Në ambientet e Muzeun Historik Kombëtar u mbajt aktiviteti në kuadër të promovimit të botimeve: • “Trashëgimi në rrënoja e fshatit të braktisur mesjetar të Tragjasit: Ruajtja dhe rivitalizimi i së harruarës”, me autor Florian Nepravishta, Ledita Mezini dhe Arta Dollani.
Libri paraqet punën e kryer në kuadër të kërkimit akademik të FAU, të zhvilluar me studentët e vitit të pestë (viti akademik 2015-2016), në bashkëpunim të ngushtë me IMK. • Revista periodike “Monumentet”, nr. 56, si dhe • “Analizë strukturore, Metoda Përforcuese dhe Teknika të Muraturave në Ndërtesat Historike” – botuar dhe realizuar nga IMK gjatë vitit 2017, bazuar në Kursin e Trajnimit me tematikë “Forcimi i Kapaciteteve në Fushën e Trashëgimisë Kulturore”.
Aktiviteti prezantoi rezultatet e një bashkëpunimi të ngushtë e të suksesshëm ndërmet Fakultetit të Arkitekturës dhe Urbanistikës, Universitetit Politeknik të Tiranës dhe Institutit të Monumenteve të Kulturës, për evidentimin, njohjen dhe realizimin e propozimeve konkrete për rijetëzimin e Fshatit rrënojë të Tragjasit të vjetër.
Diskutimet e zhvilluara ndërmjet panelit dhe grupeve të interesit, të pranishëm në këtë aktivitet, sollën në vëmendje edhe Draft Ligjin për Trashëgimi Kulturore, në të cilin, koncepti i “Rijetëzimit” trajtohet si pjesë mjaft e rëndësishme që lidhet me ruajtjen e ndërtimeve dhe siteve të trashëgimisë kulturore. Paneli i diskutimit përbëhej nga: znj. Mirela Kumbaro Furxhi – Ministre e Kulturës; znj. Arta Dollani – drejtoreshë e IMK-së; Prof. Dr. Florian Nepravishta – dekan i FAU-t pranë UPT-së; Dr. Ledita Mezini – pedagoge pranë FAU; Prof. Dr. Pirro Thomo – ekspert në fushën e trashëgimisë kulturore.
Fshati rrënojë i Tragjasit të Vjetër, sot një muze i hapur i lënë në harresë, vjen në vëmendjen e studentëve të Fakultetit të Arkitekturës, nëpërmjet ekspozitës me projekt propozimet e tyre, ku spikat një dimension i ri idesh për ruajtjen dhe rijetëzimin e këtij fshati.
