Gent Cakaj ka dhënë sot dorëheqje nga pozicioni i ushtruesit të detyrës së ministrit të Punëve të Jashtme në Shqipëri.
Pas dorëheqjes, në Kosovë u raportuan po sot se Cakaj pritet ti bashkohet listës zgjedhore së Partisë Demokratike të Kosovës (PDK).
Lidhur me këtë çështje ka folur deputeti i PDK-së, Sejdi Hoxha. Ai tha se kërkesa për Cakajn vjen nga strukturat e PDK. Sipas tij, Cakaj është një figurë me përvojë të jashtëzakonshme.
Megjithatë ai tha në T7 se ende nuk ka asgjë zyrtare për sa i përket kësaj çështjeje.
“Të them të drejtën janë të mirëseardhur të gjithë qytetarët e Kosovës. Ata e kanë derën e hapur në PDK. Por mbetet në dorën e z. Cakaj që të vendosë vetë nëse dëshiron që t’i bashkohet politikës apo të fokusohet tek familja e vet, apo ka plane të tjera.
Nuk ka konfirmim konkret. Po flas në kuptimin e deklarimit zyrtar të PDK-së”, tha Hoxha.
Foto, marrë nga profili zyrtar në Facebook të Gent Cakaj
