Policia shqiptare sekuestroi 800 kilogramë marijuanë para se te niseshin ne Itali ne Gjirin e Brisanit (apo siç njihet nga vendasit Gjiri i Ariut). AJo njihet si një nga zonat më të bukura turistike të bregdetit jugor. Por kohët e fundit është kthyer në një vend grumbullimi të sasive të mëdha të marijuanës.
Policia shqiptare tha sot se rreth 800 kilogramë ishte sasia e marijuanës që u bllokua gjatë një operacioni policor që nisi dje dhe vijoi edhe gjatë natës me kontrolle në territorin e Gadishullit të Karaburunit. Një sasi bidonash me benzinë u zbuluan krahas lëndës narkotike të dyshuar nga policia se do të shërbenin për mjetin e lundrimit që do transportonte lëndën narkotike drejt Italisë.
Specialistët e antidrogës vlerësojnë se Gjiri i favorizon skafistët të futen me lehtësi për të ngarkuar lëndën narkotike e cila dërgohet në zonën afër bregut me korrierë apo kafshë.
Policia nuk ka dhënë hollësi mbi organizatorët e trafikut në këtë zonë.
Gjiri i Brisanit është përfshirë në guidat turistike shqiptare si një nga plazhet më të bukura natyrore që gjendet në anën perëndimore të gadishullit të Karaburunit, përgjatë detit Jon.
Për të shkuar në këtë Gji përveç rrugës detare ndiqet rruga që përdorej nga nje repart ushtarak i periudhes komuniste, Pashaliman – Ravenë-Brisan, gati 14 kilometra e gjatë.
