“Reforma në Drejtësi duhet të vazhdojë pa marrë parasysh pengesat”, deklaroi sot ambasadorja e SHBA-së në Tiranë Yuri Kim.
Ambasadorja Kim publikoi sot foto të takimit me anëtarët e Kolegjit të Posaçëm të Apelimit.
“Kolegji i Posaçëm i Apelimit ka një punë të vështirë, por Vettingu duhet të vazhdojë të tregojë përgjegjshmëri dhe të fitojë besimin e shqiptarëve. SHBA mbështet Reformën në Drejtësi. Le të vazhdojmë përpara, hap pas hapi, pa marrë parasysh pengesat”, tha ambasadorja.
Po ashtu, ambasadorja Kim publikoi një foto nga takimi me Komisionerët Publikë, në 21 maj.
“Ata janë të përkushtuar për të siguruar integritetin e Vettingut duke apeluar vendime. Le ta vazhdojmë Reformën në Drejtësi duke ecur përpara, hap pas hapi”, tha ajo./atsh
