar për veprat penale “Vrasje me paramendim, e mbetur në tentativë, kryer në bashkëpunim” dhe “Mbajtja pa leje dhe prodhimi i armëve, armëve shpërthyese dhe municionit”.

Ngjarja i referohet datës 6 Gusht 2018, ku në lagjen “Pavarësia” Vlorë, L.B, dyshohet se ka tentuar të vrasë me armë zjarri shtetasin A.M. Kristi Balli, 24 vjeç, banues në Vlorë. Gjykata e Shkallës së Parë Vlorë e ka dënuar me 1 vit burgim për veprën penale të “Vjedhjes”.

Po ashtu u ndalua, Ermal Arapaj, 28 vjeç, banues në fshatin Shushicë, Vlorë. Gjykata e Shkallës së Parë Vlorë e ka dënuar me 1 vit burgim për veprën penale “Moskallëzim krimi”.

Gjithashtu është arrestuar në flagrancë shtetasi A.G., 29 vjeç, pasi në lagjen “Isa Boletini” dyshohet se ky shtetas ka vjedhur disa sende shtëpiake në banesën e shtetasit K.Sh. Vazhdon puna hetimore për dokumentimin e ngjarjeve të ndryshme me qëllim kapjen dhe vendosjen para përgjegjësisë penale të autorëve përkatës. /atsh

Në vijim të punës për kapjen e personave në kërkim, gjatë 24 orëve të fundit kapen nga Policia e Vlorës 3 persona të shpallur në kërkim Read More »

Kushte më lehtësuese për ripajisjen me pasaportë të shqiptarëve jashtë shtetit

Aktualitet / /

Komisioni për Sigurinë Kombëtare u mblodh sot dhe miratoi projektligjin “Për një ndryshim në ligjin nr. 8668, datë 23.10.2000, “Për pajisjen e shtetasve shqiptarë me pasaportë për jashtë shtetit”.

Në fjalën e saj, kryetarja e Komisionit, Ermonela Felaj, theksoi se ky është një ndryshim që adresohet vetëm me ligj, përderisa rastet e pavlefshmërisë së pasaportës, janë përcaktuar vetëm me ligj edhe ndryshimet duhet të reflektohen në ligj.

E ftuar në komision, për të shpjeguar ndryshimet e propozuara nga Ministria e Brendshme, ishte zëvendësministrja e kësaj ministrie, Rovena Voda.

Gjatë fjalës së saj në komision, Voda theksoi faktin se propozimet për ndryshim të ligjit, vijnë si nevojë e lehtësimit të shërbimeve për qytetarët e Republikës së Shqipërisë. Sipas saj, ligji ka qenë i kufizuar vetëm në rastin e pajisjes me pasaportë biometrike, kurse në rastin e ripajisjes, përkufizohej me një fjali të vetme, e cila adresonte të njëjtat procedura, si në rastin e pajisjes.

“Kjo nevojë lind edhe për shkak të rritjes së fluksit të qytetarëve për ripajisje me pasaportë, sepse në fund të 2019 shumë pasaportave, iu vjen fundi i vlefshmërisë, kështu që nëpërmjet këtij ndryshimi përcaktohet qartë kur shtetasi ka të drejtë të ripajiset me pasaportë biometrike. Ripajisja me pasaportë duhet të ketë disa kushte më lehtësuese, sesa pajisja. Për këtë arsye janë hapur disa zyra të vogla dhe në vazhdim po punojmë për hapjen e zyrave më të mëdha në të gjithë vendin”, tha Voda.

Relatorja Elena Xhina, theksoi në fjalën e saj, se ky ndryshim në ligj, është një ndryshim i vogël, por që sjell risi në kuptimin e faktit që tashmë qytetarët mund të nxjerrin pasaportat 6 muaj para afatit të skadimit.

Pas pyetjeve dhe diskutimeve nga deputetët, drejtuar zëvendësministres, projektligji u miratua në parim, nen për nen dhe në tërësi./atsh

Kushte më lehtësuese për ripajisjen me pasaportë të shqiptarëve jashtë shtetit Read More »