“Pavarësia, sovraniteti dhe tërësia territoriale e Kosovës janë të pacenueshme”, – tha kreu i Partisë Demokratike, Lulzim Basha, gjatë një takimi të zhvilluar në Tiranë të martën, me ish-nënkryetarin e Kuvendit të Kosovës, Xhavit Haliti dhe ish-zv.kryeministrin e ministrin e Jashtëm, Enver Hoxhaj.
Sipas Bashës, Partia Demokratike e Shqipërisë është e do të jetë gjithmonë në krah të Kosovës dhe popullit të saj.
“Pata kënaqësinë të mirëpres sot ish-nënkryetarin e Kuvendit të Kosovës, Xhavit Haliti dhe ish-zv.kryeministrin e ministrin e Jashtëm, Enver Hoxhaj. Kosova ka ditur gjithmonë të tregojë maturi përballë sfidave jo të pakta që ka kaluar para dhe pas pavarësisë së saj. Pavarësia, sovraniteti dhe tërësia territoriale e Kosovës janë të pacenueshme”, – nënvizon Basha.
“Jam i bindur se së bashku me partnerët euroatlantikë, institucionet dhe forcat politike në Kosovë do të tejkalojnë çdo sfidë dhe do t’ia dalin të ndërtojnë një të ardhme më të mirë për qytetarët e saj. PD e Shqipërisë është e do të jetë gjithmonë në krah të Kosovës dhe popullit të saj”, – përfundoi Basha. /atsh
