Aurora

Turistët dhe vizitorët vendas kjo fundjavë i pret ndryshe në Theth. Përveçse bukurive të mahnitshme të natyrës së egër në majat e thepisura të Bjeshkëve të Namuna dhe buzë lumit Shalë ata dhe do të argëtohen.

Zanat e malit dhe legjendat në Theth do të zgjohen nga festivali i parë modern i dedikuar trashëgimisë të Alpeve Shqiptare ”Zâ Fest”.

”Zâ Fest” vjen me edicionin e tij të dytë, për dy netë radhazi, më 20 dhe 21 korrik, duke risjell në Theth muzikën më të mirë shqip, por këtë radhë duke zgjeruar akoma më shumë larmishmërinë kulturore.

Turistët do të shijojnë ritmet e artistëve Hasa-Mazzota, Andrra, Oborri dhe Linda Rukaj, të cilët do të performojnë live nga Kisha e Thethit. Një repertor i pafundmë ritmesh, notash dhe vokalesh që mund të përthyejnë çfarëdolloj barriere kulturore.

Nën shoqërinë e njëri-tjetrit vizitorët do të mund të shijojnë sfondin e duhur me panoramën mahnitëse të Thethit.

Këtë vit ky festival është gjithëpërfshirës, i cili kombinon muzikën më të mirë live me artet figurative, shijet tradicionale dhe aktivitetet sportive në natyrën e bukur të Thethit.

Pra mos mungoni për të eksploruar natyrën e bukur dhe të rrallë të Thethit duke ndërthurur eksplorimin, gatimin, argëtimin dhe artin. Në majat më të larta të vendit tonë këtë verë ka festë dhe argëtim për të gjitha grupmoshat. /atsh

16 zonat e propozuara për qëllim investime në fushën e turizmit, u prezantuan në tryezën me investitorë, përfaqësues të agjencive shtetërore, përfaqësues të shoqatave turistike, kryetarët e bashkive, dhe tour operatorëve.

16 zonat e propozuara, janë reflektim i ligjit që përcakton qartë se kush janë zonat me përparësi zhvillim turizmi: ato që kanë një përqëndrim të lartë të produktit turistik. Zonat janë zgjedhur mbi bazat: e vlerave natyrore, historike, kulturore dhe social – ekonomike.

Ministri i Turizmit, Blendi Klosi deklaroi se ndonëse këto zona zënë vetëm 20% të territorit të vendit, këto të fundit do të shërbejnë si një shtysë për zhvillimin e turizmit dhe kthimin si destinacione turistike veçanërisht për turistët e huaj.

“20% e territorit të vendit që ka shumë nevojë të mbrohet dhe kjo që po bëjmë sot është një mbrojtje që i japim zonave me përparësi zhvillimi në vendin tonë”, -tha Klosi gjatë aktivitetit të zhvilluar sot në Pallatin e Kongreseve me grupet e interesit.

Zonat me përparësi zhvillim turizmi:

-Parku Natyror i Alpeve

-Zona e bregdetit(2km nga vija brgdetare0

-Parku natyror i Korabit

-Parku i Belshit

-Liqenet e Ohrit dhe Prespës

-Liqeni i Shkodrës

-Liqeni i Ulzës

-Lugina e Vjosës dhe Zagorisë

-Parku Natyror i Lurës

-Zona e Krastër, zona e Dajtit

-Mali i Tomorrit

-Mali – Moravës

-Zona e Dajtit

-Kanionet e Osumit

-Pyjet e Jabllanicës

z.tosku/atsh

Rritja e numrit të turistëve me 9.1% këtë vit, krahasuar me po të njëjtën periudhë të vitit të kaluar, ka sjellë 30 milionë euro të ardhura më shumë për ekonomikë e vendit.

Ishin këto të dhënat që ndau vetë ministri i Turizmit, Blendi Klosi ndërsa vuri në dukje se viti i kaluar shënoi 5.1 milionë turistë të huaj dhe këtë vit pritshmëritë janë shumë më të larta.

“Deri tani kemi matur dhe vlerësuar turizmin vetëm nga statistikat e hyrjes dhe daljes, të turistëve të ndryshëm që kanë hyrë në vendin tonë. Po të shikojmë shifrat realisht, çdo ministër dhe çdo qeveri do të ndihej pozitiv po të shikosh rritjen në vendin tonë. Viti 2017 shënoi 5.1 milionë turistë të huaj të hyrë në vendin tonë dhe krahasuar me një vit më parë, është një rritje shumë e madhe, por krahasuar me atë çfarë do të duhet të arrijmë në Shqipëri, realisht mendojmë se kemi shumë më tepër aftësi dhe mundësi”, – tha Klosi.

Më tej, ai sqaroi se “vetëm në 4-mujorin e parë të këtij viti, ne kemi pasur një rritje prej 9.1% të numrit të turistëve krahasuar me një vit më parë, duke shtuar rreth 30 milionë euro të ardhura më shumë në ekonominë shqiptare”.

Klosi tha se ajo ç’ka qeveria synon është që turistët të fillojnë të vijnë që në muajin maj deri në tetor dhe jo vetëm në muajt korrik dhe gusht./atsh