Anëtarja e re e Gjykatës Kushtetuese, Sonila Bejtja është betuar sot para Presidentit të Republikës, Ilir Meta, në një ceremoni të zhvilluar në presidencë.
Bejtja, e cila është anëtarja e shtatë e Kushtetueses, u betua para Metës, me dorën mbi Kushtetutën e Shqipërisë dhe duke u zotuar, tha:“Betohem se gjatë kryerjes së detyrave të mia do t’i qëndroj kurdoherë besnik Kushtetutës së Republikës të Shqipërisë”.
Në ceremoninë solemne të betimit, ishin të pranishëm Zv/kryetarja e Kuvendit, Vasilika Hysi, kryetarja në detyrë e Gjykatës Kushtetuese, Vitore Tusha, Avokati i Popullit, Erinda Ballanca, drejtuesja e misionit OPDAT të ambasadës së SHBA-së në Tiranë, Michelle Lakomy, shefi i Sektorit Politik dhe i Ngarkuar me punë në Delegacionin e BE në Tiranë, Alexis Hupin si dhe anëtarë të Kabinetit të Presidentit të Republikës.
Ditën e djeshme, pas intervistimit të saj, KED dërgoi në presidencë emrin e Bejtjes si anëtarja e radhës së Kushtetuese dhe Meta nuk hezitoi për ta dekretuar.
Me emërimin e Bejtjes, Gjykata Kushtetuese siguron anëtarin e shtatë. Ajo ishte e vetmja në garë për vendin e lirë që u la nga Besnik Muçi.
Pas plotësimit të vakancës për anëtarin e 7, do të priten edhe emrat e propozuar nga Gjykata e Lartë, për të plotësuar të gjithë Gjykatën Kushtetuese. Gjykata Kushtetuese përbëhet nga 9 anëtarë dhe gjyqtarët qëndrojnë në detyrë për 9 vjet, pa të drejtë riemërimi.
