Duke iu referuar pamjeve të fundit satelitore të një uzine, ku u ideua raketa e parë, agjencitë amerikane të shërbimeve sekrete besojnë se Koreja e Veriut po prodhon raketa të reja, me kapacitet për të arritur deri në bregun lindor të SHBA-së, raportoi gazeta amerikane ‘’ Washington Post ‘’.
‘’Provat e siguruara së fundmi, përfshirë imazhet satelitore në javët e fundit tregojnë se puna vijon në të paktën një, ndoshta edhe dy, ICBM (raketë ndërkontinentale), me karburant të lëngshëm, në një kompleks të madh kërkimi në Sanumdong, në afërsi të Phenianit’’, shkruan e përditshmja, duke cituar disa zyrtarë në kushte anonimati.
Këto zbulime vijnë disa ditë pasi kreu i diplomacisë amerikane, Mike Pompeo pranoi gjatë një seance dëgjimore në Kongres se Pheniani po vijonte prodhimin e materialeve bërthamore, gjashtë javë pas samitit historik midis Donald Trump dhe Kim Jong Un./ atsh
