Grabitja në Fier e cila u shoqërua me shkëmbim zjarri me policinë, përfundoi me vdekjen e një 20-vjeçari nga Elbasani.
Bëhet fjalë për Xhuljano Sollakun i cili jetonte i vetëm me gjyshërit në fshatin Katund i Ri në Elbasan.
Ai tentoi të grabiste banesën e çiftit Minella dhe Elsa Muça bashkë me disa persona të tjerë.
Prindërit e të riut ishin emigrantë dhe jetonin në Greqi, ndërsa trupin e viktimës në morg e ka tërhequr xhaxhai i të riut.
Me veshje të errët, me një kapele të zezë në kokë dhe jo pak i tronditur xhaxhai i Xhuljano Sollakut ka mbërritur sot në morgun e Fierit për të tërhequr trupin e pajetë të nipit të tij, në mungesë të prindërve.
Nuk ka preferuar të thotë asgjë për gazetarët, ndërsa rreth e rrotull kishte edhe forca të policisë.
Më pas një makinë morti ka marrë trupin e të riut për ta transportuar në Elbasan ku do të zhvillohet edhe ceremonia mortore, shkruan Balkanweb.
Gjatë aksionit për kapjen e grabitësve, këta të fundit qëlluan mbi policinë e cila u kundërpërgjigj duke vrarë 20-vjeçarin.
Kujtojmë se nga ngjarja në fjalë mbeti i plagosur një nga autorët, Arben Muça, 37 vjeç, banues në Durrës, ndërsa bashkëpunëtorët e tjerë u arratisën.
