Aurora

AKU bllokon 6,3 ton mish të ngrirë në Korçë

Problematika / /
Autoriteti Kombëtar i Ushqimit (AKU) ka bllokuar në Korçë 6 ton e 323 kg mish të ngrirë, jashtë kushteve higjeno – sanitare.
Në një njoftim për shtyp, AKU bën të ditur se, gjatë kontrollit në subjektin e shtetases, Mirela Dvorani me Nipt K74304001Q u konstatua mungesë e kushteve higjeno-sanitare në ambientet e tregtimit. Gjithashtu në dhomat frigoriferike u konstatuan disa produkte “mish i ngrirë” (1100 kg stomak pule, 3432 kg dhjam derri, 1316 kg tremiks koke, 100 kg dhjam viçi, 350 kg këmbë viçi, 25 kg kokë qingji) që ishin të paketuara por pa asnjë të dhënë etiketimi, si dhe pa dokumentacion shoqërues: faturë tatimore dhe certifikatë veterinare të cilat u bllokuan me destinacion asgjësimin.
Për shkeljet e mësipërme përveç masës administrative së bllokimit të produktit u morën masat administrative me gjobë në vlerën 600.000 lekë si dhe ndalim i menjëhershëm i aktivitetit.

Pas zbulimit e goditjes së rastit, AKU ka bashkëpunuar edhe me strukturat e hetimit tatimor si dhe Policinë vendore. Gjithashtu Aku për rastin po bashkëpunon edhe me strukturat doganore, për shkak të dyshimeve se kjo sasi produkti është futur kontrabandë

Autoriteti Kombëtar i Ushqimit me qëllim garantimin e sigurisë ushqimore, i bën thirrje edhe operatorëve të biznesit ushqimor që të jenë të kujdesshëm në blerjen e lëndëve të para – produkte shtazore duke kërkuar e marrë nga furnitorët vetëm produkte me etiketë dhe të shoqëruara dokumentacion të plotë veterinar e fiskal – pasi është një detyrim ligjor i tyre përveçse përbën një masë tepër të rëndësishme për sigurinë ushqimore të klientëve të tyre./atsh

AKU bllokon 6,3 ton mish të ngrirë në Korçë Read More »

Sezoni turistik, 500 aktivitete festive nga veriu në jug

Aktualitet, Turizem / /

Zonat turistike në të gjithë vendin nga veriu në jug, më shumë sesa kurrë më parë, vijnë me një kalendar festash dhe aktivitete argëtuese për të gjithë pushuesit.

Kështu, kalendari i festave numëron plot 500 festa për sezonin veror, 300 prej të cilave janë konsumuar me pjesëmarrjen e dhjetëra mijëra pushuesve  dhe banorëve të zonave që kanë shprehur interes të madh kundrejt tyre. Shifrat u bënë publike nga ministri i Turizmit, Blendi Klosi.

‘Viti 2018 ka sjellë risi në gjallërimin e të gjitha zonave turistike nga veriu në jug përmes një programi shumë të pasur festash dhe aktivitetesh argëtuese. Kalendari i festave numëron plot 500 festa për sezonin veror, 300 prej të cilave janë konsumuar me pjesëmarrjen e dhjetëra mijëra pushuesve  dhe banorëve të zonave të cilët kanë ndjerë që ky është një moment shumë interesant jo vetëm për të zhvilluar imazhin turistik të zonave të tyre por edhe për të ngritur biznesin e vogël, e për të pasur mundësi riaktivizimi të burimeve të brendshme të komunitetit . Edhe gjatë muajit gusht do të vazhdojë ky kalendar sipas dakordësisë që kemi  midis institucioneve tona”, tha Klosi.

Më tej, ai vuri në dukje se një nga projektet më interesant me të cilën ky sezon vjen është Smile Albania, ku të huajt mirëpriten në zonat kufitare nga të rinjtë e vendit, me buzëqeshje dhe informacione orientuese per ta.

”Programi ynë i ri,  Smile Albania është aktiv në të gjitha zonat hyrëse të vendit tonë me përparësi zhvillimi të turizmit. Duke pasur parasysh që 1 mijë të rinjtë në 26 pikat e info-point të dhurojnë buzëqeshje, informacion mbi bukuritë natyrore të vendit tonë, potencialin turistik dhe të bëjnë edukimin e munguar mjedisor në konceptin e turizmit shqiptar”, -përfundoi Klosi. /atsh

Sezoni turistik, 500 aktivitete festive nga veriu në jug Read More »

Ky, viti i kthesës për Shqipërinë si destinacion europian

Aktualitet / /

Rreth 85% e pushuesve që kanë hyrë në Shqipëri për herë të parë, duan të rikthehen sërisht në vendin tonë.

Këto të dhëna u bënë publike nga ministri i Turizmit, Blendi Klosi i cili tha se ”85 % e pushuesve që kanë hyrë në Shqipëri për herë të parë, deklarojnë dëshirën e tyre për t’u rikthyer dhe mbi 92% e këtyre pushuesve deklarojnë se do të rekomandojnë Shqipërinë si destinacion te miqtë e tyre për sezonet e ardhshme turistike”.

Klosi tha se ,”pavarësisht përmirësimeve që solli ky vit, jemi të vetëdijshëm që ka akoma shumë më tepër problematika që na shoqërojnë dhe padyshim kemi akoma më shumë nevojë që të jemi shumë me tepër vigjilentë në menaxhimin e sezonit. Kjo përgjegjësi na takon të parëve ne që jemi ulur këtu, funksionarëve të administratës publike, pushtetit vendor  por aq edhe sektorit privat”.

”Ky vit do të shënojë edhe vitin e kthesës në Shqipëri si destinacion europian turistik , ku turizmi shndërrohet në një mekanizëm ekonomik, i cili sjell në radhë të parë punësim, mirëqenie dhe të ardhura për vetë komunitetin. prandaj kërkojmë që së pari pushteti vendor të jetë në lartësinë e kërkuar”,vijoj më tej ministri Klosi.

Gjithashtu ai shtoi se ,”bizneset turistike, sipërmarrësit e turizmit do t’u kërkoja të kuptojnë që turizmi po shndërrohet në një profesion afatgjatë I cili do të duhet t’i shërbejë  me shumë ndershmëri dhe rigoroztet. E  kemi thënë që duhet të bëjmë më shumë kujdes me transparencën për shërbimet dhe çmimet , transparenca me pushuesit është alfa e suksesit të këtij biznesi. Së dyti organet tona shtetërore sic jemi edhe sot në detyrë do të jemi përgjatë këtij muaji, Të gjithë drejtuesit e lartë shtetërorë do të vazhdojnë të kërkojnë zbatimin e ligjshmërisë në terren. Zbatojmë vetëm ligjin, bëjmë këtë në një format miqësor me pushuesit por ajo që garanton zbatimin e ligjit është ndershmëria dhe barazia karshi të gjithëve”.

Në fund ai e mbylli takimi duke u shprehur se ,”nuk do të tolerojmë asnjë anashkalim të ligjit për emra të njohur ose jo në fushën e biznesit, nuk do të tolerojmë mos garantim dhe barazi të ligjit për çdo shtetas të Republikës së Shqipërisë. Angazhimi ynë i përbashkët duhet të jetë për këtë synim, pra shndërrimin e turizmit në një industri të qëndrueshme  që rrit ekonominë, krijon vende të reja pune dhe zbut varfërinë duke përmirësuar mirëqenien e qytetarëve të vendit tonë”, përfundoi ministri Blendi Klosi. /atsh

Ky, viti i kthesës për Shqipërinë si destinacion europian Read More »

Gjirokastër, rikthehen në identitet rrugët me kalldrëm/Foto

Turizem / /

Rruga “Hito Lekdushi”, tashmë nuk do të jetë vetëm një sokak për banorët e lagjes “Dunavat”, Gjirokastër, por edhe një shteg turistik për vizitorët e Urës së Ali Pashës.

Investimi i bashkisë së Gjirokastrës, në këtë segment rrugor me një fond prej 2 milionë lekësh, plotëson një tjetër premtim për banorët e lagjes dhe njëkohësisht sjell një infrastrukturë turistike me standarde.

Kjo rrugë mban emrin e patriotit që shtiu kundër Bimbashit turk në Gjirokastër. Hito Lekdushi dhe Bajram Ligu ishin dy anëtarët e çetës së Çerçiz Topullit që i bënë atentat Bimbashit.

Gjirokastra, qytet në jug të Shqipërisë në vitin 2005 është përfshirë në listën e Trashëgimisë Botërore të UNESCO-s. Është një qytet historik dhe vendoset mbi shpatet e luginës së lumit Drino, ka peizazh të mrekullueshëm dhe kufizohet nga male të larta. Karakterizohet nga shtëpitë e stilit otoman me çati të gurta, me ballkone prej druri dhe me rrugë kalldrëmi./atsh

Gjirokastër, rikthehen në identitet rrugët me kalldrëm/Foto Read More »

Evening Standard: Bjeshkët e Namuna, në krye të 10 destinacioneve për 2018

Turizem / /

“Bjeshkët e Namuna” në Shqipëri janë në krye të dhjetë destinacioneve europiane për tu vizituar gjatë muajit shtator, shkruan gazeta britanike “Evening Standard”.

“Bjeshkët e Namuna janë bërë një destinacion popullor i udhëtimit në vitet e fundit, duke të ofruar pamje absolutisht mahnitëse. Udhëtoni atje në shtator për një mot të ngrohtë dhe sigurohuni që të bëni udhëtimin prej pesë orësh mes Valbonës dhe Thethit përpara se të eksploroni Rivierën Shqiptare”, theksohet në artikullin e gazetës britanike.

Pas “Bjeshkëve të Namuna”, renditen Mynih, Gjermani, Chefchaouen, Marok, Siçili , Itali, Buenos Aires, Argjentinë, Vis, Kroaci, Lake District, Britani e Madhe, Bora Bora, French Polynesia, Santorini, Greqi, Beijing, Kinë.

Alpet shqiptare dhe Bjeshkët e Namuna janë vazhdimësi e maleve dinarite dhe shtrihen në veri të Shqipërisë, në perëndim të Kosovës dhe në jug-lindje të Malit të Zi. Bjeshkët e Namuna shtrihen deri te lugina e Ibrit, rreth 50 km në gjatësi. Në anën e Kosovës arrijnë lartësinë mbi 2000 m, në disa vende prehen në lugina të thella  dhe kanë si kufi jugor Drinin. Alpet shqiptare janë mbresëlënëse dhe me forma piktoreske. Ato janë një shtrirje e peizazhit malor, i cili përplaset në disa zinxhirë luginash gëlqerore të Alpeve. /atsh

Evening Standard: Bjeshkët e Namuna, në krye të 10 destinacioneve për 2018 Read More »

40 të moshuar në Qendrën e Poliçanit përfitojnë nga vizita dhe syze falas

Shendetesi / /

Të moshuarit e Qendrës Polivalente në Poliçan përfituan vizita të specializuara dhe syze falas, të përshtatura sipas nevojës, në kuadër të programit të Ministrisë së Shëndetësisë dhe Mbrojtjes Sociale për ofrimin e shërbimit të plotë okulistik pa pagesë në Shtëpitë e të Moshuarve në të gjithë vendin.

Rreth 40 të moshuar në Qendrën e Poliçanit përfituan këtë shërbim, mes tyre edhe çifti i të moshuarve nga Korça, i cili pak kohë më parë u braktis nga fëmijët. Me Qendrën Polivalente të Poliçanit, përmbyllet faza e parë e programit të Ministrisë së Shëndetësisë dhe Mbrojtjes Sociale për të garantuar në çdo Shtëpi të të Moshuarve shërbimin okulistik dhe syzet falas.

Në fillim të muajit Korrik, kjo nismë e Ministres Manastirliu filloi në Shtëpinë e të Moshuarve në Tiranë, ku 50 të moshuar kryen vizitat e specializuara dhe u pajisën me syze falas, sipas nevojës.

Më pas, nisma vijoi në të gjithë institucionet rezidenciale për të moshuarit, në Kavajë, Fier, Gjirokastër, Shkodër, për t’u përmbyllur në Poliçan. 251 të moshuar që banojnë në këto institucione përfituan pa pagesë këtë shërbim kaq të nevojshëm për moshën e tretë. /atsh

40 të moshuar në Qendrën e Poliçanit përfitojnë nga vizita dhe syze falas Read More »

Në 7 muaj, mbi 3 milionë turistë zgjodhën Shqipërinë

Aktualitet, Turizem / /

”3 milionë e 137 mijë vizitorë të huaj e kanë vizituar Shqipërinë gjatë periudhës janar -korrik 2018”, deklaroi sot ministri i Turizmit dhe Mjedisit, Blendi Klosi.

Gjatë një konference të përbashkët për shtyp, me përfaqësues të institucioneve të përfshira direkt në mbarëvajtjen e sezonit turistik,  zhvilluar në ambientet e Kryeministrisë në COD, Klosi tha se ,”muaj gusht pritet të jetë më i frekuentuar pasi pushuesit shtohen më shumë në zonat turistike. Edhe pse moti nuk ishte favorizues dy muaj më parë, statistikat tregojnë se nga janari në qershor, kemi një rritje të numrit të pushuesve me 12.5 % më shumë se një vit më parë. Të dhëna këto zyrtare nga sistemi TIMS i policisë së shtetit”.

”Në korrik të viti 2017 kanë hyrë në territorin tonë 860 mijë pushues ,ndërsa në korrik të vitit 2018 kanë hyrë 1 milionë shtetas rreth 19% më shumë krahasuar me një vit më parë. Hyrjet në aeroport në periudhën qershor- korrik 2017,147 mijë shtetas të huaj po në të njëjtën periudhë të 2018 -ës 192 mijë shtetas të huaj. Pra rritja me një vit më parë është mbi 30%”,u shpreh Klosi.

Ai shtoi se ,”rritja e hyrjes së shtetasve të huaj në periudhën qershor – korrik 2017 krahasuar me po të njëjtën periudhë të viti 2016 ka qenë vetëm 3%, ndërsa në periudhën qershor -korrik 2018 kemi një rritje me 17 % me një vit më parë”. /atsh

https://www.facebook.com/edirama.al/videos/10156004637236523/?t=0

Në 7 muaj, mbi 3 milionë turistë zgjodhën Shqipërinë Read More »

Të huajt të apasionuar për të ‘fluturuar’ në Llogara/Foto

Aktualitet, Turizem / /

Të rinjtë e huaj që vizitojnë Shqipërinë gjatë stinës së verës, por edhe shqiptarë gjithnjë e më shumë po tërhiqen nga sporti i fluturimeve të lira.

Aeronautika Shqiptare po vazhdon me promovimin e turizmit nëpërmjet fluturimeve të lira të kthyera tashmë në një sport të preferuar nga Pista Olimpike e fluturimeve në Llogora, e cilësuar dhe certifikuar si nga më të bukurat dhe më të veçantat në botë.

“Mediterranean Heart”, përherë një ndalese e “detyruar” në Himarën turistike, një investim i qeverisë shqiptare i dha imazhin e dëshiruar nga të gjithë, pikës ndoshta më të lartë dhe më të bukur në Mesdhe në shumë këndvështrime.

Llogaraja, për pozicionin unik që ka, si dhe për erën e favorshme ndihmon shumë në ushtrimin e këtij sporti, të përhapur shumë vitet e fundit.

Sipas të pasionuarve pas këtij sporti, fluturimi sportiv po bëhet gjithnjë e më tepër pjesë e promovimit, por edhe një resurs në rritje për turizmin.

Llogaraja, me vetëm 500 metër diferencë, është pika e dytë në botë mbi nivelin e detit e përshtatshme për fluturimin me velë.

Vlora ngërthen natyrshëm gërshetimin e sporteve të ujit me ato të ajrit, turizmin malor, arkeologjinë dhe plazhin. Ka të gjitha mundësitë të krijojë të ardhura të jashtëzakonshme nga turizmi i aventurës.

Pista Olimpike e fluturimeve “Mediterranean Heart” është tashmë një atraksion turistik i qytetit jugor, të Himarës.  /atsh

Të huajt të apasionuar për të ‘fluturuar’ në Llogara/Foto Read More »