Aurora

10 arsye se përse duhet të vizitoni Shqipërinë…që këtë verë!

Leave a Comment / Aktualitet, Lajmi i fundit, Turizem / /

Blogu i udhëtimeve “The Balkanista” shkruan një letër të hapur për të gjithë fansat, ku shpjegon 10 arsye përse duhet të vizitojnë Shqipërinë këtë verë.

Shkrimtare, udhëtare, një blogere udhëtimesh angleze, autorja  jeton prej vitesh në Tiranë.

Pasi kishte vizituar bregdetin e Shqipërisë për pushime, ajo nuk u largua më.
Në një letër të hapur për të gjithë fansat e saj, ajo shpjegon përse duhet vajtur me pushime në Shqipëri, pikërisht këtë verë.

“Shqipëria nuk është në krye të listës së destinacioneve për pushime. Kur erdha këtu për herë të parë, edhe unë u ndjeva në faj sepse kisha lënë destinacione të tjera. Por, tani mund t’ju them se duhet patjetër të merrni në konsideratë këtë vend për pushimet verore të radhës”, shkruan blogerja.

Më poshtë vijojnë 10 arsye përse duhet të vizitohet Shqipëria:

  1. Ndryshe nga destinacionet e zakonshme
    Pas disa vitesh, Shqipëria, ashtu sikurse ka ndodhur për destinacione të tjera të Mesdheut, pritet të mbushet nga hordhi me të rinj të dehur, në kërkim të argëtimit me kosto të ulët. Por, për momentin, turistët janë ende pak, nuk ekzistojnë radhët për të vizituar pikat turistike dhe nuk duhet të shtyhesh për të zënë një cep plazhi, ku të shtrosh peshqirin. Madje as në kulmin e verës.

  2. Ka shumë për të mësuar
    Shqipëria ka disa prej vendeve historike dhe zonave të UNESCO-s të paimagjinueshme. Ka nga të gjitha, rrënoja romake, kështjella mesjetare, bunkerë sovjetikë dhe mbetje osmane. Vetëm qyteti antik i Butrintit, në jug të vendit, do të mjaftonte për të ndërmarrë këtë udhëtim, ashtu si Berati dhe Shkodra, në kufij me Greqinë dhe shumë vende të tjera edhe më të bukura.

  3. Plazhet më të bukur të Europës
    “Të dashura Itali, Kroaci dhe Greqi! Më vjen keq t’ua them, por Riviera e Shqipërisë e tejkalon çdo breg tuajin”, shkruan blogerja duke këshilluar që të vizitohen patjetër Ksamili, Saranda, Himara dhe Dhërmiu për të admiruar ujërat e tyre të kristalta, plazhet e bardha dhe panorama malore që i rrethon. Bregdeti shqiptar është i egër dhe i mrekullueshëm dhe nuk ka asgjë të ngjashme në gjithë Europën, sipas asaj.

  4. Liqene dhe ujëvara
    Brendësia e Shqipërisë është plot liqene dhe ujëvara shumë të bukura. Liqeni i Komanit, Liqeni i Shkodrës, Liqeni i Butrintit dhe Liqeni i Ohrit vlejnë të vizitohen për shkak të ujërave të tyre të kristalta dhe të peizazhit fantastik që i rrethon. Disa burime si Syri i Kaltër dhe ato pranë fshatit Theth janë perfekte për të notuar dhe për të adhuruar ujëvarat.

5.Klime perfekte
Shqipëria gëzon një klimë tipike mesdhetare, me verë të gjatë dhe të ngrohtë dhe stinët e tjera janë gjithnjë të këndshme. Gjatë vitit nuk bie asnjëherë nën 20 gradë Celcius, ndërsa nga maji temperaturat rriten në rreth 22 gradë Celcius duke arritur kulmin me 35 gradë Celcius në korrik dhe gusht. Përveç verës, çdo çast është perfekt për të udhëtuar në Shqipëri.

  1. Njerëz miqësorë
    Shqiptarët, kundër paragjykimeve, janë njerëz të përzemërt, miqësorë dhe kureshtarë. Blogerja tregon se nuk ishte ndjerë kurrë e rrezikuar. Duhet vetëm të përgatitesh pasi do të pyetesh qindra herë për arsyen se përse zgjodhe të shkosh në Shqipëri.

  2. Ushqim i shkëlqyer
    Përgjatë bregdetit peshku është i shkëlqyer dhe kushton shumë pak. Kuzhina ka patur një ndikim të madh nga ajo italiane. Sa më shumë që futesh në thellësi të vendit, aq më shumë gjen ushqime me bazë mishin, gjithmonë shumë i freskët. Këtu, ushqimet e ngrira nuk merren pothuajse kurrë në konsideratë. Duhet të provosh disa ushqime lokale si tavë kosi me mish qingji, oriz, vezë dhe kos, patëllxhanë të mbushur me salsiçet lokale.

  3. Gjuha është shumë e bukur
    Shqipja është një nga gjuhët më të vjetra dhe plotësisht ndryshe nga gjuhët e tjera europiane. Ajo nuk është e thjeshtë. Sidoqoftë, nëse bën pushime në Shqipëri duhet të dish disa fjalë, aq më tepër kur mendon se shqiptarëve u pëlqen kur të huajt përpiqen të flasin shqip me ta.

  4. Një vend mysliman tolerant
    Shqipëria është një vend mysliman, megjithatë nuk ia vlen të marrësh masa si në disa vende të Lindjes së Mesme apo të Afrikës Veriore. Disa gra mund ta kenë fytyrën të mbuluar, por nuk të duhet asnjë kod veshjeje për të ecur rrugëve. Vetëm nëse vizitohet një xhami. Edhe pijet alkoolike janë në masë ashtu si mishi i derrit.

  5. Pikënisje për udhëtime të tjera
    Shqipëria është një bazë e mirë për këdo që dëshiron të vizitojë vende të tjera pranë saj, vende që janë një apo dy orë larg. Nga qyteti i Pogradecit mund të kalosh në Maqedoni, nga Shkodra kalon për në Malin e Z i dhe Kroaci, nga jugu futesh në Greqi dhe Korfuz, ndërkohë që nga kufiri verilindor shkon në Kosovë dhe Serbi. Italia është vetëm një orë fluturim nga Milano, Bolonja, Venecia, Roma dhe Piza, apo dy orë me traget që niset nga Ankona, Brindizi dhe Bari (që këtej vetëm në verë) dhe mbërrin në Durrës./express/

10 arsye se përse duhet të vizitoni Shqipërinë…që këtë verë! Read More »

Farat e kastravecit, vlerat e jashtëzakonshme për shëndetin

Leave a Comment / Shendetesi / /

Gjithçka që na servir nëna natyrë është e pasur në vlera dhe e dobishme për shëndetin e njeriut. Dhuratat më bujare janë padyshim frutat, perimet, erëzat, barishtet por edhe farat.
Kastraveci është një nga perimet më të shëndetshme që njeriu mund të konsumojë rregullisht. Vlerat e kastravecit janë të njohura, por farat e imëta e të lëngshme që gjenden në brendësi të tij janë tepër të shëndetshme. Në këtë artikull do të zbuloni arsyet përse duhet të konsumoni më shumë prej këtyre farave të lëngshme.

Përfitimet për lëkurën

Kastraveci dhe farat e tij janë idealë për të trajtuar problemet me lëkurën si djegia nga dielli, rrudhat e të tjerë. Sipas të dhënave përdorimi i farave i jep lëkurës shkëlqim rinor ndërkohë që antioksidantët që gjenden tek i gjithë kastraveci e gjallërojnë atë në mënyrë natyrale.

Përfitimet për flokët

Nëse keni probleme me flokët, nëse ato bien apo janë të dobësuar, atëherë zgjidhjen e gjeni tek farat e kastravecit. Ato përmbajnë sulfur që stimulon rritjen e flokëve, i bën ato më të dendur dhe më të shëndetshëm. Konsumi i rregullt i lëngut të kastravecit bashkë me farë ndihmon në parandalimin e rënies së flokëve.

Shqetësimet me tretjen

Konsumi i rregullt i farave të kastravecit rekomandohet për të përmirësuar shëndetin e sistemit tretës. Farat e kastravecit parandalojnë një sërë problemesh me tretjen siç janë aciditeti i lartë, gastriti e të tjerë. Uji dhe mineralet që gjenden tek kastraveci ndihmojnë në funksionin e plotë të organeve të tretjes dhe në largimin e toksinave.

Mbipesha

Nëse dëshironi të humbisni peshën e tepërt, atëherë konsumoni më shumë kastravec me gjithë farë. Në këtë mënyrë do të merrni më pak kalori dhe më shumë minerale të nevojshme për rënien në peshë.

Shëndeti i dhëmbëve

Konsumi i rregullt i farave të kastravecit përmirëson shëndetin e mishrave dhe dhëmbëve. Ngrënia e kastravecit largon bakteret e këqija që mblidhen në gojë e shkaktojnë erën e keqe të gojës dhe prishjen e dhëmbëve.

Shëndeti mendor

Farat e kastravecit përmbajnë bakër, një mineral që stimulon ndërveprimin e nervave dhe shëndetin mendor. Sipas të dhënave truri ushqehet me mineralet më të dobishme dhe organizmi është më pak i prekur nga stresi.

Inflamacioni

Farat e kastravecit luftojnë inflamacionin në organizëm që shkaktojnë sëmundje të ndryshme. Ato rekomandohen kundër dhimbjeve të kokës, rrathëve të zinj të syve, njollave në lëkurë e të tjerë.

Farat e kastravecit, vlerat e jashtëzakonshme për shëndetin Read More »

Biznesi i vogël i lë 10 ditë kohë Qeverisë: Kontrollorët e tatimeve s’po na lënë të punojmë

Leave a Comment / Aktualitet / /

Biznesi i vogël ka pasur sot një deklaratë për mediat, ku i ka kërkuar qeverisë që të heqë dorë nga vendosja e TVSH-së për biznesin e vogël.  Ata i kanë lënë qeverisë 10 ditë kohë që të reagojë dhe më pas, në rast se qeveria nuk tërhiqet, protestat do të përshkallëzohen.

Kreu i shoqatës së biznesit të vogël Albert Nasto u shpreh se kjo protestë nuk është vetëm për vendosjen e TVSH-së, por për klimën e biznesit në përgjigjthësi dhe për nivelin mjaft të lartë të korrupsionit në vendin tonë.

Albert Nasto: A e kuptoni ku po shkojnë lekët, 1 metër kub në Tiranë është njësosj sikur të jetonim në Paris. Në Gjermani biznesi kontrollohet njëherë në gjashtë vjet, nuk vjen njeri tre herë në muaj, nuk po na lënë që të punojmë. Nuk e  kemi kauzën vetëm te TVSH-ja, po te korrupsioni, te klima për të bërë biznes. E gjitha kjo bëhet për të shmangur gjobat dhe penalitetet. Do ti lëmë qeverisë 10-15 ditë kohë.

Biznesi i vogël i lë 10 ditë kohë Qeverisë: Kontrollorët e tatimeve s’po na lënë të punojmë Read More »

Gjendet tjetër makinë e djegur dhe me armë brenda, dyshimet e para

Leave a Comment / Aktualitet, Lajmi i fundit / /

Një tjetër makinë që i është vënë zjarri është gjetur sot nga Policia në Fier.

Brenda saj është gjetur një kallashnikov, një silenciator dhe një karikator, që kanë përforcuar dyshimet e Policisë se mjeti ka shërbyer për kryerjen e një vrasjeje.

Mjeti u gjet pranë stacionit të trenit në Fier. Bëhet fjalët për një Renaut me targa greke Ynk 1329.

Para djegies së qëllimshme, në zonë ka pasur të shtëna dhe mendohet se autorët janë larguar në drejtim të Semanit.

Kjo është e dyta makinë e gjetur e djegur sot që lidhet me këto dyshime.

E para u gjet më herët në Gramëz të Krujës dhe një nga pistat e hetimit ishte lidhja me vrasjen e Mario Majollarit, 28-vjeçarit nga Tirana.

Gjendet tjetër makinë e djegur dhe me armë brenda, dyshimet e para Read More »

Atentatet e bujshme, tetë raste kur “vrasësit” dogjën makinat për të humbur gjurmët

Leave a Comment / Aktualitet / /

Të shumta në numër atentatet me armë zjarri. Ai i ndodhuri mbrëmë në Kinostudio ku u ekzekutua me tre plumba Marjo Majollari, djali i Avni Majollarit i dënuar me burgim të përjetshëm për një vrasje të dyfishtë, ka të përbashkët me shumë raste të tjera mënyrën se si autorët zgjedhin të zhdukin gjurmët.

Për të arritur tek viktimat e tyre killerat përdorin mjete të vjedhura, të cilat i djegin pasi kryejnë krimet. Edhe pas atentatit të mbrëmshëm kështu ndodhi. Një ditë pas krimit, policia gjen mjetin e djegur. Skema është e qartë, vrasësit dinë si të arrinë tek viktimat e tyre.

“BalkanWeb” sjell në vëmendjen e publikut disa raste të ngjajshme kur pas atentateve, policia gjen automjetet të djegura dhe të braktisura, ndërsa në të shumtën e tyre autorët nuk janë identifikuar kurrë.

11 PRILL 2018
Një makinë u gjet e djegur ditën e sotme në fshatin Gramëz në Fushë-Krujë. Dyshohet se automjeti mund të jetë përdorur për vrasjen e 28-vjeçarit Mario Majollari, i ekzekutuar mbrëmë në Tiranë. Policia po kryen veprimet hetimore por nga informacionet e para mësohet se makina është djegur tërësisht.

10 PRILL 2017
Një atentat me armë zjarri u shënua në qytetin e Vlorës, ku u ekzekutua me 15 plumba Elidon Mehmeti rreth 35 vjeç. Ndërkohë që mëngjesin e 10 prillit është gjetur te “Ura e Mifolit”, në aksion nacional Fier¬-Vlorë. Mjeti dyshohet se i përket autorëve të atentatit të mbrëmshëm.

12 MAJ 2017
Gjendet i djegur në Kakome mjeti që dyshohet të jetë përdorur nga autorët e atentatit ndaj Rudin Haxhiajt, pronar i një diskoje në Sarandë, i cili i shpëtoi dy ditë më parë 10 Maj 2017 atentatit të tetë.

01 TETOR 2017
Makina që dyshohet se u përdor në atentatin e Vlorës ndaj Ferdinand Llanajt dhe Dritan Begës u gjet e djegur në rrugën e fshatit Kafaraj në Fier. Sipas burimeve të policisë, në automjet është gjetur edhe kallashnikovi i përdorur në atentat. Policia thotë se mjeti u gjet poshtë një nënkalimi.

11 TETOR 2017
Një atentat i rëndë ishte edhe ai i ndodhur në qendër të qytetit të Lushnjës më 10 tetor 2017. Ndërsa një ditë më pas më 11 tetor u gjet një makinë e djegur në aksin rrugor Lushnjë –Berat, në afërsi të vendit të quajtur “Çukas”. Në atentat u vranë dy persona, Zamir Latifi dhe Jurgen Hoxha miq të Aldo Bares. Po ashtu i plagosur ka mbetur edhe Xhuljo Shkurti nipi i kapos të bandës së Lushnjës Aldo Bare.

23 DHJETOR 2017
Një atentat me armë ka ndodhur mëngjesin ë 23 dhjetorit në lagjen “Emin Matraxhiu” në Elbasan. Autorët kanë qëlluar me armë nga makina e tyre tip “Benz” në drejtim të disa personave të tjerë që mësohet të jenë të fisit Çapja, e më pas kanë djegur makinat për të fshirë gjurmët. Sipas policisë autorët janë larguar në drejtim të lagjes “5 Maji” me një makinë tjetër, ndërsa nuk raportohet për të lënduar.

20 SHTATOR 2016
Mesditën e 20 shtatorit (ora 13:50), në aksin rrugor Fier – Seman, vritet Nelgert Pata. Person me precedent penal, ndërsa plagoset një tjëtër Pata u qëllua teksa udhëtonte në mjetin tip “Volksëagen” me targa AA 166 IY.Pak më vonë në fshatin Zhupan, Fier, në vëndin e quajtur “Mbikalimi” është gjetur duke u djegur mjeti tip “Benz” me portobagazh dhe brenda në mjet janë gjendur dy armë zjarri, që dyshohet të jetë e autorëve.

10 SHTATOR 2016
Një ditë pas vrasjes me armë zjarri të zyrtarit të OSHEE në Rrëshen, policia ka gjetur të djegur makinën (10/09/2016) e cila dyshohet të jetë përdoruar për t’u larguar nga autorët e vrasjes. Mjeti është gjetur në Vinjoll të Kurbinit, ndërsa autorët dyshohet se e kanë braktisur atë pasi janë ndjekur nga policia.
makine e djegur ok

makine e djegur 2

Atentatet e bujshme, tetë raste kur “vrasësit” dogjën makinat për të humbur gjurmët Read More »

Tirana në vitet e Luftës, fotot e rralla në qershor 1944

Leave a Comment / Histori / /

Studiues të shumtë shqiptarë dhe të huaj, duke hedhur dritë mbi veprimtarinë e trupit diplomatik të Gjermanisë në Shqipërinë e Paraluftës dhe gjatë saj (1932-1944), kanë arritur të zbulojnë edhe imazhin e selisë së Legatës, apo Konsullatës gjermane, pasi ajo e ndërroi shpesh emërtimin, madje edhe vendndodhjen e saj në Tiranë.

Shkruan Armand Plaka

Studiues të shumtë shqiptarë dhe të huaj, duke hedhur dritë mbi veprimtarinë e trupit diplomatik të Gjermanisë në Shqipërinë e Paraluftës dhe gjatë saj (1932-1944), kanë arritur të zbulojnë edhe imazhin e selisë së Legatës, apo Konsullatës gjermane, pasi ajo e ndërroi shpesh emërtimin, madje edhe vendndodhjen e saj në Tiranë.

Sidoqoftë, gjërat tashmë janë qartësuar plotësisht dhe dihet se ajo që sot njohim si “Vila e Mehdi Frashërit”, në një nga rrugët mes RTSH-së dhe Ambasadës së SHBA, ka shërbyer në funksion të plotë gjatë viteve të Luftës së Dytë, deri më 17 tetor 1944, si seli diplomatike e Rajhut të Tretë në Shqipëri.

Në dekadat që pasuan pas Luftës, për shumë vite ajo shërbeu si seli e Ambasadës së ish-RDGJ-së. Sidoqoftë, në fotot e sjella në këto materiale, haset vetëm pamja e mjegullt e asaj vile në bardhezi, apo e pamjes që ajo ka sot ( me ngjyra), duke vlerësuar se pas rikonstruksionit që i është bërë asaj pas rënies së monizmit, ka arritur fatmirësisht të ruajë tërësisht formën dhe strukturën.

Megjithatë, aty nuk arrihet të përftohet dot ideja nëse është marrë në vitet 1943-’44, kur Shqipëria ishte e pushtuar prej gjermanëve, apo i takon viteve të mëparshme, të Zogut apo të pushtimit italian. Pra, më së shumti ka qenë një foto ilustruese pa datë të saktë, e as pajisur me ndonjë shenjë e tabelë të veçantë, të cilat do t’a bënin atë të cilësohej si “autentike”.

Nisur nga kjo, fotoja që po botoj në këtë artikull shoqërues, është e para që mbart në hyrje të saj tabelën “Deutsche Gesandschaft”, çka në shqip do të thotë: Legata, apo “Misioni Diplomatik Gjerman”, dhe është realizuar përkrah një seti shumë interesant fotosh të tjera të Tiranës, nga fotografi gjerman, Georg Fruhstorfer në qershor të vitit 1944, pikërisht në kulmin e prezencës gjermane në Shqipëri.

Tirana në vitet e Luftës, fotot e rralla në qershor 1944 Read More »

Rrëfehet biznesmeni më i pasur shqiptar/ Saimir Mane: Si e nisa biznesin, në ’92 duke shitur televizorë

Leave a Comment / Aktualitet / /

“Nuk e kam menduar kurrë që do të isha biznesmen kaq i fuqishëm të them të drejtën.”- kështu e nisi bashkëbisedimin me studentë e pedagogë në Universitetin Europian të Tiranës Samir Mane, sot një nga biznesmenët më të fuqishëm dhe një nga njerëzit më të pasur në vend.

Ai rrëfeu për të pranishmit se e ka nisur biznesin në fillim të viteve ’90, duke shitur radio-recorder dhe televizorë.

“Por mënyra si e kam filluar ka qenë edhe më interesante. Te Banka e Shqipërisë, aty pranë, ka qenë dikur tregu i Dollarit; ka pasur me qindra njerëz që shisnin dhe blinin. Për arsye se kisha vizë austriake, disa shokë me propozuan të merrnin dhrahmi greke e t’i thyenim në dollarë amerikanë dhe kështu bëmë.” –ka vijuar Mane, bizneset e të cilit janë të shtrirë në disa sektorë në treg. “Këtë punë e bëra për disa muaj.

Dhe nga një student në Austri me pothuajse pa asnjë të ardhur, ditën e parë u ballafaqova me 5 mijë dollarë fitim, që ishte një gjë që më tronditi dhe mua. Shkoja tri herë në javë, çoja dhrahmi i ktheja në dollarë dhe kështu e nisa.” – duke shtuar se shpesh është rastësia ajo që të sjell në biznes.

Mane është nga ata biznesmenë që e ka nisur pa asgjë. “Skam pasur asgjë të trashëguar. Prindërit e mi ishin të dy punëtorë. Unë jam një nga ata që quhen “self-made milioner”.”

Mane rrëfen se në fillim të viteve ’90 tregu ishte shumë i varfër dhe madje ai zbuloi se në vitin 1992 e nisi duke shitur 5 televizorë biznesin e tij, që një vit më vonë, në ’93 shkoi në 120 të tillë, në ’94 kaloi edhe sektorin e veshjeve, e më vonë me qendra tregtare e supermarkete, ndërsa më vonë e shtriu veprimtarinë në shtetet fqinjë e duke vajtur deri në Ukrainë e Rusi, në tregje të mëdha. “Padyshim që rastësia më bëri të jem këtu ku jam”- tha Mane.

Rrëfehet biznesmeni më i pasur shqiptar/ Saimir Mane: Si e nisa biznesin, në ’92 duke shitur televizorë Read More »

Basha shpreson në largimin Donald Lu nga Tirana, e quan pengesë për ardhjen në pushtet; portali i tij shkruan: “Bye bye, Donald Lu”. PD “emëron” Jonatan Moore

Leave a Comment / Aktualitet, Politike / /

Lulzim Basha dhe opozita me sa duket të keqen më të madhe se nuk po njohin progres drejt pushtetit cilësojnë ambasadorin amerikan në Tiranë Donald Lu.

Jo pa qëllim të gjitha sulmet jo vetëm të eksponentëve të PD por dhe të atyre të LSI janë drejtuar në drejtim të Lu.

Ambasadori amerikan ka paralajmëruar më se njëherë se dëshirat e tij më të mëdha janë “peshqit e mëdhenj” të korrupsionit në burg dhe shtyrja e mandatit dhe një vit në Shqipëri.

Madje nuk përjashtoi dhe mundësinë që të qëndronte përgjithnjë në vendin tonë, pasi është një vend që i pëlqen shumë.

Një deklaratë e tillë ka tërbuar demokratët dhe përfaqësuesit e LSI, që nuk lënë rast pa e sulmuar.

E sulmojnë për reformën në drejtësi, për mungesën sipas opozitës të goditjes ndaj kryeministrit Rama, për LGBTI dhe për çfarë u vjen në shteg.

Ndërkohë që rifillojnë sërish llogaritë aerithmetike se sa orë, ditë, javë e muaj i kanë mbetur në Shqipëri Donald Lu.

Ndonëse ambasadorit amerikan i skadon afati trevjeçar i qëndrimit në Shqipëri, opozita është e shqetësuar qoftë dhe për një ditë më tepër qëndrimi në Tiranë të Donald Lu.

Këtë shqetësim opozita e shpreh jo vetëm për mesa deklaratave për mediat të liderëve politikë por dhe përmes portaleve afër saj.

Në fillim ishte portali i Zenit që lajmëroi përfundimin e afatit të mandatit të Lu në Tiranë. Tani është portali i Bashës që shkon më tej, duke deklaruar se DASH e ka përcaktuar pasuesin e Donald Lu. PD zbardh dhe dëshirën për të qënë një mik i PD sipas saj.

Kështu burime diplomatike për “Politiko.al”, portal afër Bashës ky, konfirmojnë se Departamenti Amerikan i Shtetit ka përzgjedhur diplomatin që do të shërbejë si ambasador në Tiranë.

Sipas portalit ambasadori i ri do të jetë diplomat karriere dhe emri pritet të bëhet publik së shpejti. Ambasadorit aktual Donald Lu i përfundon mandati këtë verë, ndërkohë që emri i zëvendësuesit të tij pritet të konfirmohet sapo Mike Pompeo të zyrtarizohet si Sekretar i Shtetit, duke zënë vendin e Rex Tillerson sqaron portali i Bashës.

Sipas tij, me ardhjen e Pompeos në krye të DASH priten ndryshime edhe në poste të tjera të rëndësishme që lidhen me Shqipërinë, siç është ai i nënsekretarit të dytë të Shtetit për EuroAzinë.

Portali i Bashës raporton dhe njëherë se një prej emrave të përfolur për këtë post është ai i Jonathan Moore, ish shefi i zyrës së Euroazisë për Ballkanin, dhe së fundmi shefi i Misionit të OSBE në Sarajevë. Një dëshirë e kahershme e PD, e bindur se ndryshimi i ambasadorëve do t’i vijë për mbarë dhe do ta ndihmojë për të ardhur në pushtet. Siç mendoi se dhe me ardhjen e Trump, do të vinte Basha në pushtet. Madje përdori dhe financim rus vetëm e vetëm që të lobonte në SHBA për një foto me Trump. Dhe rezultati dihet tashmë: PD shënoi rezultatin më negativ që nga themelimi, Rama vjen i vetëm në pushtet.

Ndërsa vetë kreu i PD Lulzim Basha është nën hetim nga FBI në SHBA dhe prokuroria shqiptare për lobim me para ruse nga parajsat fiskale.Pamfleti.com

Basha shpreson në largimin Donald Lu nga Tirana, e quan pengesë për ardhjen në pushtet; portali i tij shkruan: “Bye bye, Donald Lu”. PD “emëron” Jonatan Moore Read More »