Kryeministri Edi Rama ka hedhur poshtë që të gjitha zërat që po qarkullojnë këto ditë nga opozita dhe disa media që Shqipëria do të strehojë ish luftëtarët e kapur rob të ISIS-it, në një kamp të financuar nga vendet e BE.
Teksa i kthen përgjigje një qytetari në Facebook i cili e pyet në lidhje më këtë çështje Rama thotë se kjo është e pa vërtetë, zero, por sipas shefit të qeverisë kjo histori tregon se në çfarë katandie është opozita inekzistente e këtij vendi.
“Z.Kryeministër…reagoni më shpejtë dhe prerë për gjërat sensitive si kjo që po lakohet ditët e fundit për qendrat e ISIS, mos lejoni te përpunohet opinioni”– i shkruan qytetari kryeministrit Rama.
Ndërkaq Rama i përgjigjet: “E kemi sqaruar që është një fantazi e kthyer ne akuza dhe s’ka asgjë të vërtetë, zero, por tregon se ne çfarë katandie është opozita inekzistente e këtij vendi”.
Por edhe më herët Rama e ka sqaruar këtë çështje përmes një deklarate për mediat nga Këshilltari i Sigurisë në Kryeministri Sander Lleshi, i cili bëri me dije se nuk ekziston asnjë lloj ideje apo kërkese për të krijuar një kamp për ish luftëtarët e ISIS në Shqipëri, shkruan java.
“Këto opinione qe i referohen një fraze të përdorur nga kryeministri Borisov, janë krejt pa lidhje me subjektin të cilit shefi i qeverise bullgare iu referua në prononcimin e tij”, shkruan ndër të tjera Lleshi.
Sipas tij Shqipërisë as nuk i është kërkuar, as nuk i është propozuar një gjë e tillë.
“Behet thjeshte fjale për Qendrën e Koordinimit kundër Ekstremizmit te Dhunshëm, që ishte edhe organizatorja e konferencës ndërkombëtare te para pak ditëve, ku mori pjesë edhe kryeministri i Bullgarisë.
Shqiperia ka propozuar kthimin e kësaj qendre në një qendër rajonale, për të kryer analiza, vlerësime, studime, shkëmbim informacioni si edhe programe të përbashkëta kundër ekstremizmit të dhunshëm.
Por kjo qendër as nuk është, as nuk mund të jetë dhe as nuk i ka shkuar kurrëkujt në mendje që të kthehet në një repart grumbullimi te ish-militanteve te ISIS-it” thuhej në deklaratën e Lleshit.
