Më 8 Mars një vajzë 19-vjeçare i ka dhënë fund jetës në kushte të rënda psikologjike pas një debati me të fejuarin e saj.
E reja Erisa Veizi është gjetur në gjendje të rëndë në banesën e saj nga familjarët pasi kishte konsumuar një sasi të madhe fostoksine.
Ngjarja ka ndodhur mëngjesin e së enjtes, pasi mes vajzës 19- vjeçare nga fshati Zvirinë dhe të fejuarit të saj ka pasur një debat përmes telefonit. Pasi e ka përjetuar keq debatin me të fejuarin e saj, e reja është mbyllur në dhomën e saj dhe në kushtet e tronditjes së thellë ka pirë tetë tableta fostoksinë.
Mësohet se prindërit e kanë gjetur në kushte të rënda në dhomën e saj dhe, pavarësisht se e kanë dërguar me urgjencë në Spitalin Rajonal të Korçës, ka ndërruar jetë vetëm pas rreth 30 minutash.
“Më datë 08.03.2018, në orën 10:15, jemi njoftuar se në Spitalin e Korçës ka shkuar e shoqëruar nga familjarët e saj shtetasja E.V, rreth 19 vjeçe, banuese në fshatin Zvirinë. Nga të dhënat paraprake dyshohet se, në gjendje të rënduar emocionale, kjo shtetase ka konsumuar fostoksinë në banesën e saj, ku më pas në spital, ka ndërruar jetë”, bëhet e ditur nga Policia e Korçës.
Prindërit e 19- vjeçares kanë deklaruar para oficerëve të Policisë se ngjarja mund të ketë ardhur si shkak i konflikteve që kishte me të fejuarin, por pa dhënë shpjegime se përse kanë lindur këto debate mes çiftit të të rinjve.
Sipas familjarëve, debatet kishin ndikuar te vajza dhe për këtë arsye ishte në gjendje depresive, gjë e cila e ka shtyrë drejt aktit të vetëvrasjes.
“Vajza kishte pësuar tronditje psikologjike nga debatet e vazhdueshme që kishte me të fejuarin e saj. Këto debate kanë bërë që vajza jonë të zhytej në një gjendje depresive”, janë shprehur dy prindërit e 19-vjeçares.
Ata kanë sqaruar se lidhja mes dy të rinjve ishte zyrtare pasi për këtë gjë ishin vënë në dijeni dhe dy familjet respektive.
“Ne ishim në dijeni se mes tyre kishin lindur debate gjatë ditëve të fundit, por nuk e mendonin kurrë se Erisa do të kryente një veprim të tillë”, kanë shtuar dy prindërit e tronditur nga tragjedia që preku familjen e tyre. Genci dhe Fitore Veizi janë prindër të katër vajzave.
Erisa ishte vajza e dytë pas të parës 22 vjeçe. Çifti ka dhe dy vajza të tjera, 17 dhe 13 vjeçe. Lidhur me ngjarjen e rëndë, Policia e Korçës bën të ditur se ka nisur hetimet për sqarimin e plotë të rrethanave që sollën vetëvrasjen e 19-vjeçares.
Nga ana tjetër, po punohet për marrjen në pyetjet të të fejuarit të Erisa Veizit për të hedhur më shumë dritë mbi atë që ka ndodhur dhe për të zbuluar shkakun e konfliktit mes tyre. Dy prindërit e pikëlluar dhe të afërm të tjerë të vajzës kanë tërhequr trupin nga morgu i Spitalit Rajonal të Korçës, ndërkohë që të premten pritet të kryhet ceremonia për përcjelljen për në banesën e fundit të 19-vjeçares
