Lotët e një nëne i dhanë jetë një operacioni që zgjati dy vjet deri sa arriti të shkatërronte një organizatë të madhe ndërkombëtare droge, të formuar nga shqiptarë e marokenë, me 22 arrestime të kryera dje nga karabinierët në Itali.
Më 2016, një çift u paraqit në kazermën e karabinierëve në Bondeno për të denoncuar dëmtimin e makinës së tyre. Një rast i rëndomtë, si shumë të tjerë, por vëmendjen e një karabiniereje e tërhoqi e qara e papritur e gruas. Iu afrua për të kuptuar shkakun, deri sa mësoi se burrë e grua ishin bërë objekt kërcënimesh, edhe me vdekje, nga persona që i shisnin drogë djalit të tyre.
Në një rast, u kishin marrë edhe lejen e qarkullimit të makinës, duke e kthyer vetëm pasi babai kishte larë borxhin. Që në atë moment, në mars 2016, nisi operacioni me emrin e koduar ‘Sottobosco’, hetimet e të cilit zbuluan se nuk bëhej fjalë vetëm për shpërndarës të vegjël droge, por për një rrjet gjigant të trafikut ndërkombëtar.
Operacioni u kurorëzua sot me 22 arrestime, kapjen e 7 kilogramëve kokainë e 28 mijë euro në kartëmonedha, ekzekutuar nga 140 karabinierë, të ndihmuar nga tre njësi qensh dhe një helikopter, në provincat e Ferraras, Bolognas, Modenas, Parmës, Mantovës, Brescias, Pisas, Firenzes e Agrigentos.
Përveç marokenëve, në pranga përfunduan shqiptarët Dëfrim, Enver, Haxhi e Besnik Dervishi, plus Klodian Alushku, që kishin kontakte me Holandën, ku merrnin furnizimin me kokainë. Veç tyre, edhe bashkëpunëtori i ngushtë Olsi Iviku, si dhe Shkëlzen Cani, Shpëtim Fili, Arjan Temaj e Festim Hoxha.
