Shqipëria këtë vit ka 14 fitues të bursave që do të studiojnë në vende të ndryshme përfshirë Francën, Belgjikën, Gjermaninë, Italinë, Portugalinë, Mbretërinë e Bashkuar dhe Norvegjinë.
Delegacioni i Bashkimit Europian në Tiranë ka ftuar sot të gjithë studentët që duan të aplikojnë tek programet e masterit Erasmus Mundus për vitin e ardhshëm.
“2452 studentë kanë fituar bursa të financuara nga Bashkimi Europian për të studiuar në një nga 123 programet e masterit të përbashkët Erasmus Mundus këtë vjeshtë! Fituesit e bursave janë nga 142 shtete të ndryshme të shpërndara në gjashtë kontinente”, thekson Delegacioni i BE.
“Shqipëria këtë vit ka 14 fitues të bursave që do të studiojnë në vende të ndryshme. Ata do të studiojnë pjesë të ndryshme të programit të tyre të integruar të diplomës master në dy ose më shumë universitete në vende të ndryshme të Europës”, shton Delegacioni i BE.
“Jeni të interesuar të aplikoni për vitin e ardhshëm? Aplikimet për vitin 2021 do të hapen në tetor 2020. Vizitoni katalogun e programeve Erasmus Mundus për të gjetur atë që ju përshtatet më shumë: https://bit.ly/2NvNGa0. Mos humbni rastin të keni një përvojë që do ju ndryshojë jetën!”, shton zyra e BE në Tiranë./atsh
