Qershori që shënon nisjen e fluksit të vërtetë të pushuesve në brigjet e Jonit do ta gjejë Kaninën e Vlorës me një rrugë të rikonstruktuar. Aksi që sipas banorëve mban peng potencialet e zhvillimit të zonës, po rikonstruktohet me një fond prej 250 milion lekësh.
E cilësuar si ballkoni i Vlorës apo fshati i bejlerëve, Kanina është një prej atraksioneve turistike në qytetin jugor.
Me Kalanë, shtëpitë e familjeve të mëdha të zonës por dhe bukuritë natyrore, zona ka potenciale të mëdha zhvillimi që ndër vite janë mbajtur peng nga rruga e degraduar që të çon në fshat.
Por situata pritet të ndryshojë. Falë një investimi 250 milionë lekë, rruga po i nënshtrohet rikonstruksionit, dhe kryebashkiaku i Vlorës Dritan Leli thotë se ajo do të jetë gati në qershor.
Dritan Leli: Mendoj se është një nga projektet e rëndësishme për destinacionin më të rëndësishëm turistik në qytetin e Vlorës, siç ëhstë Kanina vetë dhe kalaja e Kaninës.
Rruga sjell zhvillim, ndaj banorët e zonës shprehen optimistë për të ardhmen që e shohin të lidhur me turizmin kulturor.
Mbi kodrinë përballë detit, shumë pranë qytetit të Vlorës, Kanina është fshat i madh historik me afro 4500 banorë, ku pas rrugës presin zgjidhje edhe për furnizimin me ujë të pijshëm dhe problematika të tjera që mbajnë larg turistët.oranews
