Aurora

Nëse të duhet të vizitosh të 61 bashkitë e vendit, menjëherë arrin të kuptosh ndryshimin mes së kaluarës dhe investimeve që i kanë ndryshuar pamjen qyteteve, por edhe biznesi njeh një tjetër zhvillim.

Për ministrin e Turizmit, Blendi Klosi, mjaftuan vetëm disa investime dhe projekte me vizion që u implementuan përmes “Rilindjes Urbane”, për të ndryshuar impaktin te qytetarët.

Përpara përfaqësuesve të bankave, gjatë një takimi të zhvilluar në Lezhë lidhur me programin e “100 fshatrave”, Klosi kërkoi mbështetjen e tyre për të investuar në zhvillimin e turizmit. Nga ana institucionale, ai siguroi përfaqësuesit bankarë që qeveria do të japë mbështetje të madhe lidhur me projektet.

“Ajo që duam të sigurojmë është që ky projekt do të ketë mbështetje shumë të madhe qeveritare dhe ‘100 fshatrat’ do të jenë modele të suksesshme biznesi. Dhe koha ka treguar se përsa i përket hoteleve që kërkojnë të arrijnë nivelin e 4 apo 5 yjeve, janë kthyer në modele suksesi. Modeli i Fishtës, i “Mrizit të Zanave”, tregon se këta djem kanë bërë pa nevojën e ndihmës së bankave. ‘100 fshatrat’ nuk do të jenë vetëm agro-turizëm, por ne do të përpiqemi që në kuadër të reformës territoriale të jenë pjesë e 61 bashkive,  nga pikëpamja mjedisore, ne mund të kemi pole të vërteta zhvillimi, nëpërmjet 100 fshatrave. Kështu, të gjithë komponentët që përbëjnë një fshat, duhet t’i shohim nga pikëpamja administrative dhe financiare”, – shpjegoi Klosi.

Ndërsa kërkoi mbështetjen e përfaqësueseve të bankave, ai siguroi suksesin që do të kenë këto investime në agro-turizëm, pasi kohët e fundit është rritur edhe numri i turistëve që kanë vizituar Shqipërinë, krahasuar me një vit më parë.

Shumë pak investime në agro-turizëm kanë dështuar. Shumica prej investimeve në këtë fushë janë histori suksesi. Ajo që do të doja të garantoja është rritja e numrit të turistëve në vendin tonë, çka sipas ministrit premton edhe më shumë.

“Në 6-mujorin e parë të këtij viti ne kemi një rritje 10% më shumë, krahasuar me një vit më parë. Ne parashikojmë që do ta kalojmë këtë përqindje dhe padyshim që do të sjellin më shumë të ardhura. Kjo që po bëjmë është një bisedë 100% ekonomi”, – përfundoi Klosi.atsh

Drejtoria e Hetimit Tatimor Rajoni Jugor, ka intensifikuar kontrollet dhe verifikimet për të reduktuar evazionin fiskal, në kuadër  të zbatimit të planit të masave për sezonin turistik.

Strukturat e Hetimit Tatimor njoftuan sot se kanë konstatuar se subjekti “Markela Kokëdhima” me vendndodhje në Gjirin e Panormit (Qeparo Fushë) kishte kryer një sërë shkeljesh tatimore gjatë ushtrimit të aktivitetit ekonomik.

Gjithashtu, në datë 26 korrik nga strukturat e Hetimit Tatimor  Rajoni Jugor u konstatuan shkelje nga ana e subjektit “Valta Hotel”, me vendndodhje në Qeparo, Himarë. Ndaj tij   është marrë masa e bllokimit të aktivitetit për 30 ditë kalendarikë për “moslëshim kuponi tatimor” (hera e dytë).

Ndërsa nga kontrollet e tjera të ushtruara në Himarë, Ksamil, Qeparo, Borsh, etj.. u morën edhe masat si më poshtë vijojnë:

– Për subjektin Ardenis Hamza, me vendndodhje në Ksamil, hotel i paregjistruar në organet tatimore, bllokim deri në regjistrimin si subjekt me TVSH.

-Për subjektin Camping Kranea, me vendndodhje në Livadh, penalizim për moslëshimin e kuponit tatimor për herë të dytë dhe bllokim i ushtrimit të aktivitetit për 30 ditë kalendarike.

– Për subjektin Mariglen Lika, me vendndodhje në Ksamil, hotel i paregjistruar në organet tatimore, bllokim deri në regjistrimin si subjekt me TVSH.

– Për subjektin Kelen-ja, me vendndodhje në Livadhja, penalizim për moslëshimin e kuponit tatimor për herë të dytë dhe bllokim i ushtrimit të aktivitetit për 30 ditë kalendarike.

– Për subjektin Vladimir Lani, vendndodhja Qeparo, penalizim për moslëshimin e kuponit tatimor për herë të dytë dhe bllokim i ushtrimit të aktivitetit për 30 ditë kalendarike.

– Për subjektin Dëshira Mahili, vendndodhja Ksamil, aktivitet i paregjistruar në organet tatimore, bllokim deri në regjistrimin si subjekt me TVSH.

– Për subjektin Farije Jahaj, vendndodhja Ksamil, hotel i paregjistruar në organet tatimore, bllokim deri në regjistrimin si subjekt me TVSH.

– Për subjektin Bujar Kofina, vendndodhja Borsh, aktivitet i paregjistruar në organet tatimore, bllokim deri në regjistrimin si subjekt me TVSH

– Për subjektin Areti Likoka, vendndodhja Himarë, hotel i paregjistruar në organet tatimore, bllokim deri në regjistrimin si subjekt me TVSH.

Drejtoria e Hetimit Tatimor në DPT, tërheq vëmendjen e tatimpaguesve që operojnë në zonat turistike të respektojnë detyrimet ligjore, për të siguruar një ecuri pozitive të sezonit veror.

Kryetari i bashkisë së Tiranës Erion Veliaj reagoi lidhur me vendimin e Presidentit Ilir Meta, i cili ktheu sot për rishqyrtim në Kuvend ligjin për ndërtimin e Teatrit të ri Kombëtar.

“Kthimi nga Presidenti i Ligjit që do t’i jepte Tiranës tonë një Teatër të Ri, modern, i projektuar nga një prej arkitektëve më në zë të gjeneratës sonë, ishte një zhgënjim! Jo sepse presidentët, në të kaluarën, nuk janë bërë palë me partitë politike për të kundërshtuar projekte si ai i Këndit të Lodrave te Liqeni, por sepse mendova se pas 3 vitesh progres në qytetin tonë, me një Shesh të Ri, një Bulevard të Ri, një Pazar të Ri e një Unazë të Re, e kishim tejkaluar kohën e sabotimeve të qytetit dhe se ishte krijuar pjekuria për të dalë mbi partitë e mbi familjet politike në vend”, deklaron Veliaj.

Ai shton më tej se “teatri i sotëm në kryeqytet, me kryetarë bashkish nga Kamza e Shkodra, që kanë probleme serioze me funksionimin qyteteve të tyre, mund të na ishte kursyer. I ngjan protestuesve të importuar nga ish-Presidenti për Këndin e Lodrave. Të gjithë e dimë si përfundoi ajo betejë: Presidenti u diskreditua në histori si një noter partiak. Kurse, ultimatumi prej kalamani të SHQUP-it nga ish-gjumashi i bashkisë së Tiranës, nuk do kalonte dot as një audicion për teatër kukullash”. Ai e konsideron si një skenar të qepur keq në parapritje të refuzimit të ligjit, që fyen inteligjencën e kujtdo që i thotë vetes qytetar.

Por, vendimi i sotëm, nënvizon Veliaj, solli një dobi, sepse ndau qartazi palët në Tiranë. “Ata që shkatërruan ‘Zogun e Zi’ apo sheshin ‘Skënderbej’ para një dekade, janë po ata sot. Të gjithë bashkë kundër zhvillimit. Lajmi i mirë është se, pala tjetër – shumica e arsyeshme – është sot më kompakte dhe më e bashkuar se kurrë. Aktorë, regjisorë, qytetarë e progresistë kanë parë se veç me punë, pasion e përkushtim ne mund ta ndryshojmë Shqipërinë e ta kthejmë Tiranën në stolinë moderne të kombit tonë”.

Kryebashkiaku shton më tej se “teksa pritëm 40 vjet për një Teatër të ri, do presim edhe 40 ditë që Parlamenti ta rivotojë në shtator e t’i hapë rrugë projektit modern – në tokën e vet e me teknologjinë më të fundit. E mira, e bukura dhe e drejta, herët a vonë, triumfojnë; është vetëm çështje kohe! Koha e humbur është e vetmja dhimbje që kemi në këtë banalitet politik, sepse për ne çdo minutë vlen shumë, ndërsa për ata që kanë vrarë dekada të tëra kohë shqiptare, koha është vetëm një mjet për të na penguar”.

“Sidoqoftë, ne nuk do t’i humbasim këto dyzetë ditë, por do bashkëpunojmë me komunitetin teatror që të jemi gati sapo të kalojë ligji. Shumë faleminderit të gjithë përfaqësuesve të denjë të atij komuniteti, për peticionin dërguar Presidentit dhe të gjitha autoriteteve e partive parlamentare. Teatri i Ri Kombëtar tanimë ka nisur të marrë jetë dhe së bashku, ne do ta ndërtojmë për nderin e një kombi të tërë. Për kënaqësinë e një populli të tërë. Për dinjitetin e një komuniteti të tërë. Për Shqipërinë dhe Tiranën që duam! Forca! Bashkë”, përfundon Veliaj. /atsh