Kreu i PDIU, Shpëtim Idrizi ka komentuar vendimin për daljen nga koalicioni qeverisës dhe negociatat me opozitën.
Duke folur për emisionin “Kjo Javë” në News24, Idrizi ka sqaruar edhe marrëdhënien me PBDNJ-në e drejtuar nga Vangjel Dule, e cila është aktualisht pjesë e opozitës.
Kreu i PDIU, ka thënë se nuk ka asnjë problem me kauzën e PBDNJ, pasi konflikti ekziston me qeverinë greke, për shkak të mosnjohjes së çështjes çame.
Gjatë fjalë së tij, Idrizi ka lëshuar akuza të forta për kryeministrin Edi Rama, i cili sipas kreut të PDIU, mbron interesat e grekëve si brenda dhe jashtë kufirit.
“Ne nuk kemi asnjë problem me kauzën e partisë së Dules. Ne e kemi konfliktin me qeverinë greke, që ka thënë se nuk njohim çështjen çame. Nuk e di ça pune ka Dulja kur ne merremi me Greqinë. Mos u merakos zoti Dule sepse interesat e Greqisë i mbron shumë më mirë Rama, edhe grekëve në Greqi edhe minoriteteve në Shqipëri”, tha Idrizi.
