“Në këto çaste të vështira, mënyra më e mirë për ta kaluar këtë sprovë është solidariteti që duhet të tregojmë veçanërisht për gjyshërit e vetmuar”.
Kështu shprehet Jultjan Liçi, përgjegjës i Shërbimeve Mbështetëse pranë njësisë Nr.12, në kryeqytet, i cili në këto kohë të vështira është angazhuar për t’u ardhur në ndihmë të moshuarve.
Përmes rubrikës “Heronj shqiptarë”, deputeti i Partisë Socialiste, Ervin Bushati solli sot shembullin e Jultjanit, i cili ndodhet në vijën e parë të frontit të luftës.
“Në vijën e parë të frontit të luftës ka njerëz me fuqi mbinjerëzore që në vend të bluzave të bardha, kanë zemër solidare dhe shumë përkushtim. Jultjani është një banor i njësisë së Dajtit që ka dhënë kontributin e tij në këtë periudhë të virusit COVID-19”, shprehet Bushati./atsh
