Aurora

Sektori i ndërtimit në vendin tonë është në trajektore zhvillimi progresiv dhe kërkesës në rritje të tij, po i përgjigjet më së mirë edhe miratimi i lejeve të reja, për ndërtim nga institucionet përkatëse.

INSTAT bën të ditur se, numri i lejeve të ndërtimit në shkallë vendi u rrit gjatë 9- mujorit të këtij viti, krahasuar me të njëjtën periudhe të një viti më parë, ndërsa qarqet e Dibrës, Tiranës, Gjirokastrës dhe Beratit rritja është me ritme dyshifrore.

Sipas të dhënave të INSTAT në të gjithë vendin u dhanë 834 leje gjatë janar-shtator, nga 831 të tilla që u dhanë më 2017.

Numri i lejeve në qarkun e Dibrës u rrit me 190%, nga 10 që ishin dhënë më 2017 në nëntëmujorin e 2018 u dhanë 19 të tilla.

Pas Dibrës rritja më e madhe ishte në qarkun e Gjirokastrës ku u vu re një dyfishim i lejeve në raport me 2017. Në Berat numri i lejeve pësoi rritje vjetore me 60% në 9-mujorin 2018.

Në Tiranë numri i lejeve të ndërtimit u rrit me 38%, pasi janë dhënë 74 lejë ndërtimi më shumë se 9-mujorin e 2017.  Tirana iu rendit e para në shkallë vendi për numrin më të lartë të lejeve të dhënave më 2018./atsh

Afrimi i festave të Nëntorit, ka sjellë në tregun e këmbimit valutor vendas, zhvlerësim të ndjeshëm të monedhës së përbashkët euro, kundrejt lekut duke shënuar kështu pothuajse nivelin më të ulët të këmbimit në dekadën e fundit.

Sipas kursit zyrtar të këmbimit të Bankës së Shqipërisë një euro është këmbyer me 124.3 lekë, apo rreth 0,16 lekë më pak se një ditë më parë. Ndërsa dollari amerikan është forcuar me 0,37 lekë duke u këmbyer në nivelin e 109.85 lekëve.

Sipas aktorëve të tregut, zhvlerësimi i adresohet pesë ditëve të ardhshme të pushimit, ku dhe shumë biznese nxitojnë të mbyllin pagesat në sistemin bankar, ndërsa është rritur dhe kërkesa për valutë në treg./atsh

Kryeministri i Shqipërisë, Edi Rama tha se është absurditet që Kosovës të mos i hiqet regjimi i vizave, sikurse moshapja e kapitujve për anëtarësim të Shqipërisë në Bashkimin Europian.

I ftuar në emisionin “Zona B” në Klan Kosova, Rama u shpreh se të dyja këto çështje lidhen me situatën e brendshme të disa shteteve të BE-së.

“Është një çështje e një psikoze të krijuar në BE. Në këtë aspekt duhet të jemi të afërt me veten dhe njëri-tjetrin. Duhet të intensifikojmë të gjitha proceset për të bashkuar forcat, ekonomitë, idetë, energjitë dhe për ta kthyer kufirin në një kufi fluid, dhe nga ana tjetër duhet të kemi një qasje shumë më të strukturuar në raport me Serbinë”, tha Rama në Zona B.

“Kjo është gjëja që duhet të bëjmë ne. Të strukturuar, flas për Kosovën në këtë kuptim dhe ne jemi në mbështetje të Kosovës në këtë rast”.

Rama ka deklaruar se nuk e thotë që kufiri mes Kosovës dhe Serbisë të hiqet tërësisht.

“Do të kemi një kufi më fluid, do të ketë vetëm një ndalesë. Kjo që po bëjmë ne është ta kuptojnë edhe serbët, se nuk e bëjmë veç me njëri-tjetrin dhe s’bëjmë dyfytyrësi. U kemi kërkuar të gjithëve heqjen e barrierave. Me Kosovën do t’i heqim të gjitha. Porti i Durrësit do të jetë edhe i Kosovës. Pastaj do të bëjmë hapat drejt bashkimit doganor”, deklaroi shefi i qeverisë shqiptare. /atsh

Komuna e Prishtinës në bashkëpunim me Bashkimin e Dhomave të Tregtisë dhe Industrisë së Shqipërisë, organizon për nder të ditës së flamurit, panairin tradicional “Blej Shqip” 2018.

Ky panair tashmë tradicional mbahet në qendër të qytetit dhe vizitohet nga dhjetëra mijëra qytetarë shqiptarë e të huaj dhe ka për synim promovimin e produkteve nga të gjitha trevat shqiptare.

Panairi do të mbahet më 27, 28 dhe 29 nëntor, në Bulevardin “Nënë Tereza” dhe Sheshin “Zahir Pajaziti”, nga ora 10:00 deri në ora 24:00. /KosovaPress