Inxhinierja e Ndërtimit, Luljeta Bozo në një intervistë televizive ka folur për lëkundjet e tërmetit të djeshëm në Tiranë e Durrës, me magnitudë 3.4 ballë.
Bozo tha se këto janë pasgoditje normale, duke shtuar se qytetarët nuk kanë pse të kenë frikë e se nuk ka vend për panik.
“Pasgoditjet e mbrëmshme kanë qenë normale. Jemi akoma në fazën e pasgoditjeve. Janë pra thjesht lëkundje të mëvonshme e nuk ka ndonjë arsye për panik. Në rast se shtëpia është e sigurt, nuk ke pse lëviz fare, absolutisht. Kur bie tërmet, nuk duhet lëvizur fare absolutisht. Pastaj qetësohet dhe kthehet në normalitet situata”, tha Bozo.
“Me këtë intensitet që ka qenë, nuk ka rrezik fare. Meqenëse jemi në kohë koronavirusi, duhen mbajtur ato rregulla të COVID-19. Nuk ka magnitudë të madhe, kështu që nuk ka pse ka panik. Edhe tërmeti i 1976 kishte pasgoditje deri 6 muaj. Do 4 a 5 muaj të çlirohet totalisht. Pasgoditjet janë gjithmonë më të ulëta sesa goditja më e fortë. Magnituda deri 3.5 nuk quhet tërmet, është çlirim normal”, tha inxhinierja Bozo.
Sipas IGJEUM, epiqendra e tërmetit mbrëmë rreth orës 22 e 30, ishte në Derven, Fushë-Krujë, ndërsa magnituda ishte 3.4 e shkallës Rihter dhe thellësia 34 km./atsh
