Vrasja e 41-vjeçarit Devi Kasmi tronditi Tiranë mbrëmjen e 29 janarit, ndërsa i dyshuari kryesor si ekzekutor i tij është shtetasi grek Efthymiou Efthymious.
Efthymious ka dalë ditën e djeshme para gjykatës ku në të shumtën e kohës u tregua i hutuar. Atij iu gjetën një shumë prej 25 mijë eurosh dhe para shqiptare me vete ndërsa greku ka mohuar kategorikisht të ketë qenë ai ekzekutori.
Ai është ankuar ditën e djeshme tek avokati i tij për kushtet në paraburgim, shkruan Panorama.
Ai i ka thënë avokatit, para se të niste seanca, se nuk kishte mundur të bënte dush në paraburgimin e Policisë së Drejtorisë së Tiranës.
Tjetër ankesë e tij ishte se në paraburgim nuk e kishin lënë të konsumonte duhan.
Seanca ndaj tij dhe ndaj tre të arrestuarve të tjerë u zhvillua me dyer të mbyllura, ndërsa ata u lanë ende në arrest me burg.
