Sot në “Ftesë në 5” me Bieta Sulon në Top Channel, ishte e ftuar Viola Sylejmani, vajza 20 vjeçare që prej 15 vitesh “bashkëjeton” me vitiligon (sëmundje që zbardh lëkurën).
Ajo ndau e emocionuar historinë e jetës, duke treguar se fillimi ka qenë shumë i vështirë.
Viola pranoi se që prej fëmijërisë është paragjykuar nga moshatarët kur i shihnin njollat e bardha në trup.
“Kur shkonim në plazh, atëherë si çdo fëmijë që do të krijojë shoqëri iu afrohesha fëmijëve dhe dëgjoja nënat që nuk i lejonin të më afroheshin, sepse kishin merak se ngjitej”, tregoi ajo.
Gjatë moshës 16 vjeçare, në momentin kur Viola nisi punën e saj të parë, u detyrua të mbulonte me “make up” shenjat në këmbë dhe në duar, për të shmangur vështrimet dhe reagimet paragjykuese të njerëzve.
Gjatë rrëfimit të saj, 20 vjeçarja nuk i mbajti dot lotët, duke kujtuar se vite me radhë nuk e ka dashur dhe nuk e ka pranuar veten siç është.
