Arjani është babai i 2 vajzave të vogla të cilat prej disa kohësh nuk po i takon dot. Historia e rrallë vjen në emisionin “Me zemër të hapur” në Neës24. Arjani jeton në qytetin e Kuçovës dhe për të siguruar jetesën punon me pastrimin e rrugëve gjatë natës. Me bashkëshorten thotë se janë njohur me mblesëri, por e dashuron ende. Në korrik të këtij viti pas shumë debatesh të cilave ai nuk u jep dot një shpjegim, nusja u largua, kishte zënka me prindërit dhe vëllain e tij, por ai nuk iu ka dhënë dot një zgjidhje për shkak edhe të punës që e mban në një pjesë të madhe të kohës larg shtëpisë.
Pas debatit të ashpër të ndodhur gjatë natës, e shoqja vendosi të largohej së bashku me 2 vajzat e vogla. Që nga ajo ditë ajo po jeton tek xhaxhai i saj dhe ka dorëzuar në gjykatë edhe një padi për divorc. Teksa shkoi të sqarohej me të Arjani thotë se ajo e denoncoi dhe kërkoi urdhër mbrojtje. Që nga korriku e deri tani janë parë vetëm në 2 seancat në gjykatë. Bashkëshortja kërkon ndarjen pasi ai është përherë në punë dhe nuk plotëson më kushtet për të qenë burri i saj.
“U njohëm me lajmësi me gruan. Unë jam tip i qetë, shikoj punën time. Në shtëpi nuk kemi pasur probleme, as sherre. Unë kam punuar gjithmonë me pastrimin. Ne kemi 6 vite bashkë. Jetonim me prindërit, vëllain. Nusja më thoshte se kishte disa shqetësime nga vëllai. Faji im ishte që nuk dolëm në shtëpi veç”, tha burri. Ai nuk ka pranuar të deklarojë se cili ka qenë problemi mes gruas së tij dhe vëllait por nga informacionet në emision, u kuptua se mes tyre ka pasur një incident shumë të rëndë që ka qenë një arsye për largimin e bashkëshortes së Arjanit nga shtëpia. Pas daljes në emision, ai tha se ndihet i kërcënuar dhe se kishte frikë të kthehej në shtëpi, ndërsa moderatorja Evis Ahmeti i ka bërë thirrje ‘live’ policisë së Beratit ta shikojë këtë denoncim. Nga ana tjetër Arjani ka kërkuar nga bashkëshortja që të kthehet pranë tij.
