Aurora

“Në ambicien tonë, Rindërtimi nuk është thjesht një politikë strehimi në zona të caktuara, por është një mundësi e re për vendin që të ecë me një shpejtësi të re drejt një situate më të mirë ekonomike, urbane dhe sociale”.

Kështu deklaroi sot kryeministri Edi Rama, në mbledhjen e Komitetit Kombëtar të Rindërtimit, të cilës iu bashkuan edhe përfaqësuesit më të mëdhenj të komunitetit të Donatorëve.

Kryeministri theksoi se “Programi i Rindërtimit nuk është thjesht një program që duhet të trajtoj dëmet nga tërmeti, por është një mundësi e jashtëzakonshme për të ndërtuar në të njëjtën kohë një program që duhet të jetë një model transparence, efikasiteti dhe rezultatesh të shkëlqyera për njerëzit së pari e mbi të gjitha për Shqipërinë”.

Rama tha se “duke bërë këtë gjë së bashku ne përcjellim një mesazh mjaft të qartë për komunitetin e Donatorëve dhe për popullin shqiptar dhe këtë e bëjmë duke theksuar objektivin tonë të përbashkët për të bërë më të mirën, me atë fillim fantastik që patëm më 17 shkurt në Bruksel”.

“Ne e dimë shumë mirë që ka rezultate të ndryshme në përballimin e katastrofave dhe situatave pas tyre në vende të ndryshme dhe po kështu edhe brenda të njëjtit vend. Ka përvoja suksesesh të mëdha, siç ka edhe përvoja të hidhura dështimi. Ne kemi bërë detyrat e shtëpisë, i kemi kaluar të gjitha ato dhe jemi përpjekur të kuptojmë se si është ndërtuar suksesi, apo përse ka ndodhur dështimi. Mbështetur në të gjitha këto dhe duke qenë mjaft i vetëdijshëm se për ne kjo është përvoja e parë, sepse na duhet të merremi me diçka që Shqipëria nuk është marrë kurrë më parë, menduam se gjëja më e mirë për të bërë është të kërkonim me mjaft përulje ndihmën tuaj”, tha Rama.

Ai tha se pjesëmarrja e ndërkombëtarëve në këtë tryezë, jo thjesht do të garantojë palët, por edhe mund të sjellë këtu mjaft njohuri falë ekspertizës të jashtëzakonshme që kanë ndërtuar përgjatë shumë viteve në vendet dhe organizatat e tyre”./atsh

Mos kini frikë t’i kërkoni Zotit falje, ai nuk lodhet kurrë duke falur”, tha sot Kryeministri Edi Rama, duke përcjellë të tjera fjalë të shenjta me mesazhin e tij.

Ishin këto fjalë të shenjta nga Papa Françesku që Kryeministri Rama përcolli mëngjesin e sotëm përmes rubrikës “Fjalë të Shenjta”.

Duke cituar fjalë të shenjta nga librat e shenjtë, por edhe nga personalitetet botërore, Kryeministri Rama ka përcjellë apelin e solidaritetit dhe ndihmës njerëzore ndaj të prekurve nga tërmeti i 26 nëntorit, por edhe mesazhe aktuale./atsh

Sipas Shërbimit Meteorologjik Ushtarak, moti për ditën e sotme parashikohet me kthjellime dhe vranësira mesatare dhe të dendura.

Parashikohen reshje shiu në veri e jug. Në qarkun Shkodër parashikohet që në mbrëmje të ketë shtrëngata, ndërsa në në majat e alpeve parashikohet borë.

Parashikohet mjegull e mjegullinë lokale nëpër lugina. Era do të fryjë me drejtim Jug-Jugperëndim 1-12m/sek. Përgjatë vijës bregdetare, luginës së Drinit, parashikohet erë e fortë me rrahje 25-30m/s. Valëzimi parashikohet i forcës 5-6 ballë.

Temperaturat parashikohen:

QYTETET Temperaturat në °C Sigla
Shkodër 5/19 re shi
Kukës 4/14 re shi
Lezhë 6/17 re shi
Dibër 5/16 re shi
Durrës 7/17 re diell
Tiranë 8/19 re diell
Elbasan 9/20 re diell
Berat 7/19 re diell
Vlorë 7/19 re shi
Korçë 3/15 re diell
Gjirokastër 3/19 re shi
Sarandë 11/18 re shi
/atsh

Në zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, Operacioni Forca e Ligjit vijon intensivisht punën për kryerjen e veprimeve komplekse, në bashkëpunim me strukturat e tjera të Policisë së Shtetit.

Në njoftimin për mediet, OFL bën të ditur se u ka dërguar kërkesat për vetëdeklarim të pasurisë, shtetasve: L. D., banues në Tiranë, i dënuar për veprat penale “Krijimi i bandës së armatosur dhe organizatës kriminale”, “Armëmbajtja pa leje”, “Organizimi dhe drejtimi i organizatave kriminale” dhe “Falsifikimi i letërnjoftimeve apo vizave” e kryer në bashkëpunim si dhe A. B., banues në Tiranë, i dënuar për veprat penale “Krijimi i bandës së armatosur dhe organizatës kriminale”, “Armëmbajtja pa leje” dhe “Organizimi dhe drejtimi i organizatave kriminale”.

Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së, të cilat do t’i dërgohen SPAK-ut, për veprime të mëtejshme.

OFL bën me dije se të gjithë personat që iu është dërguar kërkesa me shkrim për vetëdeklarimin e burimeve të pasurisë, i kanë plotësuar formularët dhe i kanë dorëzuar pranë OFL-së, e cila ka vijuar me procedurat, sipas përcaktimit në Aktin Normativ nr. 1, të datës 31 janar 2020.

OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë./atsh