Andueli

Në 100-vjetorin e dytë të shpalljes Kryeqytet i Shqipërisë, Tirana i dha kryeministrit të Kosovës “Çelësin e qytetit”, si simbol i një dere të hapur për të gjithë vëllezërit tanë kosovarë. Kryetari i bashkisë së Tiranës, Erion Veliaj priti në takim kryeministrin e Kosovës, Avdullah Hoti, i cili zgjodhi kryeqytetin shqiptar për vizitën e tij të parë zyrtare.

“Dua t’i uroj mirëseardhjen kryeministrit Hoti dhe delegacionit nga Kosova. Është një kënaqësi e veçantë kur shoh se Kosova ecën përpara, që zhvillohet. Në këto kohë sfiduese për Kosovën, e di që ka një barrë të vështirë për të mbajtur dhe barra më e vështirë është për ta mbajtur popullin të bashkuar, për të mbajtur frymën pozitive, kokën lart dhe sytë përpara. Ndaj, dua që ky çelës të jetë simboli i një dere të hapur i Tiranës”, tha Veliaj.

Kryeministri i Kosovës, Avdullah Hoti, falenderoi kryebashkiakun Veliaj për këtë nderim dhe shprehu vlerësimet për punën e tij në mirëmenaxhimin e qytetit. “Jam vërtet i nderuar në 100 vjetorin e Tiranës edhe si dikush që ka punuar në pushtetin lokal ju kam zili për pasionin që keni për punën. Ju uroj çdo të mirë edhe sukses”, tha Hoti.

Veliaj dhe Hoti biseduan edhe për krijimin e lehtësirave për studentët në të dyja anët e kufirit. “Teksa futemi në 100-vjetorin e dytë të Tiranës kryeqytet, besoj se ajo do të jetë edhe më e hapur për biznes, për të rinjtë dhe ata që e shohin si shtëpinë e tyre të dytë. Jam i lumtur që folëm me kryeministrin për mundësitë e të rinjve dhe do të doja shumë që Karta e Studentëve të Shqipërisë të vlejë në Kosovë. Ne jemi shumë të gatshëm që kartat e studentëve kosovarë të vlejnë në Tiranë dhe të përfitojnë nga këto lehtësira”, nënvizoi Veliaj.

Ai vlerësoi edhe dakordësinë e arritur mes dy kryeministrave për të rritur bashkëpunimin në fushën e ekonomisë, e veçanërisht atë për Portin e Durrësit./atsh

Kryeministri i Kosovës, Avdullah Hoti, deklaroi sot në Tiranë se së bashku me qeverinë e Shqipërisë do të punojnë zbatimin e tre projekteve strategjike.

Në konferencën e përbashkët për shtyp me Kryeministrin Edi Rama, kreu i qeverisë së Kosovës Hoti theksoi se “dëshiroj të përmend tri projekte madhore të natyrës strategjike, e para porti i Durrësit ku unë personalisht kam punuar me ish ministrin e Financave të atherëshëm që të kemi një pikë të përbashkët doganore, por tani të kemi një pikë doganore ku mallrat të hyjnë në pikën doganore të Kosovës”.

“Në fushën e energjisë ne kemi sisteme komplimentare energjetike, por duhet të kujdesemi që ta zgjidhim këtë problem duke konsideruar edhe ndërtimin e hidrocentralit në territorin e Shqipërisë për të furnizuar me energji elektrike Kosovën”, – tha Hoti.

Më tej Kryeministri Hoti u shpreh se “një tjetër projekt i madh është lidhja e kryeqyteteve me hekurudhë. E kemi ideuar kohë më parë , tani duhet të punojmë konkretisht me studimin e fizibilitetit dhe besoj se në vjeshtë të këtij viti mund të gjejmë fondet konkrete për të filluar realizimin e këtij projekti”.

Kryeministri Hoti duke falënderuar Ramën për vizitën në Prishtinë tha se “besojmë se kemi maturimin e nevojshëm institucional për tu përballur me ato situata, por kujdesi juaj për të ardhur në Prishtinë pas atyre zhvillimeve është shumë me vlerë”.

“Është bërë një praktikë e bashkëpunimit tonë të mbledhjeve të përbashkët të dy qeverive. Tani besoj se duhet të kalojmë në terma shumë praktikë të bashkëpunimit tonë të përditshëm. Ju i thatë me detaje bashkëpunimet që duhet të rregullojmë më tutje, në mbledhjen e ardhshme”, – tha Hoti./atsh

“Suksesi në luftën ndaj krimit të organizuar arrihet vetëm përmes goditjes së aseteve ekonomike të krijuar prej tij”.

Kështu deklaroi sot gjatë fjalës së tij në Kuvend ministri i Brendshëm, Sandër Lleshaj i cili i ka kërkuar deputetëve të parlamentit të Shqipërisë të votojnë ndryshimet në ligjin e ashtu quajtur “Antimafia”, për të rritur edhe më tej efikasitetin e Policisë në luftën ndaj krimit të organizuar.

Në argumentat e tij për të mbrojtur këto ndryshime, Lleshaj u shpreh se, lufta ndaj krimit të organizuar do të ketë sukses në momentin kur të bindim çdo qytetarë se rruga e pasurimit përmes krimit nuk të çon gjëkundi.

” Lufta ndaj krimit të organizuar është një ndër prioritetet më të mëdha të qeverisë shqiptarë në përpjekje për të rritur standardet e nivelit të jetës së qytetarëve shqiptarë dhe gjithashtu në kuadër të përpjekjeve në rrugën drejt Bashkimit Europian”, – tha Lleshaj.

“Së fundmi jemi dëshmitarë të një serie aktesh ligjore, një pakete për luftën kundër krimit të organizuar dhe në këtë kuadër vijnë dhe këto ndryshimet në ligjin Antimafia. Përgjatë tre dekadave shumë të rinj shqiptarë i janë futur rrugës së krimit duke përfunduar në qeli brenda vendit, shumë janë nëpër burgjet e botës, ose i janë fshehur drejtësisë. Dhe që të marri fund kjo histori, nuk mjafton vetëm dënimi penal, pra futja në burg e autorëve. Ka shumë të rinjë, të paedukuar, që o futen rrugës së shkurtër të krimit, që i nxjerr shumë gjatë dhe nuk mjafton që politika penale të përqendrohet tek burgosja, por jetike është adresimi bizneseve që gjenerohen nga krimi”, – tha Lleshaj.

“Duhet të bindim çdo qytetar që është futur, apo joshet për rrugët kriminale, që s’do sa do sukses të ketë, sado para të grumbullojë, sado pasuri të grumbullojë, do të vijë një ditë që do t’i merren të gjitha, pasi krimi s’mund të jetë model suksesi i biznesit. Dita kur do mësohet kjo, do jemi në rrugën e suksesit për të parandaluar krimin e organizuar”, – tha Lleshaj.

“Për këtë arsye pr/ligji që flasim sot adreson këtë çështje, se si të fuqizojmë kapacitetet e administrimit të pasurive që konfiskohen. Agjencia e Administrimit të Pasurive të Sekuestruara dhe Konfiskuara të marrë kompetenca dhe atribute të reja, që japin efektivitet në administrimin e aseteve. Kemi patur një situatë, që gjykatat caktonin administrator për çdo rast konfiskimi, gjykata me këto ndryshime cakton një administrator, pra agjencinë. Ky është një ndryshim i madh e i rëndësishëm. Ndryshim tjetër, është që një pjesë e aseteve, do të shkojnë në favor të viktimave të krimit të organizuar, agjencive që luftojnë krimin e organizuar, për të rritur forcën goditëse të policisë ndaj krimit të organizuar”, – tha Lleshaj.

“Dua të them me kënaqësi që përpjekja e qeverisë ka shënuar suksese. OFL, që funksionon nga janari, po shënon rezultatet në rritje. Një numër i madh çështjes janë përcjellë tek SPAK dhe po ashtu një numër i madh janë referuar në gjykatë. 48 pasuri të ndryshme, automjete luksoze, resorte, qindra të tjerë në proces. E gjithë përpjekja është orientuar drejt parimit shkatërrim modelit të biznesit përmes krimit. Kjo është një rrugë me garanci për dështim”, – tha Lleshaj. /atsh

Kryeministri Edi Rama përkujtoi sot eksodin historik të shqiptarëve pas rënies së regjimit komunist.

Në videon e publikuar nga Kryeministri Rama shfaqen pamjet e shqiptarëve 30 vjet më parë duke hyrë në ambasadat e huaja dhe në anijet që u nisën drejt Barit, Itali.

“Mirëmëngjes, 30 vjet nga eksodi historik i shqiptarëve, një kohë për të kuptuar çmimin e lirisë dhe dëshirën e zjarrtë të shpirtit shqiptar që u përball me diktaturën dhe luftoi për lirinë”, – thekson Rama.

30 vjet më parë, 2 korrik 1990 mijëra vetë hyjnë në ambasadat e huaja në Tiranë, duke shënuar fillimin e ndryshimit politik në Shqipërinë komuniste. Ai që u quajt si eksodi i madh i shqiptarëve i dha goditjen e fundit regjimit komunist duke u hapur mijëra vetëve portën e lirisë./atsh

Mjekët dhe infermierët në shërbimin e Urgjencës nga veriu në jug të vendit janë në gatishmëri për përballimin e situatës së krijuar prej COVID-19.

Ministrja e Shëndetësisë dhe Mbrojtjes Sociale, Ogerta Manastirliu theksoi se personeli mjekësor bën një punë të palodhur për identifikimin dhe izolimin e çdo rasti të dyshuar me COVID-19, në mjedise të veçanta.

“Punë e palodhur e mjekëve dhe infermierëve në shërbimet e Urgjenës në spitale nga veriu në jug, për identifikimin dhe izolimin e çdo rasti të dyshuar me COVID-19 në mjedise të veçanta, në zbatim të protokolleve antiCOVID, duke garantuar që shërbimi të mos mungojë për nevojat e çdo pacienti. Respektoni rregullat, vendos maskën, ruaj shëndetin”, u shpreh Manastirliu. /atsh