Irina

Ministri i Bujqësisë dhe Zhvillimit Rural Blendi Çuçi sqaroi në një emision televiziv perceptimet e gabuara se të gjitha ushqimet janë me hormone, gjë që rezulton e pavërtetë.

“Ka probleme, por patjetër që shumica e ushqimeve nuk janë me hormone. Një tjetër koncept i gabuar është që ushqimet që çohen jashtë janë më të mira, sepse nuk mund të jetë një serë e cila spërkatet ndryshe për tregun e brendshëm dhe ndryshe për tregun e jashtëm. Kjo nuk ndodh pasi spërkatja bëhet njëlloj”, u shpreh ministri i Bujqësisë dhe Zhvillimit Rural, duke folur për denoncimet e medies në lidhje me produktet ushqimore me hormone.

“Hormonet vetë nuk janë akoma të vërtetuara shkencërisht nëse janë të dëmshme për shëndetin e njeriut. Nuk ka deri sot një provë shkencore që hormoni është i dëmshëm për shëndetin e njeriut. E vetmja gjë që është vërtetuar është që deformon produktin nga pamja fizike dhe nga shija. Sot në botë 90% e gjërave që konsumohen janë të modifikuara gjenetikisht. Sot në serat shqiptare meqë përmendët rastin e domateve fitorregullatorët për to janë bletët në 80% të serave shqiptare. Kjo është një metodë moderne dhe 80% e serave shqiptare përdorin bletët si fitorregullator. Kemi probleme, patjetër, dhe jam i gatshëm për bashkëpunim. Të denoncohen rastet dhe të shkojmë tek e keqja”, tha Çuçi.

Duke sqaruar rastin e mishit nga Brazili, po ashtu i denoncuar në një emision investigativ, Çuçi tha se në Europë, sot Shqipëria është i vetmi vend që kontrollon 100% të importeve që vijnë nga Brazili për mishin.

“Shqipëria është i vetmi vend që gjithë mishin që vjen nga Brazili 100% e kontrollon kur është këtu. Vetëm në këto muaj të parë të vitit ne kemi kthyer në vendin e origjinës nga Brazili 180 ton mish, ku kanë hyrë në vendin rreth 300 ngarkesa nga këto janë 15 ngarkesa të kthyera. Në thertoret e licencuara nuk hyn asgjë e pakontrolluar pasi kemi disiplinuar tregun”, tha ai.

“‘Kemi probleme me mënyrën sesi është rregulluar shërbimi veterinar në Shqipëri dhe unë kam marrë nismën që ta ribëjmë komplet nga e para, sepse fragmentimi që ka ndodhur midis pushtetit lokal, klinikave veterinere, ministrisë dhe veterinerëve privat ka krijuar një problem. P.sh sot matrikullimi bëhet në klinika private pra është decentralizuar tek privati. Ky është një problem që do marrë zgjidhje pas kam marrë iniciativën të bëjmë një ligj për ridimensionimin total të shërbimit veterinar, pasi nuk është vetëm çështja e matrikullimit por me veterinarinë fillojnë të gjithë problemet që dalin në tavolinat e konsumatorëve”, përfundoi ministri Çuçi. /atsh

Autoriteti Kombëtar i Ushqimit (AKU) në kuadër të masave për garantimin e sigurisë ushqimore, ka ndërmarrë aksione në terren duke bashkërenduar dhe koordinuar veprimtarinë inspektuese të Drejtorive Rajonale Fier dhe Berat.

Plani i monitorimit është organizuar nga Drejtoria e Përgjithshme e AKU-së. Zbatimi i tij në terren, në zonat ku ushtrojnë aktivitetin e tyre Pikat e Grumbullimit të Perimeve dhe Frutave, është koordinuar nga Drejtori i Menaxhimit dhe Inspektimit, Sefer Sefa.

Referuar lajmeve të bëra publike nga disa media në lidhje me përdorimin e preparateve kimike (pesticide) mbi normën e lejuar në fermat (serat) e zonave të Beratit e Fierit, trupat inspektuese të AKU-së kanë kryer verifikime në magazinat që ushtrojnë aktivitet për “Ruajtjen dhe shitjen e fruta perimeve me shumicë”.

Gjate këtyre dy ditëve janë inspektuar një sërë subjektesh me këtë natyrë aktiviteti duke u marrë mostra për analizim në laborator për mbetjet pesticide. Për rastet kur është konstatuar mos përmbushje e kërkesave ligjore, inspektorët kanë marrë masa administrative ndaj subjekteve. Shkeljet e konstatuara kishin të bënin kryesisht me mangësi në dokumentacionin për gjurmueshmërinë e produktit.

Drejtoria e Përgjithshme e AKU-së edhe në këto dite pushimi dhe festash vijon të jetë në shërbim për të adresuar problematikat e sigurisë ushqimore. Duke ushtruar kontrolle në operatoret e biznesit ushqimor sipas planit vjetor të kontrollit zyrtar dhe planeve sezonale të monitorimeve.

AKU konkludon se perimet e prodhuara nga fermerët e Myzeqesë dhe kudo në vend janë brenda parametrave të sigurisë dhe standardeve ushqimore bashkëkohore. Për rrjedhojë edhe të kërkuar nga vendet e BE-së dhe kjo vërehet nga rritja e eksporteve të fruta-perimeve drejt vendeve si Greqia, Italia dhe vende të tjera evropiane etj. Pothuajse çdo ditë nga Shqipëria dalin produkte (fruta, perime) me destinacion vendet e BE-së.

Autoriteti Kombëtar i Ushqimit i bën thirrje qytetarëve që të denoncojnë menjëherë çdo subjekt që abuzon dhe cenon sigurinë ushqimore. /atsh