“Mesi nuk është njerëzor dhe për këtë arsye FIFA nuk duhet ta lejojë që të luajë futboll”, kështu është shprehur trajneri i Iranit Kueiroz disa kohë më parë. Në fakt kjo nuk ka shumë lidhje me ndeshjen në Champions mes Barcelonës dhe Çelsit, por nga ajo që pamë në “Camp Nou”, paska pasur të drejtë. Katalanasit fituan 2-0, ndërkohë që “Pleshti” realizoi dy gola. Barcelona e nis furishëm ndeshjen, teksa gjen rrugën e rrjetës ende pa nisur mirë takimi. Mesi përfiton nga një karambol i topit me mbrojtësit e Çelsit në minutën e 3-të dhe më pas lëshon një goditje poshtë këmbëve të portierit Kurtua, i cili mposhtet edhe pse në një pozicion shumë të vështirë.
Blutë e Londrës përpiqen që të reagojnë me Eden Hazard dhe Uillian që janë një rrezik i vazhdueshëm për Ter Shtegen, por katalanasit përfitojnë me anë të kundërsulmeve. Në minutën e 20-të, Mesi vepron mjaft mirë në një aksion personal, pason për Dembele dhe ky i fundit me një të djathtë të fortë mposhtë për herë të dytë ekipin anglez. Në fundin e pjesës së parë vjen dhe reagimi i Çelsit, teksa Alonso trondit shtyllën me një goditje të ekzekutuar në mënyrë mjeshtërore nga 25 metra. Fraksioni i dytë i ndeshjes nis me dominimin e skuadrës angleze që zotëron topin dhe vendos shpesh herë në vështirë blaugranët. Kurtua bën një gafë në zonë duke i dhuruar topin Suarez, por më pas pret goditjen e sulmuesit uruguaian. Alonso në minutën e 50-të rrëzohet në zonë pas një kontakti me Pike, por për arbitrin Skomina nuk ka asgjë të parregullt.
Ekipi i Kontes ka disa mundësi të mira me Uillian dhe Alonson, por Ter Stegen është mjaft i vëmendshëm. Në momentin më të mirë të Çelsit, Barcelona e ndëshkon sërish, dhe këtë herë është protagonist Lionel Mesi, “Pleshti” argjentinas e dërgon topin sërish poshtë këmbëve të portierit Kurtua, duke realizuar golin e tretë që vulos kualifikimin. Rudiger goditi shtyllën me kokë njëminutë nga fundi i kohës së rregullt. Në fakt ky gol është i veçantë për sulmuesin e blaugranëve, pasi është i 100-ti në Ligën e Kampionëve në 123 ndeshje në total. Juventus, Mançester Siti, Roma, Real Madrid, Bajern Mynih, Liverpul, Sevija, Barcelona janë 8 ekipet çerekfinaliste për këtë sezon.
https://streamable.com/6m17t
