Granit Xhaka dhe Xherdan Shaqiri i ngritën peshë zemrat e gjithë shqiptarëve duke i festuar golat kundër Serbisë me simbolin e shqiponjës me duar. Një veprim ky që shkaktoi shumë polemika dhe u shoqërua edhe me një gjobë ndaj dy futbollistëve shqiptarë, të cilët luajnë pranë kombëtares së Zvicrës.
Mirëpo këtë vit në Kampionatin Botëror luan edhe një shqiptar tjetër, i cili është pjesë e skuadrës së Belgjikës. Ai është Adnan Januzaj, i cili shënoi golin kundër Anglisë, por nuk festoi me shqiponjë dhe kjo u komentua gjerësisht në mediat shqiptare.
Në një prononcim për “AFP”-në Januzaj ka treguar edhe arsyen se përse nuk festoi me shqiponjë.
“Nuk jam shumë i përqëndruar në momentin pas shënimit të golit. Është gol me plot emocione, po festoja me fansat dhe bashkëlojtarët, por mendoj se janë dy fusha, ajo e futbollit dhe ajo politike. Unë i festoj golat me bashkëlojtarët e mi”, është shprehur Januzaj.
