Në nderim të figurës së veprimtarit të shquar, Adem Demaçi, i cili ka ndërruar jetë dje, presidenti Hashim Thaçi, bazuar në kompetencat e tij kushtetuese dhe ligjore, i ka shpallur tri ditë zie në Kosovë, përkatësisht ditën e premte, të shtunë dhe të dielë.
Gjatë këtyre ditëve të zisë, flamuri shtetëror i Republikës së Kosovës do të ulet në gjysmështizë në të gjitha institucionet shtetërore brenda dhe jashtë vendit.
Demaçi ishte i njohur për simbol të rezistencës, duke kaluar plot 28 vjet në burg për angazhimin e tij politik.
Presidenti Thaçi e ka marrë këtë vendim duke u mbështetur në Ligjin për Presidentin e Republikës së Kosovës, për Protokollin e Shtetit të Republikës së Kosovës dhe në Ligjin për Përdorimin e Simboleve Shtetërore të Republikës së Kosovës. /KosovaPress/
