Andueli

Vija bregdetare, jo më një aksesor i ekonomisë sociale, por një nga shtyllat e forta të zhvillimit të vendit

Aktualitet, Turizem / /

Masterplani i zonës së bregdetit do të bëjë që plazhi të mos ketë vetëm detin dhe rërën, por t’i hapë rrugë dhe zhvillimit të shumë aktiviteteve të tjera, duke e kthyer vijën tonë bregdetare të konkurueshme me simotrat e saj europiane.

Kështu theksoi sot ministri i Turizmit dhe Mjedisit, Blendi Klosi në dëgjesën publike me grupet e interesit të zhvilluar në Spille.

“Një pasuri e madhe që nuk mund të lihet të zhvillohet papasur plane të menaxhuara saktë të pa ndërtuara të cilat i afrohen standardit të menaxhimit të kohës. Ne nuk mund të pranojmë që vija bregdetare shqiptare të vazhdojë të shikohet si një aksesor i ekonomisë sociale, vija bregdetare shqiptare do të jetë një nga shtyllat e forta të zhvillimit të ekonomisë së vendit”, – tha Klosi.

Tashmë, vijoi Klosi, në diskutimin qeveritar e më pas në parlament do të kemi Ligjin e ri për kontrollin e vijës bregdetare, ligji i ri i cili nuk do të duhet të bie ndesh me interesat e zhvillimit, por duhet të ruaj në mënyrë sa më të plotë një ekulibër të qëndrueshëm ndërmjet kërkesës edhe mundësisë për zhvillim jo vetëm në Spille, jo vetëm në plazhin e Rrogozhinës, Kavajës por gjithë Shqipërisë.

“Pra të kemi zhvillim për të bërë turizëm por edhe të ruajmë pasurinë tonë të madhe kombëtare që kemi, të ruajmë natyrën”, tha Klosi.

Ligji i ri menaxhimit të vijës bregdetare është një ligj, i cili kërkon të ruajë në mënyrë shumë strikte edhe fanatike, vijën bregdetare, e cila është një pasuri e madhe në të cilën nuk do të lejohen ndërtime dhe zhvillime të pa kontrolluara të bizneseve.

“Na duhet ta shohim këtë breg, këtë hapësirë më varka, shumë më tepër jahte, mjete lundruese. Ligji i ri do të përcaktojë rregullat e turizmit detar, të ketë mundësi që të afrojë biznes shumë më tepër në det, por njëkohësisht të kujdesemi shumë më mirë për tokën. Pra ligi i ri dhe plani i ri zhvillimor që ne do të bëjmë për këtë zonë do tu japim mundësi atyre që duan të bëjnë biznes të vërtet përsa i përket zhvillimeve të zonës së Spilles dhe në gjithë zonën”, – tha Klosi.

Kjo është vetëm një dëgjesë e parë e Masterplanit të zonës së bregdetit, e cila do të vazhdojë dhe në zonat e tjera bregdetare./atsh

Vija bregdetare, jo më një aksesor i ekonomisë sociale, por një nga shtyllat e forta të zhvillimit të vendit Read More »

Ekspertja e ISHP-së: Përdorimi i maskës, mjet plotësues për të mos rrezikuar infektimin nga COVID-19

Aktualitet, Shendetesi / /

“Përdorimi i maskës në mënyrë të detyrueshme në ambientet e mbyllura duke respektuar rregullat bazë të distancimi, përbën një mjet plotësues për të mos rrezikuar infektimin nga COVID”.

Kështu deklaroi Gentiana Qirjako, eksperte pranë Institutit të Shëndetit Publik në një nga mediet e vendit.

Ajo tha se “Akti Normativ që ka dalë ditën e mërkurë lidhet me detyrimin për të mbajtur maskë në të gjitha mjediset e mbyllura, pavarësisht nëse respektohet ose jo distancimi fizik të paktën 1 deri në 1 metër e gjysëm nga njëri-tjetri. Por kjo nuk do të thotë që vetëm përdorimi i maskës është një mjet mbrojtës që të mbron 100% nga transmetimi i sëmundjes. Është një mjet plotësues, duhet ta theksoj këtë sepse njerëzit mendojnë që në momentin që vënë një maskë, i gjithë rreziku kaloi. Jo nuk ka evidenca të tilla. Është një mjet plotësues që shkon paralelisht me të gjithë respektimin e masave të tjera bazike që i kemi thënë tashmë dhe që njerëzit e dinë, që lidhet me distancimin fizik, me larjen e duarve, shmangien e kontakteve të afërta dhe me ruajtjen e higjienës respiratore”.

Sipas saj, gjatë gjithë kësaj pandemie në botë janë mbajtur qëndrime të ndryshme referuar përdorimit të maskave.

“Në nivel botëror, qëndrimet që u mbajtën karshi maskave kanë qenë të ndryshme. Them që është momenti i duhur sepse jemi tashmë në një fazë të transmetimit komunitar të sëmundjes, në disa bashki kjo është një situatë evidente. Kështu që, kur nuk bëhet më i mundur gjurmimi i çdo rasti apo çdo kontakti të rasteve, vendosja e maskave bëhet e detyrueshme”, tha Qirjako.

“Ideale do të ishte që të gjithë njerëzit të përdornin maskat mjekësore por në situatën kur e gjithë bota ka nevojë për maskën mjekësore sidomos personeli mjekësor, të gjithë kemi rënë dakord që këto maska të jenë prioritet për personelin shëndetësor. Për publikun e gjerë, ka alternative të tjera siç janë barrierat apo maska të bëra vetë. Sigurisht, nuk ka evidence të mbajtjes të së njëjtës ngarkesë, filtrimit të ngarkesës virale por padiskutim që ato përbëjnë pengesë sidomos nëse ndjekin disa parametra. OBSH rekomandon që maskat e bëra vetë janë një mjet shumë i mirë tek personat që nuk janë të sëmurë por ndoshta janë asiptomatikë dhe që mund të pengojnë transmetimin e virusit nga personi asiptomatikë tek personat e shëndetshëm. Sipas OBSH-së rekomandohen maska me 3 shtresa ku shtresa e brendshme duhet të jetë material pëlhurë ku qarkullon lehtësisht ajri”, u shpreh ajo. /atsh

Ekspertja e ISHP-së: Përdorimi i maskës, mjet plotësues për të mos rrezikuar infektimin nga COVID-19 Read More »

“Pak kohë më parë thoshte se listat e hapura janë një ide e vlefshme, sot është kundër”/ Balla: Jozefina ka të drejtë, Luli gënjen edhe kur e pyet sa është ora

Aktualitet, Opinione, Politike, Votime Sondazhe / /

Kryetari i grupit parlamentar të Partisë Socialiste, Taulant Balla theksoi solli në vëmendjen deklaratat e pak kohëve më parë të Lulzim Bashës, kur thoshte se listat e hapura janë një ide e vlefshme, ndërkohë që sot është kundër listave të hapura.
Balla ndau një video ku kryetari i Partisë Demokratike, Lulzim Basha, në një takim me të rinj, është shprehur në mbështetje të listave të hapura.
“Jozefina ka gjithmonë të drejtë: Luli gënjen edhe kur e pyet sa është ora. Pak kohë më parë thoshte se listat e hapura janë një ide e vlefshme. Sot është kundër listave të hapura, kundër votës së qytetarëve jo vetëm për partinë, por edhe për kandidatin që preferon”, tha Balla./atsh

“Pak kohë më parë thoshte se listat e hapura janë një ide e vlefshme, sot është kundër”/ Balla: Jozefina ka të drejtë, Luli gënjen edhe kur e pyet sa është ora Read More »

“Marrëveshja e 5 qershorit ka të bëjë me mirëadministrimin e procesit zgjedhor”/ Manja: Ndryshimet kushtetuese nuk i ndalojnë koalicionet

Politike / /

Deputeti i Partisë Socialiste, Ulsi Manja theksoi sot në një intervistë televizive, mbrëmjen e sotme se ndryshimet kushtetuese nuk prekin sistemin zgjedhor dhe as ndalojnë koalicionet.

“Dua të jem i qartë. Ndryshimet kushtetuese nuk e prekin sistemin zgjedhor. Shqipëria do të ketë sipas nenit 64 të kushtetutës sistem konkurrimi proporcional rajonal. 140 deputetë të cilët do të jenë në 12 rajone të Shqipërisë. Pra çështja e sistemit nuk preket”, u shpreh Manja.

Duke folur për listat e hapura, Manja tha se bëhet fjalë për ndryshim kushtetues. “Po the lista të hapura sigurisht që partitë do të duhet të shkojnë para elektoratit secila me identitetin politik, që t’i japë mundësi qytetarëve shqiptarë që në ato lista që do të depozitojë secila parti, t’u japë mundësi të zgjedhë partinë dhe kandidatin që duan”, tha Manja.

Sipas Manjës, ndryshimet kushtetuese nuk prekin thelbin e marrëveshjes së 5 qershorit.

“Zonja Hajdari ka qenë pjesë e Këshillit Politik ku është dakordësuar marrëveshja e 5 qershorit për ndryshime në kodin zgjedhor dhe në fakt ndryshimet që janë dakordësuar në marrëveshjen e 5 qershorit kanë të bëjnë më mirëadministrimin e procesit zgjedhor. Nuk flet për koalicione, marrëveshja e 5 qershorit nuk ka të bëjë më koalicione apo jo koalicione. Marrëveshja e 5 qershorit është një marrëveshje e dakordësuar për mirëadministrimin e procesit zgjedhor”, deklaroi më tej ai/atsh

“Marrëveshja e 5 qershorit ka të bëjë me mirëadministrimin e procesit zgjedhor”/ Manja: Ndryshimet kushtetuese nuk i ndalojnë koalicionet Read More »

Hajdari: Opozita parlamentare ka votat e saj solemne dhe nuk ka për t’i çuar dëm

Opinione, Politike, Votime Sondazhe / /

Deputetja e opozitës, Rudina Hajdari tha sot në Kuvend se “Gjermania nuk duhet të na na kthejë kurrizin në këtë betejë për listat e hapura”.

Duke folur në Kuvend për ndryshimet kushtetuese, Hajdari tha se kohët e fundit na ka shqetësuar një ndërhyrje që ka ardhur nga vendi më i fortë i BE-së, Gjermania.

“Mbrëmë e informova anëtarin e CDU-së, për situatën në Shqipëri. E informova sepse është e rëndësishme që Gjermania të mos na lërë në baltë ndërkohë që ne si opozitë parlamentare, që i kemi shërbyer vendit për proceset integruese të Shqipërisë në momentet më delikate duke qëndruar në parlamentin shqiptar, tani është momenti që të gjithë të na mbështesin në këtë betejë të madhe që kemi përpara, hapjen e listave, e cila në fakt thellon demokracinë e shteti shqiptar. Kam besim te BE, te fryma perëndimore e shteteve aleate të cilët në momentin që ne qëndruam në parlament e përshëndetën vendimin tonë, sot ka ardhur koha të dëshmojnë mbështetjen për këtë opozitë parlamentare. Tashmë ato janë përballë dy zgjedhjeve. Nëse kjo opozitë parlamentare nuk ka vend dhe rëndësi, atëherë hajde ikim të gjithë, sillemi njësoj se ata që janë jashtë. I marrim këto mandate dhe dalim dhe mos votojmë asgjë. Nëse këtu në Kuvend kërkohet vota jonë atëherë duhet të jemi të vetëdijshëm se opozita parlamentare në këtë vend ka votat e saj solemne dhe nuk ka për t’i çuar dëm”, tha Hajdari.

Ajo shtoi se sot ka ardhur koha që shqiptarët të zgjedhin midis tre kryetarëve dhe midis atyre kandidatëve që do dalin para shqiptarëve.

“Hapja e listave nuk është çështja e disa individëve. Këto ndryshime kushtetuese nuk janë çështje që bëhen në mënyrë të njëanshme siç pretendohet sepse pa luftën tonë dhe shumë njerëzve jashtë Kuvendit për të ngritur zërin dhe hapur lista, besoj se kjo betejë nuk do shkonte në këtë pikë”. /atsh

Hajdari: Opozita parlamentare ka votat e saj solemne dhe nuk ka për t’i çuar dëm Read More »

Tamara e hijshme dikur e braktisur, sot e transformuar në një kënd mahnitës turistik nga Rilindja Urbane

Turizem / /

Tamara në Malësinë e Kelmendit, një nga zonat më të bukura të Alpeve shqiptare, është kthyer vitet e fundit në një destinacion turistik.

Deri para shtrirjes atje të Programit të Rilindjes Urbane, ajo çka prezantonte Tamara ishte një mrekulli natyrore, por njëherësh, dëshmi e harresës përmbi dy dekada dhe mungesës së vizionit për ta zhvilluar si të tillë.

Kryeministri Edi Rama ka publikuar pamje nga Tamara duke ftuar turistët vendas e të huaj ta vizitojnë atë.

“Mirëmëngjes dhe me Tamarën e hijshme dikur e braktisur e sot transformuar në një kënd mahnitës turistik nga Rilindja Urbane në Malësinë e Madhe, ju uroj një ditë të mbarë”, – shprehet Rama.

Sot, Tamara ka një shëtitore të re 5 mijë metra katrorë, është bërë rikonstruksioni i çative të shtëpive karakteristike të zonës, është bërë riveshja e fasadave të ndërtesave në qendër të fshatit, janë mbjellë pemë përgjatë shëtitores si dhe janë vendosur sistemet e ndriçimit.

Sipas gojëdhanave, Tamara e ka marrë emrin nga bashkëshortja e Pashait të Shkodrës, Karamahmut Pash Bushatliut. Në nder të saj pashai ndërtoi fillimisht urën e Tamarës që i dha më vonë emrin zonës.

Malësia e Madhe ofron pamje të rralla në çdo stinë të vitit. Investimet në infrastrukturë kombinuar me investime në përmirësimin e peizazhit urban i kanë bërë disa prej njësive administrative, lehtësisht të arritshme, duke i dhënë vlerë peizazhit natyror.

Kjo zonë ka potenciale për zhvillimin e sporteve dimërore, kampingje me çadra, si dhe struktura për shërbime gastronomike, të cilat janë miqësore me natyrën./atsh

Tamara e hijshme dikur e braktisur, sot e transformuar në një kënd mahnitës turistik nga Rilindja Urbane Read More »

Flamingot spektakël edhe në plazhin e Pishporos në Fier

Aktualitet / /

Pishporo, e shtrirë mes derdhjes së lumit të Vjosës e deri në Zvërnec të Vlorës nuk është vetëm plazh, por edhe vendi i flamingove, që kanë gjetur oazin e tyre të qetësisë në ligatinat e plazhit duke dhuruar spektakle të paparë.

Ditët e fundit flamingot kanë pushtuar Rezervatin Natyror të Menaxhuar të Pishporos së Fierit, pranë grykëderdhjes së Vjosës.

Fotjon Prençe, shef i Monitorimit në Administratën e Zonave të Mbrojtura në Fier, tha sot për ATSH-në se “qetësia e krijuar në pjesët ligatinore të Rezervatit Natyror te Menaxhuar Pish-Poro ka rritur ndjeshëm numrin e shpendëve ujorë. Ajo që bie në sy është numri i madh i flamingove 2 vitet e fundit që pushojnë në këto oaze të paqta”.

“Spektaklet që të dhurojnë këta shpendë elegantë e me ngjyra të bukura mund t’i shihni nga mëngjesi në mbrëmje në këto ligatina”, – tha Prençe.

Sipas tij, përveç Nartës dhe parkut kombëtar Divjakë-Karavasta vitet e fundit flamingot janë të pranishme edhe në Pishporo.

Zogjtë lozonjarë që tërheqin vizitorë të shumtë në vëzhgimin e piruetave të tyre, ngrihen në fluturim herët në fillimdite dhe përshëndesin diellin në perëndimin e tij. Ata janë kthyer në një atraksion për turizmin e vëzhgimit të tyre në habitatet natyrore ku jetojnë.

Flamingot jetojnë gjithmonë në grupe, që nga grupet e vogla deri në qindra mijëra. Zogjtë ngrihen në ajër në grup dhe fluturojnë me qindra kilometra gjatë periudhës së shtegtimit. Fluturimi bëhet duke formuar radhë të gjata ose në formë V-je, derisa të arrijnë në vendmbërritjen e tyre – një liqen me ujë të kripur, që është vend i shkëlqyer për të ngritur folenë e për të rritur të vegjlit.

Zakonisht qindra flamingo mblidhen së bashku si një grup baleti uji. Të gjithë pastrojnë puplat e tyre rozë duke qëndruar me një këmbë në diell për orë të tëra. Madje me një këmbë ata edhe flenë.

Gjatësia e tyre shkon nga 81 deri në 130 cm, por pesha e tyre trupore është e vogël, ajo shkon nga 2–3,6 kg. Duke kombinuar peshën dhe ngjyrën, flamingot janë ndër zogjtë më të dallueshëm nga të tjerët. /atsh

Flamingot spektakël edhe në plazhin e Pishporos në Fier Read More »

“I papranueshëm reagimi i opozitës jashtëparlamentare dhe i opozitës presidenciale”/ Hapja e listave, pa cenuar asnjë presje nga marrëveshja e 5 qershorit

Aktualitet, Opinione, Politike / /

Kryeministri Edi Rama deklaroi sot se “ne do ta diskutojmë me opozitën parlamentare detajimin e nismës kushtetuese dhe integrimin e saj në Kodin Zgjedhor pa cenuar asnjë pikë e presje nga çka do të integrohet si fryt i marrëveshjes me opozitën jashtëparlamentare”.

“Sot Komisioni i Ligjeve ka votuar fjalë për fjalë draftin e dakordësuar me opozitën jashtëparlamentare në 5 qershor. E kemi votuar me shumicë, jo me konsensus sepse opozita parlamentare refuzon të pranojë mosdepolitizimin e komisioneve të votimit dhe të numërimit, që është lëshimi i madh i bërë nga PS, jo me hirin e objektivave të veta, por me pahirin e një nevoje për ta përfshirë opozitën jashtëparlamentare në proces”, tha Rama.

Ndërkohë, kryeministri theksoi se “dje Komisioni i Ligjeve i ka hapur rrugë pjesëmarrjes së qytetarëve jo vetëm në zgjedhjen e partive si deri më sot, por edhe në dhënien e pëlqimit për deputetin ose deputeten, pa rrezikuar një arritje madhore të PS-së në radhë të parë por edhe forcave të tjera politike, përfaqësimin e grave e vajzave në Kuvend. Kjo nismë kushtetuese ka pasur konsensus të plotë me opozitën parlamentare në votimin e djeshëm”, tha Rama.

Ai tha se “faktikisht jemi në mes si shumicë qeverisëse dhe si Parti Socialiste, të dy palëve me të cilat kemi konsensus të plotë për atë që këto palë më vete duan dhe s’kemi konsensus për atë që palët më vete nuk duan”.

“Ndërkohë, reagimi i opozitës jashtëparlamentare dhe i opozitës presidenciale ndaj kësaj nisme kushtetuese të Kuvendit të Shqipërisë është i papranueshëm, qoftë në aspektin etik, qoftë në aspektin politik, qoftë në aspektin kombëtar. Sepse, unë e di dhe gjithë populli e di që as opozita jashtëparlamentare, as opozita presidenciale nuk e vlerësojnë dhe as e respektojnë Kuvendin e Shqipërisë, parlamentin e vendit. Por kjo nuk e ndryshon faktin që parlamenti i vendit, Kuvendit i Shqipërisë është sovran. Në aspektin etik nuk është e denjë që Kuvendi i Shqipërisë të sulmohet, të anatemohet, të përbuzet, qoftë nga një institucion si institucion i Presidentit të Republikës. Këtë e them në radhë të parë sepse etika institucionale është baza e shkruar në çdo paragraf të parë të kapitullit të parë të çdo edukate shteti. Dhe qoftë nga vetë opozita jashtëparlamentare, e cila zgjodhi ta braktisë Kuvendin me vullnetin e vetë të lirë, ta zhvlerësojë Kuvendin me vendimin e vetë sovran”, tha Rama.

Sipas tij, opozita jashtëparlamentare mund të zgjedh edhe ta përbuzë Kuvendin, por përtej kësaj asgjë tjetër nuk mund të bëjë dhe asgjë nuk e shlyen nga përgjegjësia që ka lidhur em ata të cilët sot janë deputetë të opozitës në parlament. “Nuk i kam sjellë unë, as Taulant Balla, as PS, por i ka sjellë opozita jashtëparlamentare me firmën dhe vulën e drejtuesve të saj. Janë zgjedhja e tyre dhe ne nuk na mbetet veçse ta respektojmë çdo deputet të Kuvendit në radhët e opozitës”, tha Rama.

Rama tha se “Parlamenti është sovran dhe mbi parlamentin nuk është askush dhe nuk mund të dalë askush”. “Sot PS, shumica qeverisëse, ka konfirmuar edhe një herë seriozitetin e plotë në zbatimin e marrëveshjes së nënshkruar në 5 qershor për të cilën falënderoj miqtë dhe partnerët tanë dhe personalisht ambasadoren e SHBA-së, atë të BE-së dhe atë të Britanisë së Madhe që u angazhuan drejtpërsëdrejti në lehtësimin e procesit dhe krijimin e kushteve për të zhvilluar atë dialog të vështirë”, tha Rama. /atsh

“I papranueshëm reagimi i opozitës jashtëparlamentare dhe i opozitës presidenciale”/ Hapja e listave, pa cenuar asnjë presje nga marrëveshja e 5 qershorit Read More »